27
Yudasa ina kámasa tetelina
(Maki 15:1; Luke 23:1-2; Iyoni 18:28-32; Guinuwa 1:18-19)
1 E nobuyana nava matagougouna kidi Tonúwala Gagaidi be nakae Diyuu idi tomoyamoya liliudi situgúguna go, silosinapu bei Yeisu sikaumate. 2 Silosinapu ikavava, Yeisu nimana siyowóidi, sinave gávana Pailato nimana goi siyato.
3 E tuta amo goi Yeisu ana tonuwotulu Yudasa inove Yeisu bogina sitakino bego ikámasa, e itugavila ivakúwana, tuwo siribayadi 30 ikabidi, ina Tonúwala Gagaidi be Diyuu idi tomoyamoya yaidi goi bego ivinimneidi 4 idigo kana,
‘Koroto tutubeso anuwotuluye, tauna bogina agoyo.’
E kidi kadi,
‘Im goyo moe geya kai ima puwoya geya. Moe kom im polava.’
5 Tuwo siribayadi ilavedi Vada Kimaasabaina ina kali sinaena. Ikavava, isowóduwo ina yowoyówana ikabi, ina alova laonina goi isiko. Ikavava, nukotona goi isiko ilosuyae ikámasa.
6 E kidi go Tonúwala Gagaidi siribayadi sikabidi go, sidigo kadi,
‘Ame ámasa maisana, tauna geya itoboineyeta vininabeso dedeogaina goi tadodoidi.’
7 E silosinapu ikavava, silovina bei siribayadi goi vaega ana tomolúluwo ina poyapoya sigimone bego ogaoga adi valiwoga. 8 Tauna amo poyapoyayana tomota sivayou ikaika poyapoyaina,†Gui 1:19. e ame tuta nakae.
9 Tuwo Yaubada ina tokabivalavala Yeremaya‡Yeremaya: Madiu ilatuwokoida Yeremaya ina livala bei italavaitedi. Go livalayadi tomwana 9 be 10 moe Sakarayau ina livala. Nakae iguinuwe unana Yaubada ina tokabivalavalayao bukidi Yeremaya ivakumgo. Tauna tutayana kana, ‘Yeremaya’, ina nuwonúwana Yaubada ina tokabivalavala tayamo amo bukiyana goi. ina livala moeko goi imalatomota. Tauyana idigo kana,
‘Ago mani 30 sikabidi,
maniyadi moe Tauyana ana maisa.
Maisayana moe Isileli tubunao silovina.
10 Ago moe maniyadi sikabidi,
vaega ana tomolúluwo ina poyapoya sigimone
nakae Yauwe ilatuwokoigu.’†Yer 32:6-15.
Sakarayau 11:12-13
Yeisu ana kotu Pailato matana goi tetelina
(Maki 15:2-5; Luke 23:3-5; Iyoni 18:33-38)
11 E Yeisu sime gávana Pailato matana goi sivatáoe go, gavanayana Yeisu ilumadade idigo kana,
‘Kom moitamo Diyuu adi tokalibúbuna?’
‘Kom bogina kudigoyabe’, Yeisu kaena.
12 Tonúwala Gagaidi be nakae tomoyamoya siiwowoko go, geya ikatumapudita. 13 E Pailato idigo kana,
‘Manakae? Idi wowókana badabadaidi kunovedi gea geya? Kaga unana kuutugau?’
14 Ago kina geya kada tayaamo idi wowókana ikatumapu geya, tauna gavanayana ikainaopa gagaina.
Pailato ilovina Yeisu bei ikámasa tetelina
(Maki 15:6-15; Luke 23:13-25; Iyoni 18:39—19:16a)
15 Ego Basitáwana Aikanina ana tuta gavanayana ina sinapu ame nakae: Neta koroto tayamo deri ana tokaiyaka go, tomota latuwodi, e Pailato italigei ivinidi. 16 E amo tutayana yoowonina tayamo valena gagaina deri goi ikaaiyaka yoina Yeisu Barabasi.‡Yeisu Barabasi: Kopi maniyedi Madiu ina buki goi ameko kadi, ‘Barabasi.’ Go maniyedi kadi, ‘Yeisu Barabasi.’ 17 E moe Pailato ina sinapu, tuwo tutayana boda sima bogina situgúguna, Pailato ilatuwokoidi idigo kana,
‘Avatau latuwomi ataligei manumi? Yeisu Barabasi gea Yeisu, Tauyana tomota siivayou Guyau?’
18 Pailatoyana bogina iyagoi kidi Tonúwala Gagaidi Yeisu sime nimana goi siyato kotu manuna unana Tauyana sivakipikipiye. 19 E Pailato aba takínona ana kaba tusobu goi iitusobu go, monena livala tayamo ietune ima idigo kana,
‘Moe korotoyana tokibóbwata, e kwalāve. Geya tayaamo kaga kuguinūwe yaina. Nuwobuna Tauyana akanamimiye go, guna kanamimiyana aba matoita gagaina yaigu.’
20 E kidi go Tonúwala Gagaidiyadi be nakae tomoyamoyayadi boda sisiukoidi, nuwodi sitalaidi kadi,
‘Kokawanōi bego Barabasi italigei go, Yeisu ikaumate.’
21 E kina gavanayana ilatuwokoidi idigo kana,
‘Ame adi taiyuwo yaidi goi ava koroto latuwomi ataligei manumi?’
‘Barabasi!’ tomota kaedi.
22 Go kina Pailatoyana idigo kana,
‘Neta nakae, e Yeisu, Tauyana tomota siivayou Guyau, bei kaga avaiko?’
Madabokidi sidigo kadi,
‘Kerose goi kutupatūko!’
23 ‘Ava goyo iguinuwe bei itoboine ikámasa?’ tauyana kaena.
‘Kerose goi kutupatūko!’ bodayadi tuwaina kaedi.
24 E Pailato bogina igite geya itoboineyeta ikaugeogéona Yeisu ina talígava manuna, go sem bodayadi giyakainava bei sivalauláuwo. Tuwo bwae ikabi bodayadi matadi goi nimana inikidi idigo kana,
‘Ame Tauyana ikaikaina moe yau geya guna puwoya geya. Yau nimagu bogina anikidi. Tauna Tauyana yawoina moe komi imi polava.’†Atu 21:6-9.
25 Tuwo boda madabokidi sidigo kadi,
‘Tauyana ikaikaina kai nimama goi be nakae natumao nimadi goi bei ikaaiyaka.’
26 E tuwo kina Pailato ina tovayaviyayao ilovinaedi Barabasi sitaligei bodayadi sivinidi. Ikavava, ina tovayaviyayao maniyedi ilatuwokoidi idigo kana,
‘Yeisu kokābi, kodābi. Ikavava, konāve bei kerose goi kotupatūko.’
Tuwo moitamo Tauyana sikabi sidabi.
Yeisu kerose goi situupatuko tetelina
(Maki 15:16-32; Luke 23:26-43; Iyoni 19:2-3,16b-27)
27 Amo tutayana gávana Pailato ina tovayaviyayao sina Yeisu sikabi sinave Erodi ina vada esaaesaina ana kali goi sisiuye. Amoko goi sediyao tovayaviya liliudi siduduwedi sima Tauyana sitaoyakobu. 28 Sitaoyakobu, ana kwama sivalilivi. Ikavava, tolovina ana kwama dedevina go, kayakayaina sikabi sivalosi. 29 Sivalosi ikavava, tolovina ana pasapasa polapola sivapase ame nakae: Taliboibo sikabi dabayogigi polapola simete, dabana goi sikailagasi. Aiyuwoina duriduri tayamo sikabi ina kaituko nimakakataina goi siyato go, aedi sivatugúyala matana goi madi kaiwoteta sidigo kadi,
‘Diyuu adi tokalibúbuna takiilagāsi!’
30 Ikavava, maisina sigiwoli. Sigiwoli ikavava, duriduriyana sikabi, dabana siláui. 31 Sikaiwotete ikavava, kwamayana sivalilivi go, toinina ana kwama sivalosimnei, sinave bei kerose goi situpatuko.
32 E sinavenave go, enao goi koroto tayamo guma Sairini sibabane yoina Saimoni. Moe tauyana silovinae bego Yeisu ina kerose ikavale. 33 Ikavale, sima asa tayamo yoina Gorigota‡Gorigota: Ame asayana koya giyaina go, bulubulu maisiyana o asayana goi nakona boda sikámasa, tauna bulubulu badabadaidi sikaaiyaka. (moe ana yagoina Bulubulu ina Kasa). 34 Amoko goi oine be alova tamatamaina sipopolidi Yeisu sivanim geda manuna go, inimkone, ikatae.†Sam 69:21. 35 E Tauyana ana kwama sivalilivi ikavava, kerose goi situpatuko namliyeta baige keroseyana sivatáoe. Ikavava ana kwama, ana sendoro, ana gadíwana sikabidi, pápala tayamo siguinuwe bei sigite avatauwa sikabidi.†Sam 22:18. 36 Ikavava, situsobu go, Tauyana simataakavate. 37 Go ana píkwana aisika paaevaina tayamo goi sigini, dabana diligaemaina goi situpatuko. Ana pikwanayana kana,
‘Ame Yeisu,
Diyuu adi Tokalibúbuna.’
38 Amo tutayana tokapipilova adi taiyuwo Yeisu taiyao nakae adi kerose goi situpatukoidi, tayamo kakataina go, tayamo kekelina. 39 E kidi go tomota maniyedi enao goi siiketoiya Tauyana sitagiwoi. Nakae dabadi sikatugegéwana be nakae sikaoseve†Sam 22:7, 109:25. 40 sidigo kadi,
‘Kom Tauyam bego Vada Kimaasabaina kutauwe go, maliyalina aito mlidi kuyowomnei, neta kom Yaubada Natuna, e kerose goi kusōu kūma toinim kuyavēm.’†Mad 26:61; Iyo 2:19.
41 Tonúwala Gagaidi be Yaubada ina Katukeda ana tovatulukwanayao be nakae Diyuu idi tomoyamoya nakae sikaoseve 42 sidigo kadi,
‘Bego ituli ta tomota iyavedi go, geya itoboineyeta toinina iyave. Tauyana bego kita Isileli tubunao ida Tokalibúbuna, tuwo ame tuta kerose goi isōu īma bei tanumise. 43 Tauyana bego inumisa Yaubada yaina, tuwo neta Yaubada moitamo iuyaone, e ame tuta iyave. Moitamo. Boi idigodigo bego kina Yaubada Natuna.’
44 Tokapipilovayadi bogina tupaatukoidi Yeisu taiyao nakae sikaaoseve.†Sam 22:8.
Yeisu ina kámasa tetelina
(Maki 15:33-41; Luke 23:44-49; Iyoni 19:28-30)
45 E bogina dine, asa madabokina ikamamaníwana go, amamaniwanayana ikaaiyaka ana kadókana lavilavi.
46 E asa lavilavi nakae, Yeisu niyana gagaina goi iduduwo idigo kana,
‘Eli Eli lama sabakatani?’
Moe ana yagoina kada, ‘Guna Yaubada, guna Yaubada, kaga unana kwalavegu?’†Sam 22:1.
47 E toyoko maniyedi amoko goi sinove go, sitainasi, tuwo sidigo kadi,
‘Mae Tauyana Eliyau iiduduwe.’
48 Tuwo mainao koroto tayamo itaoya ilokoina ina toutou ikabi, e oine bwaena yuyuyuna goi isavaibute. Ikavava, duriduri ikabi, isisiwo go, ikailagasi bego Yeisu ivanim.†Sam 69:21. 49 E korotoyana senao sidigo kadi,
‘Tauyana takalāve go, tagitegīte. Nakona Eliyau bei ima iyave.’
50 E kina go Yeisu niyana gagaina goi aiyuwoina iduduwomna, e yawoina ikavava. 51 Ago geya mgoninamo Tukunu Kimaasabaina Toina ana vabodaupa kaarekoina ikiiseyuwe,†Tat 26:31-37. dolagaema isou ina ditonema. Aiyuwoina poyapoya iiku be nakae gurewa itavisidi. 52 Go valiwoga tukubu ikatupaevedi be nakae kidi Yaubada ina kimasabayao badabadaidi boi bogina sikámasa, e ikaitaoedi. 53 Ago Yeisu ina taoyamna mlina tukubuyadi goi sisowóduwo sina asa kimaasabaina goi sisiu, e sivagitakoedi tomota badabadaidi yaidi.
54 E kina go tovayaviya adi tovakumgo taiyao sikaaiyaka Yeisu simataakavate go, nikuniku be nakae kaga liliuna sisowóduwo sigitedi, tuwo sikainaopa gagaina kadi,
‘Moitamo, ame Tauyana Yaubada Natuna.’
55-56 Ego boi vevina badabadaidi Galili goi Yeisu sisabookuliye be nakae sivavaite. Vevinayadi moe Meri guma Magidara be ana ebígana moe Yemesa be Iyosepa sinadi be nakae Sebedi natunao sinadi. E ame vevinayadi kerose go, tupwana masigava goi siitaoya sigite kaga liliuna siisowóduwo.†Luk 8:2-3.
Yeisu ana valiwoga tetelina
(Maki 15:42-47; Luke 23:50-56; Iyoni 19:38-42)
57 E bogina lavilavi toina go, koroto tayamo toesaesa guma Arimateya yoina Iyosepa ima. Tauyana nakae Yeisu ina tovatotówana tayamo. 58 Moe tauyana ina Pailato yaina ikawanoi idigo kana,
‘Manakae? Kutagona Yeisu wowona akabi avaliwoge gea geya?’
Tuwo moitamo Pailato itagona go, ina tovayaviyayao ilovinaedi idigo kana,
‘Kōna Tauyana wowona kokābi go, ame korotoyana kovīni.’
Tuwo sina Yeisu wowonayana sikabi sime Iyosepayana sivini. 59 Sivini, e Iyosepayana ma senao sikabi go, areko maavadaina sikabi, siutube. 60 Siutube ikavava, sinave Iyosepa ina valiwoga tukubu vau goi sisiu siyato. Tukubuyana boi gurewa itavi. E Yeisu wowonayana siyato ikavava, sisowóduwo go, gurewa gagaina gumogumoina sipuli tukubuyana tobuna sikaubode. Ikavava, sitaoya sina.
61 Ego amoko goi Meri guma Magidara mana ebígana tukubuyana tubalakoina goi siitusobu Iyosepa sigitegite.
Tovayaviya sina valiwoga
simatakavaatedoko tetelina
simatakavaatedoko tetelina
62 Amo maliyalinayana moe Basitáwana Aikanina ana katubayásina ana maliyalina. E vanuwo itomo kidi Tonúwala Gagaidi be nakae Parisi sina Pailato taiyao situgúguna 63 sidigo kadi,
‘Tomoya, kai kanuwopeye boi amo topolayana nava maa yawoina idigo kana,
“Maliyalina aito sikavava, e ámasa goi Yaubada bei ikaitaoegu.”†Mad 16:21, 17:23, 20:19; Mak 8:31, 9:31, 10:33-34; Luk 9:22, 18:31-33.
64 Tauna im tovayaviyayao kulovinaēdi sina Tauyana ina valiwoga tukubu sivabodebode be nakae simatakavatedoko ana kadókana maliyalina aitonina goi, govila bei ina tovatotowanayao sina wowona sivainao, e tomota silatuwokoidi kadi,
“Yaubada tokámasa yaidi goi bogina ikaitáoe.”
Moeko goi pola vakuumgoina igoyo go, ame polayana vaamliyaina igoyo toina.’
65 Kina Pailatoyana idigo kana,
‘Tovayaviya bei avinimi. Kokabīdi kōna go, nakonakae itoboinemi, e tukubuyana kovabodebōde.’
66 E tuwo moitamo sina tukubuyana sivabodebode go, idi vabodabodayana ame nakae: Mainao gurewa tukubu tobuna goi giyaina sibwade, e bei siyagoi neta tomota tayamo ikatupáeve. Aiyuwoina tukubuyana tovayaviya sikaaiyaka simatakavatedoko.
‡27:9 Yeremaya: Madiu ilatuwokoida Yeremaya ina livala bei italavaitedi. Go livalayadi tomwana 9 be 10 moe Sakarayau ina livala. Nakae iguinuwe unana Yaubada ina tokabivalavalayao bukidi Yeremaya ivakumgo. Tauna tutayana kana, ‘Yeremaya’, ina nuwonúwana Yaubada ina tokabivalavala tayamo amo bukiyana goi.
†27:10 Yer 32:6-15.
‡27:16 Yeisu Barabasi: Kopi maniyedi Madiu ina buki goi ameko kadi, ‘Barabasi.’ Go maniyedi kadi, ‘Yeisu Barabasi.’
†27:24 Atu 21:6-9.
‡27:33 Gorigota: Ame asayana koya giyaina go, bulubulu maisiyana o asayana goi nakona boda sikámasa, tauna bulubulu badabadaidi sikaaiyaka.
†27:34 Sam 69:21.
†27:35 Sam 22:18.
†27:39 Sam 22:7, 109:25.
†27:44 Sam 22:8.
†27:46 Sam 22:1.
†27:48 Sam 69:21.
†27:63 Mad 16:21, 17:23, 20:19; Mak 8:31, 9:31, 10:33-34; Luk 9:22, 18:31-33.