1 Wuane lalu, Akalina Iwanane yale ateane okonemane pii mindi leane oko loto, nimbato Epesasa tano okona sosa ateya okona enjole ateya oko pii mindi lamawuato, pepa mindi wua lo peyape lea. Nambana kii tika-mane kaiyanda yanasa aitauwa atoto, lamu yata olane toko golo-mane waa-pene yanasa tupana tombenenga namba puamo nena pua atalawane. Nambato pii oko nimba langeyo. *Lap 1:16

2 Nambato mana nimbato minalene tupa andalawane. Nimba tane akali keato mindi atoto, piape tailo pilini. Nimbato akali koo tupa towa embo wete alene. Wamba akali minditupa-mane owato pii loto, utupane yakama tane aposolo akali ateyama leai-kola, nimbato utupanena pii yapa lo tale puato, utupane owato pii lalaini akali ateyai lo andee. *1Jo 4:1-3 3 Nimbato namba nembo toto, nambana piape taimane pua atele-kola, wandakali minditupa-mane nimba minu koyalaini tekeko, nimbato kenda-pene okone auwa atoto teke, kepa naene, nambana yame atele lo nambato andalawane.

4-6 Nimbato mana epene mindi minalene lo nambato andalawane. Akali koo Nekolasa oko wato minu atalaini wandakali tupana mana koo tupa nambato embo wete alawane. Nimbatopi wandakali utupanena mana koo utupane embo wete alene lo andoto, nambato nimbana mana okone epene eya leyo. Wamba bulupane nimbato namba lo bilipi lee-angi, nimbato nambapi, Kitisene wandakali yangone tupapi, epelewa yamapane yo atee tekeko, andipa wuane pua teke, nimbato epelewa yamapane yo ata napele okonena, nimbanga koo tene mindi eya. Nimbato mana epene wamba minu atalene okone auwa tepa alu, nimba yuunga peaka-ene atele-ko. Andipa nimbato mana epene okone nembo tolo-peke lalu, yamapane peke loto, dee lapone mana epene okone minulu-peke lape. Nimbato wuane napene konda eendo, namba nimba atelenga epoto, nimbana lamu yata olane toko oko mo auwa pokale. *Lap 3:3

7 Mana koo tupa yanda pimawuato, sia minula wandakali okonemane Gotena Patandaisa yuu epene okona wandakali saka atapowa ateakale lo ataya alane ita okona dini oko yo neakale lokale. Oli Sipitisa okomane pii okone sosa tupa lamaeya oko wandakali ale asia yene tupamane wayumane ale ape-pene. Akalina Iwanane gulene akali okonemane wuane lea. *Jen 2:9; Lap 22:1-2,19

8 Wuane lalu, Akalina Iwanane gulene akali okonemane pii mindi leane oko loto, nimbato Semena tano okona sosa ateya okona enjole ateya oko pii mindi lamawuato, pepa mindi wua lo peyape lea. Namba wamba bulupane tewa atama ipulu, matilipi atapowa atolo-peyawa. Wamba namba omalu, saka atolo-peke lewa. Andipa nambato pii oko nimba langeyo.

9 Wandakali minditupa-mane Juta yame ateyama lalaini tekeko, utupane Juta yame enene ata napeyai. Jia. Wandakali utupane Satanena yame atoto, nimba andayo lamba lo atalaini. Utupane-mane lamba lo ateyai-kola, nimbato kenda-pene kambua auwa atoto, nimbanga minditaka naeya-kola, nimba koo wete atele lo nambato andeyo. Nimba koo atele tekeko, nimbato namba lo bilipi leyo nayu lo atele okonena, ati kenga nimbana minditaka kambua wete eya. *2Ko 11:14-15; Lap 3:9

10 Ale ape. Sataneto Kitisene wandakali yakamana minditupa minu mandeke pukale nembo toto, yakama andi loyale peya. Balato yakama andi loto, katapusa anda okona aindaka lola-kola, ole paiyasa yakamato kenda-pene andane minditupa auwa atolopeyai tekeko, nimba yuku olene. Nimbato nimbana bilipi oko minatawa atama pulu, nimba omole oto oko ando miape. Wuane pule-kola, nambato petesene mindi nimba mee guato, nimba saka atapowa atola loto, ataya olo-peyawa. *2Ti 4:8; Jem 1:12

11 Wuane puluwa-kola, mana koo tupa yanda pimawuato, sia minula wandakali okonemane bala lapone omoto, koya napulu-peya. Jia. Oli Sipitisa okomane pii okone loto, sosa tupa lamaeya wandakali ale asia yene tupamane wayumane ale ape-pene. Akalina Iwanane gulene akali okonemane wuane lea. *Lap 20:14-15; 21:8

12 Wuane lalu, Akalina Iwanane gulene akali okonemane pii mindi leane oko loto, nimbato Pekemama tano okona sosa ateya okona enjole ateya oko pii mindi lamawuato, pepa mindi wua lo peyape lea. Bainate yangisa, yangisa-la, lapotakana nene wete ataka pene mindi auwa atalawane akali nambato pii oko nimba langeyo.

13 Sataneto yuu nimba atalene okone bosa lo ando atalane lo nambato nembo teyo. Wamba akali Andipasa bala yakama towa atu Satane atalane yuu okonena atoto, nambana pii oko tika pua lapanawa atea-kola, Satane yamena wandakali utupane-mane bala peyo ome leaini. Utupane-mane bala peyo ome leai-kola teke, nimbato okone andoto, namba masia gii nape. Jia. Nimbato nambana gene oko auwa tepa naene, namba lo bilipi leyo nayu lalene.

14-15 Nimbato namba lo bilipi leyo nayu lalene tekeko, nimbanga koo tene minditupa eya. Wamba akali Belameto mana koo mindi Beleke mana lamawuato, Isatale tane wandakali tupamane owato gote tupa lo opa maiyene tupa nalu, pamuku pua ateakale lo mo piya oyale wua pipe leaipia. Andipa Pekemama tane Kitisene minditupa-mane akali Belamena mana koo okonelapo wato minu atalaini. Wuane pua teke, Pekemama tane Kitisene minditupa-mane akali Nikolasana mana koo tupa wato minu atalaini teke. Wandakali utupane-mane wuane pua ateakale lo nimbato ando konda alene mambele, nimbanga koo tene mindi eya-ko. *Nam 22:1–24:25; 25:1-2; 31:16; 2Pi 2:15-16 16 Nimba yamapane peke lape. Nimbato yamapane peke naleendo, namba nimba atelenga wamba kapoyale epoto, nambana nee asianga bainate apu latane ateya okomane wandakali utupane yanda pimauwakale. *Lap 3:11

17 Wandakali mindimane mana koo tupa yanda pimawuato, sia miniando, ati kenga tawe tomo epeane too pitane atene minditupa bala maiyu, nambato ana ake-pene mindi bala mauwakale. Gene wenene mindi ana ake-pene okonena pepa peyatane atola-kola, ana okone mola wandakali okonemane angu gene okone andolopeya. Wandakali waka mindikipi mindimane gene okone anda napulu-peyai. Oli Sipitisa okomane pii okone loto, sosa tupa lamaeya oko ale asia yene wandakali tupamane wayumane ale ape-pene. Akalina Iwanane gulene akali okonemane wuane lea. *Ek 16:4,14-15,33-34; Jo 6:47-51; Ais 62:2

18 Wuane lalu, Akalina Iwanane gulene akali okonemane pii mindi leane oko loto, nimbato Tayataita tano okona sosa ateya okona enjole ateya oko pii mindi lamawuato, pepa mindi wua lo peyape lea. Namba Gotena Iwanane ateyo. Nambana lene okolapo ita lungu yale too ateya. Aene batasa pole-pole piyane pua nambana kene okolapo pole-pole piyane. Nambato pii oko nimba langeyo. *Lap 1:14-15

19 Nambato mana nimbato minalene tupa pitaka andeyawane. Nimbanga kenda-pene minditupa epeya-kola, nimbato namba lo bilipi loto, kenda-pene utupane auwa atalene. Dee, nimbato wandakali yangone tupa towa epelewa yamapane yoto, utupane moyo atalene. Nimbato mana epene minu atele tupamane mana wamba minu atee tupa sia minuto, epene wete eyai.

20 Wuane tekeko, nimbanga koo tene mindi eya. Wanda Jesepeleto potopesa wanda mindi peteyo loto, nambana piape wandakali tupa minakasa wato, owato gote tupa lo opa maiyene minjuni tupa nalu, pamuku pua ateakale lo mana lamaiyane. Wanda okonemane mana koo okonelapo nambana piape wandakali tupanga mana lamauwa peteya-kola, nimbato bala wuane pua peteakale lo ando konda alene okonena, nimbanga koo tene mindi eya. *1Ki 16:31; 2Ki 9:22

21 Wamba wanda okone bala yamapane peke leakale nembo toto, nambato bala peteakale lo ando kondewa tekeko, balato mee pamuku pua pitukale nembo toto, yamapane peke na-lokale nembo teya. 22 Tene okonena, nambato wanda okonenga siki mindi epeakale loto, bala siki yene toko okona yakale lokale. Dee, wanda okone towa pamuku pua atalaini akali utupane yakama yamapane peke loto, wanda okonena mana koo okone masia mai napeaindo, nambato kenda-pene andane mindi akali utupanenga peakale lolowa-kola, utupane tandaka andane no atolopeyai.

23 Nambato wanda okonena andopane tupa peyo ome lolowa-kola, sosa okona wandakali ateyai tupa pitaka-mane nambato wandakali pitakana mini yamapa-la, okonelapo wayumane wete yapa lo andeya lo andolopeyai. Dee, nambato yakama pitakana mini yamapa-la, okonelapo yapa lo andoto, yakama mindiki-mindiki lo mana minulai pua yole gulupeya lo utupane-mane andolopeyai teke. *Sam 7:9; Jet 17:10; Lap 20:12-13

24-25 Nambato wuane pukale tekeko, Tayataita yuu okona ateyai wandakali yakamana minditupa-mane mana koo Jesepeleto wandakali lamaiyane tupa wato mina na-piyaini. Dee, yakamato mana koo waka mindi Satanena pii too-pene lalaini oko mia napeaini teke. Tene okonena, andipa yakamato mana epene wato minu atalaini tupa pitaka wayumane wato minu atama pulu, namba epolowa oto okona giau lalu, nambato kenda-pene waka mindi yakamanga yata na-wakale. *Lap 3:11 26 Wandakali mindimane mana koo tupa yanda pimawuato, sia minalu, nambana mana epene tupa wato minu atama pulu, bala saka atolane oto tupa koyo pula gii okona giau leando, balato wandakali yame waka tupa bosa lo ando ateakale lokale. *Sam 2:8-9

27-28 Nambato wandakali tupa bosa lo ando atola loto, nambana Ayiane okomane piape okone namba geane, wuane pua teke nambato wandakali okonenga piape okone mauluwa-kola, balato wandakali tupa taimane bosa lo ando atolopeya. Utupane-mane mana koo mindi mineaindo, wandakali-mane sisopene yuu-mane waa-pene koo mindi peyo pambu lalaini pua, balato wandakali koo utupane minu koyolo-peya. Balato nambana piape okone kuai lo pua atola-kola, yuu waa loyale piyane-angi kaiyanda mindi atalane oko nambato bala mauwakale. *Lap 22:16

29 Oli Sipitisa okomane pii okone sosa tupa lamaeya oko wandakali ale asia yene tupamane wayumane ale ape-pene. Akalina Iwanane gulene akali okonemane wuane lea.