1 Lohiabada ese Mose dekenai ia hereva, ia gwau, “Harihari Farao dekenai edena bamona dohore lau karaia be do oi itaia. Lau ese do lau hisihisi henia dikadika dainai, ia ese Israela taudia iena imana dekena amo do ia negea. Oibe, gari bada dainai, ia ese iena tano dekena amo Israela taudia do ia luludia murimuri dekenai.”

2 Dirava ese Mose dekenai ma ia hamaoroa, ia gwau, “Lau inai Lohiabada. 3 Aberahamo bona Isako bona Iakobo edia vairana dekenai lau hedinarai, Siahu Ibounai Dirava, to lauegu ladana korikori, Iehova, lau hadibaia lasi idia dekenai. 4 Lau ese Israela taudia danu gwauhamata taravatuna lau karaia, bona lau gwauhamata, lau ese idia dekenai Kanana tano do lau henia. Guna unai tano dekenai idia noho, idau taudia bamona. 5 Israela taudia dekenai Aigupito taudia ese hisihisi idia henia noho, edia taitai lau kamonai vadaeni, bona lauegu gwauhamata lau laloa. 6 Unai dainai Israela taudia dekenai oi hamaoroa, lau inai Lohiabada, bona Aigupito taudia ese umui emui latanai gaukara metau idia atoa, be be inai hisihisi dohore lau kokia. Idia guia umui, to lau ese umui do lau ruhaia, lauegu imana ena goada dekena amo, bona hoa karadia badadia dekena amo dohore lau hamauria umui. 7 Lauegu bese do lau halaoa umui, bona lau be umui emui Dirava do lau lao, vadaeni dohore umui diba, lau be Lohiabada, umui emui Dirava, Aigupito taudia edia gaukara metau dekena amo lau hamauria umui, ena Dirava. 8 Aberahamo bona Isako bona Iakobo dekenai lau gwauhamata tanona ena lalonai dohore lau hakaua vareai umui, dohore lau henia umui dekenai, umui emui tano momokani. Lau inai Lohiabada.” 9 Mose ese inai hereva Israela taudia dekenai ia hamaoroa, to idia kamonai lasi ia dekenai, edia laloa ibounai ia ore, edia gaukara ia metau momo dainai.

10 Vadaeni Lohiabada ese Mose dekenai ia hereva, ia gwau, 11 “Oi raka vareai, Farao, Aigupito ena king do oi hamaoroa, Israela taudia be iena imana dekena amo do ia negea, iena tano do idia rakatania.”

12 To Mose ese Lohiabada dekenai ia haere, ia gwau, “Mani oi laloa, lauegu uduna be ia metau dainai, Israela taudia be idia kamonai lasi lau dekenai, be edena bamona inai Farao do ia kamonai henia lau dekenai?”

13 To Lohiabada ese Mose bona Arona dekenai ia hereva, ia gwau, “Israela taudia dekenai umui hereva henia, bona Farao, Aigupito ena king dekenai do umui hereva henia, Israela taudia be Aigupito tano dekena amo do idia raka murimuri dekenai, bona umui ese do umui hakaudia.”

14 Mose bona Arona edia iduhu edia kwarana taudia edia ladana be inai: Rubena, Israela ena natuna, guna ia vara tauna, ena natuna be inai: Hanoka, bona Palu, bona Hesarona bona Karami, Rubena ena iduhu be unai. 15 Rubena ena tadina Simeona ena natuna be inai: Iemuela, Iamina, Ohada, Iakini, Sohara bona Kanana hahine ena natuna Saulo. Simeona ena iduhu be unai. 16 Levi ena natuna edia ladadia be inai, edia uru ta ta dekenai: Geresone bona Kohata bona Merari. Levi ena mauri lagani ibounai be 137. 17 Geresone ena natuna be inai: Libini bona Simei, edia iduhu taudia danu. 18 Kohata ena natuna be inai: Amarama bona Isahara bona Heberona bona Usiele. Kohata ena mauri lagani ibounai be 133. 19 Merari ena natuna be inai: Mali bona Musi. Levi ena iduhu be unai, uru ta ta dekenai.

20 Amarama ese iena lalana Iokebeda ia adavaia. Edia natuna be Arona bona Mose. Amarama ena mauri lagani ibounai be 137. 21 Isahara ena natuna be inai: Kora bona Nepega bona Sikori. 22 Usiele ena natuna be inai: Misaela bona Elisapana bona Sitiri. 23 Arona ese Iliseba ia adavaia. Iliseba be Aminadaba ena natuna, Nasona ena taihuna. Ia ese ia havaraia memero be Nadaba bona Abihu bona Eleasara bona Itamara.

24 Kora ena natuna be inai: Asiri bona Elikana bona Abiasapa. Kora ena iduhu be unai. 25 Eleasara, Arona ena natuna, ese Putiele ena natuna kekeni ta ia adavaia, ia ese Pineha ia havaraia. Levi ena iduhu dekenai ruma edia kwarana taudia be unai.

26 Lohiabada ese Arona bona Mose ia hamaoroa, ia gwau, “Israela taudia be iduhu ta ta dekena amo do umui hakaudia, Aigupito tano do idia rakatania neganai.” 27 Vadaeni Mose bona Arona ese Farao, Aigupito ena king idia hamaoroa, Israela taudia be Aigupito dekena amo do idia hakaudia siri.

28 Lohiabada ese Mose Aigupito tano dekenai ia hereva henia neganai, 29 ia ese Mose ia hamaoroa, ia gwau, “Lau inai Lohiabada, hereva ibounai oi dekenai lau hamaoroa vadaeni, be Farao, Aigupito ena king, dekenai do oi hamaoroa.” 30 To Mose ia haere Lohiabada dekenai, ia gwau, “Lauegu uduna be ia metau, Farao be edena bamona dohore ia kamonai lau dekenai?”