24
Tuta mou ana tuta
be nakae Yeisu ina kaluvilamna ana kaba kinana
be nakae Yeisu ina kaluvilamna ana kaba kinana
(Maki 13:1-37; Luke 21:5-28, 17:26-30,34-36, 12:41-48)
1 Yeisu ibóbwara ikavava, itáoya, kai ina tovatotowanayao taiyao Vada Kimaasabaina ana kali sinaena goi kasowóduwo go, kai tovatotowanayama kabala kana Yeisu kikina goi kadigo kama,
‘Vada Kimaasabaina ana vada adi kaigigita kugitēdi, dedevidi toidi!’
2 E kina go Yeisu idigo kana,
‘Ame vadayadi kogitedi ae? Adi kaigigita dedevidi toidi ae? U, moe nakae go, ame alatuuwokoimi konōve: Nava bei geya tayaamo gurewa vaapopoina ikaaiyaka, go sem madabokina sitagaegaekowosidi.’
3 E ibóbwara ikavava, ituko ina Oribe Koyaina goi itusobu go, kai ina tovatotowanayao ametava kabala kama Tauyana yaina goi kadigo kama,
‘Kulatuwokōima ava tuta bei moe dogoiyadi sisowóduwo. Aiyuwoina im kaluvilamna be nakae tuta ana kaba lukavava kaga bei adi kaba kinana?’
4 Tuwo Yeisu idigo kana,
‘Komi ami dodōkana, govila bei tomota sivasulaigimi. 5 Moitamo. Topola badabadaidi bei sima yoigu sivatoi kadi,
“Yau Guyau.”
E idi polayana goi boda gagaina bei sivasulaigidi. 6 E yaviya valedi bei konovedi yomana be aduwanau go, taabu kokaateyōva. Itoboine ame dogoiyadi sisowóduwo go, poyapoya ana kaba lukavava moe nava. 7 Ame moitamo. Nava bei ta boda ta boda sitáoya taiyao sivayaviya. Nakae ta kaba lovina ta kaba lovina bei sitáoya taiyao sivayaviya. Asa liliuna goi loga bei sisowóduwo be nakae nikuniku sitátava. 8 E ame dogoiyadi liliudi moe tuta moumoudi adi kaba vatowo; vevina neta idi tuta venátuna ana geda ana kaba vatowo nakae.
9 Niga imi kaleyayao bei maniyemi siyoisimi be siyogedegedemi go, maniyemi bei sikaumatemi. Ago boda liliuna bei sikaolilivemi unana yau yoigu ikaaiyaka yaimi.†Mad 10:22. 10 Ago amo tutayana tonumisa badabadaidi idi numisa goi bei sikapusi. Sediyao bei sinuwotuluyedi nakae sikaolilivedi. 11 Tokabivalavala polapola badabadaidi bei sitáoya, tomota badabadaidi sivasulaigidi. 12 Boda badabadaidi idi matakoi bei isáwala unana apipilova isáila.
13 Go avatauwa neta sitaoyakavata ana kadókana poyapoya ana kaba lukavava, e adi yava bei sibabane.†Mad 10:22. 14 Ago guna tonumisayao bei sina poyapoya ana madabokina goi sitalavaita Yaubada ina kalibúbuna valena dedevina manuna bei Totuyoyowo liliudi sinove. Amo tutayana goi tuta ana kaba lukavava bei ima.
15 E aba silali tayamo Yaubada yaina bei Vada Kimaasabaina goi iitáoya, Vadayana ikibaibaili. Moe boi nimatu tokabivalavala Daniyela itaalavaite.’
Kom tokatuyáiva ame ana yagoina kuyagoidokōidi! Yeisu tuwaina kana,
‘Tutayana aba silaliyana kogite Vada Kimaasabaina goi iitáoya,†Dan 9:27, 11:31, 12:11. 16 e tuta amo goi avatauwa Yudiya dadavina goi sikaaiyaka, sisīya sina koya goi. 17 Avatauwa vada yatana goi sikaaiyaka, taabu sisousōu bego konadi vada sinaena goi sikabidi, go sem sisiyāmo.†Luk 17:31. 18 Avatauwa tánuwo goi sikaaiyaka, taabu sikaaluvīla sīna idi kasa bego adi tanigo sikabidi, go sem sisiyāmo. 19 O tokéuwama be tovanunu! Amo tutayana moumou isaki yaidi bego sisiya. 20 E kokawanōi Yaubada yaina bego mouyana geya isowoduwoita nunutula ana tuta goi o Sabati goi, govila bei imi siya goi kokaimúmuna. 21 Moitamo. Mou ivakaigaga bei isowóduwo.†Dan 12:1; Nuw 7:14. Nakae poyapoya ina sowóduwo kunu goi go, ima ame tuta geya tayaamo mou nakae. Aiyuwoina mou amo nakae geya tuwaina bei iisowóduwo. 22 Neta maliyalinayadi Yaubada geya ikatukakupidita, e geya vatau tayaamo ana yava bei ibabane. Go ina kinavayao pasidi moitamo ikatukakupidi.
23 E tuwo avatauwa neta sidigo kadi, “Guyau goame!” o kadi, “Guyau goamo!” e taabu konuumisēdi. 24 Moitamo. Guyau polapola be nakae tokabivalavala polapola bei sisowóduwo, aba kinana kainaaopaidi gagaidi siguuinuwedi bei tomota sivasulaaigidi. Go bei sipoikíkina bego Yaubada ina kinavayao nakae sivasulaigidi. 25 Konōve. Bogina agimikatumatalimi. 26 Tauna neta tomota maniyedi silatuwokoimi kadi, “Guyau tautaulu goi ikaaiyaka”, e moe pola, tuwo taabu kononōina. O neta kadi, “Guyau tukunu goi ikaaiyaka”, e moe pola, taabu konuumisēdi.†Luk 17:23-24. 27 Guyauyana ina sowóduwo moe nakae geya. Moitamo. Ávila bogina tayagoi. Ina kávila bomatu ina koiboga ana madabokina itapasigi, e tomota liliudi sigite. E Tomalatomota ina sowóduwo tauna nakae; tomota liliudi bei sigite. 28 Nakae neta boyoboyo kogitedi sitaligógana, e bogina koyagoi tomata ikaaiyaka. E nakae tutayana aba kinanayadi kogitedi, bei koyagoi giyakainava Tomalatomota ikaluvilamna.†Luk 17:37.
29 E mouyadi adi maliyalina mlidi goi geya mgoninamo ame nakae bei isowóduwo:
Níyala bei ikamamaníwana,
tukówana ina mavada bei isayata,†aAis 13:10b; Isi 32:7b; Iyl 2:10,31, 3:15a; Gui 2:20.
utuna yábana osasaina goi bei sisou
be nakae baloma toogagaidi yábana osasaina goi
Yaubada bei ikiikudi.†bAis 13:10a, 34:4; Isi 32:7a; Iyl 2:10b, 3:15b; Nuw 6:12-13.
30 Amo tutayana bei Tomalatomota ina kaluvilamna ana kaba kinana yábana osasaina goi isowóduwo. Go amo tutayana bei boda liliudi poyapoya ame goi madi nuwomou sitáiya. Ago Tomalatomotayana bei sigite yábana geleoina goi imamaima†Dan 7:13; Sak 12:10-14; Nuw 1:7. ina togaga be nakae ina tomoéyala gagaina ana káeyana bei ivagitaakoedi. 31 Síula bei iuwe, e ina aneroseyao bei ietunedi sina poyapoya ana madabokina goi ina kinavayao sitaligogoidi.
32 E latuwogu livalakaibala ame taniya‡Taniya: Aba gita ame Diyuu idi kalova yoina pigi (fig) keuwoina giyaina nakae keukeu keuwoina, go sem vagadi sivalutu nakae taniya. manuna aba gita tayamo avatulukoimi bei koyagoi. Tutayana taniya laonina bogina silabosúsuwo be vaga vau idugo, e bogina koyagoi kúwana ana tuta bogina ivaakikina. 33 Moe tauna komi nakae. Tutayana amo mouyadi liliudi koogitedi, e koyagōi Tauyana totom goi ikaaiyaka.
34 U, moe bei kooyagoi go, ame alatuuwokoimi konōve: Tomota komi nakae nava bei maa yawoidi tutayana ame dogoiyadi bei sisowóduwo. 35 Yábana be poyapoya bei sitagau go, yau guna livala sikaiyako vata.
36 E Tomalatomota ina kaluvilamna ana tuta manuna konovēgu. Geya vatau tayaamo iyagoi ava maliyalina goi o ava níyala goi bei ima. Kidi anerose da yábana geya siyagoiyeta, e Yaubada Natuna nakae geya iyagoiyeta, go sem Yaubada Tamada anetava iiyagoi. 37 Moitamo. Nakonakae boi Nowa ina tuta goi mluwa ina sowóduwo,†Abv 6:5-8. e Tomalatomotayana ina kaluvilamna moe nakae. 38 Nowa ana tuta goi nava mluwa geya imaita tomota idi guinuwa siguuinuwedi. Nakae sikakáika be sinimnim be nakae sinainai ana kadókana Nowa mana bodayauwo sitáoya dedeoga gagaina goi sisowoya 39 go, tomotayadi geya siyagoiyeta mluwa giyakainava bei ima. Tuwo idi sinapu tauna nakae ana kadókana mluwayana bogina ima isamatedi.†Abv 7:6-24. Tomalatomotayana ina kaluvilamna bei nakae. 40 Nakae koroto adi taiyuwo tánuwo goi sipaaisewa; tayamo Yaubada ikabi inave go, tayamo ikalave ikaaiyaka. 41 Vevina adi taiyuwo witi sikauveyetaveta, tayamo Yaubada ikabi inave go, tayamo ikalave ikaaiyaka.
42 Tauna koyauyāusa! Geya koyagoiyeta ava maliyalina imi Tomoya bei ikaluvilamna. 43 E ame konuwookavāte: Neta toni vada bogina iyagoi ava tuta sabamgo goi tovaináwana bei ima bego ina vada isiu, e iyauyáusa tovainawanayana isanabode bei ina vada goi geya isiuta. 44 Ame pasina komi nakae mami katuubayasi koyokabūbuna unana Tomalatomota bei ivatoopemi. Tauna bogina go, mami katubayasi kokaiyāka.
45 E tauna itoboine bei komi tomota paakonina tayamo nakae. Pakoninayana aba numisa be nakae tonanamsa. Tuwo ina tomoya bei ivayoko kina ina pakonayao adi tovakumgo, bei maliyalina tamo tamo tuta ana toboine goi avadi iivinidi sikakáika. Ikavava, tomoyayana ina. 46 Niga bei ikaluvilamna ima go, neta amo pakoninayana ibabane iguuinuwe nakae boi bogina ilatuwoko, e ana dedevina bei ibabane. 47 U, ana dedevina bei ibabane go, ame alatuuwokoimi konōve: Tomoyayana ina pákwana bei ivayoko kina konana liliuna adi tomatakavata.
48 Go nakona amo pakoninayana goyogoyoina. Bei nuwona goi inuwonúwana kana, “Guna tomoya ikaimúmuna.” 49 Tuwo ivatowo ina tosavaiyuwo paakonidi nakae iilauidi go, kina ikakáika be inim ginagina oine ana toyaluwoyao taiyao. 50 Go pakoninayana ina tomoya ina kaluvilamna geya iyagoiyeta, ava maliyalina o ava tuta bei ima. Tauna bei ivatoope. 51 Ago tutayana ima, ina pakonayana bei iboboyuwe‡Iboboyuwe: Ame livalayana da Giriki niyadi goi geya imavadeta. Itoboineda kada, ‘Iboboyuwe.’ Ago aiyuwoina itoboineda kada, ‘Ana liuna gagaina toina ivini.’ go, tauyadi tonumisa polapola adi dadava goi iyato ikaaiyaka. Amoko goi sitaiya vata be nakae saladi sikakaavatedi simatamaimaita.’
†24:15 Dan 9:27, 11:31, 12:11.
†a24:29 Ais 13:10b; Isi 32:7b; Iyl 2:10,31, 3:15a; Gui 2:20.
†b24:29 Ais 13:10a, 34:4; Isi 32:7a; Iyl 2:10b, 3:15b; Nuw 6:12-13.
†24:30 Dan 7:13; Sak 12:10-14; Nuw 1:7.
‡24:32 Taniya: Aba gita ame Diyuu idi kalova yoina pigi (fig) keuwoina giyaina nakae keukeu keuwoina, go sem vagadi sivalutu nakae taniya.
‡24:51 Iboboyuwe: Ame livalayana da Giriki niyadi goi geya imavadeta. Itoboineda kada, ‘Iboboyuwe.’ Ago aiyuwoina itoboineda kada, ‘Ana liuna gagaina toina ivini.’