7
Yaubada ina katukatu Isileli tubunao
144,000 dabadi goi sikaupakiyedi
144,000 dabadi goi sikaupakiyedi
1 Amo dogoiyadi bogina sikavava, anerose adi taivasi agitedi poyapoya ana dadava; dadavavasi goi siitaoya go, yágira aivasi siyooisidi bego yagirayadi geya itoboinedita sitowo poyapoya goi, négwasa goi be alova goi.†Yer 49:36; Dan 7:2; Sak 6:5. 2 Ituli ta anerose agite bomatu dadavina goi ituko ima go, tauyana Yaubada maa yawoina ina katukatu ana kaba láuwo iikavale. Niyana gagaina goi iduduwo, aneroseyadi adi taivasi madi tagona poyapoya be négwasa sibugooyaidi, e ilatuwokoidi 3 idigo kana,
‘Taabu poyapoya, négwasa be alova kobugooyaīdi ana kadókana ida Yaubada ina pakonayao dabadi goi katukatu bogina kakaupakiyedi!’†Isi 9:4,6.
4 Tuwo Isileli tubunao maniyedi dabadi goi katukatuyana sikaupakiyedi go, adi badabada anove moe 144,000. Tauyadi Isileli tubunao adi dala tamo tamo goi ame nakae:
5 Dala Yuda goi 12,000.
Dala Rubeni goi 12,000.
Dala Gadai goi 12,000.
6 Dala Aseri goi 12,000.
Dala Napatali goi 12,000.
Dala Manase goi 12,000.
7 Dala Simion goi 12,000.
Dala Livai goi 12,000.
Dala Isakara goi 12,000.
8 Dala Sebuloni goi 12,000.
Dala Iyosepa goi 12,000.
Dala Beniyamina goi 12,000.
Tauna nakae madabokidi katukatuyana dabadi goi sikaupakiyedi.
Boda liliudi siyapali Yaubada yaina
9 Amo dogoiyadi sikavava, e akandobala boda gagaaina agitedi. Geya vatau tayaamo itoboine ikatuyaividi. Tauyadi aba lovina tamo tamo goi, dala tamo tamo goi, boda tamo tamo goi be aníyana tamo tamo goi†Nuw 5:9, 11:9, 13:7, 14:6, 17:15. sima kébana esaaesaina matana goi be nakae Lamiyana matana goi siitaoya. Tomotayadi madi kwama maanawedi be poowoudi go, nimadi goi magimagi libidi siyooisidi. 10 Tauyadi niyadi gagaina goi siiduduwo sidigo kadi,
‘Ida Yaubada goi,
Tauyana kebana esaaesaina goi itulagalaga,
be nakae Lamiyana goi ada yava tababane!’
11 Kidi go aneroseyadi liliudi kébana esaaesaina, tomoyamoya be nakae dogoi maa yawoidi adi taivasi sitaoyaakobudi go, Yaubada kebana esaaesaina matana goi aedi sivatugúyala Tauyana yaina sisakululu, 12 sidigo kadi,
‘E nakae!
Ida Yaubada aba yapali, aba taimámina, tonanamsa,
aba kauyagu, aba wowoina, totogaga be nakae tokalika
ame tuta be nakae tuta simamaima!
E nakae!’
13 Tomoyamoya yaidi goi tayamo ilumadadegu idigo kana,
‘Amo tauyadi adi kwama maanawedi be poowoudi avatauwa? Nako goi sima?’
14 ‘Guna tomoya, kom bogina kuyagoi’, kaegu.
Tauyana idigo kana,
‘Amo tauyadi mou gagaina ana tuta goi sitogaga.
Adi kwama maanawedi Lamiyana ikaikaina goi
bogina sinikidi sipopowou.†Mad 24:21; Mak 13:19; Ibe 9:14; Nuw 22:14.
15 Moe pasina Yaubada kebana esaaesaina matana goi
sikaaiyaka go, ina Vada Kimaasabaina sinaena goi
sitaaimámina maliyalina be sabamgo.
Tolovina kebana esaesainayana goi
itulaagalaga bei ivainuugonedi.
16-17 Tuwo Lamiyana kebana esaaesaina kikina goi
iitaoya moe adi tomatakavata.†aIsi 34:23.
Tauyana bei ivakededi sina
bwae maa yawoina goi sinim†bSam 23:1-2.
be nakae Yaubada mataiudi bei isekukudi.†cAis 25:8.
Tauna geya tuwaina bei loga o dava sikamakámasa
be nakae geya tuwaina níyala o yaviyavi silootowoidi.’†dAis 9:10.