45
Wosila gweguya si veivai
1 Biga kweminabwaita ivakasau nanogu,
avai tuta abutu mapilana wosi paila ulo guyau.
Makawala matausina kwegivayelu saina kasi tovagi leilai,
e makawala wala mapilana agu wosi ikanumakava onanogu.
2 E yoku saina tomitabwaila oluwalaisi tauwau,
e yoku goli tobigitomoya.
Yaubada tuta komwaidona leimitukwaiyaim.
3 Mwa! Guyau topeuligaga, kusipukikiti m puluta.
Yoku saina toguyugwayu deli giyouveka.
4 Bukusila om wosa deli kam kwatububula, e bukusaitaula wala bukutomgwaga,
e bukupilasi vavagi kwekamokwita deli karaiwaga duwosisia.
M peula bivigakaim bukutomgwaga sainela tuta komwaidona.
5 M kwaiyala saina kaikikakata
ibisibolu kukusi kam tilaula.
E boda ituwoli ituwoli ikapusisi okwaibakwaim.
6 E kabokwaraiwaga makwaina Yaubada eisakaim
bikanuvagasi e gala biwokuva goli.
Kuguyoi m tomota deli m kwaraiwaga duwosisia. 45.6-7 Ib 1.8-9
7 Kuyebwaili avai vavagi duwosisia e kukoulovi avai vavagi gaga.
Baisa uula Yaubada, m Yaubada goli, einagaim,
e isakaim mwasawa ikalisuwoli avaka eisisaiki avai gweguya ituwoli.
8 E maiinela bulami mro deli lileikoya okam kwama.
Towaisi gita iyomwasalaisi nanom om ligisa, makwaina ikatububulaisi deli doga.
9 M kwaukweda vivilela baisa gweguya wala litusia,
e om takaikaia opilakakata itoli giyouvila,
minana eisisikoma kala katububula saina kweminabwaita goula.
10 Ve! Yokula la kwava guyau, kunakaigali avaka balivala!
Kulumwelavi m tomota deli veyamwa.
11 E kam naminabwaita bivigaki guyau saina magila yoku.
Matauna wala kam tokwaraiwaga, mapaila ibodaim bukukwabikuwoli matauna.
12 Mina Taia bimiakaimsi bobwailila,
e toliguguwa bivigikonaisi ammakawala bitavileisi nanom.
13 Minana latula guyau isisu olumoulela ligisa - saina naminabwaita minana!
La sedobobu ibubulokaisi wala goula.
14 Eisikoma la sedobobu miyana kala vau bidubadu e ivakoulisi minana imiakaisi guyau.
otuboulola ibokulaisi vivila kala nabwakuli,
e minasina deli wala imiakaisi matauna.
15 E deli si mwasawa leimaisi
leisuvisi ola ligisa guyau.
16 Yoku ulo guyau ibodi bukubani bidubadu litumwa tauwau,
kidamwa dalem bikwaiveka e biguguyausi goli.
E bukuvigaki matausina bitokwaraiwagasi odubasi valu watanawa komwaidona.
17 Yeigu bakaigali bulogam metoya okagu wosi tuta komwaidona e gala kala kalitutila,
e komwaidosi wala biyakawolaimsi tuta tuta e gala wala biwokuva.