MATAIO
Mataio e Judaŋic. E mârâcko Roma kia ere kiŋaŋ qahuc takesi moneŋ rojujec (9:9). Ʒâŋe raŋɋa‐ticne Lewi. Jesuzi hefâreme izia moneŋ gie‐ticne beherâ Jesu bâjâpewec. Ʒâhec Jesu e sambâŋko ferâ Tiri Mâro râeme wahame âgofâcne jaŋehec aposolo gie‐ticne fuŋkerâ bahuc juwec. Ehuc mâreŋ wenimoira bawec i mi mana sanaŋkeŋgopeneŋ. Ʒiŋuc ine manaŋgopeneŋ: Miti kiŋaŋ gie bahuc juku ŋicqizec erâ Jesure binaŋ ʒi qâreŋkewec. Ine ʒiŋuc: Jesu fufua‐ticnere binaŋ, erâ wiac ebac ewec â miti muwec â gie‐ticne bafehuc juku hâmorâ sambâŋko fewec i qâreŋke‐fârewec. Ehuc fuŋne ʒiŋuc bataniŋkewec: Porofete raŋɋane jaŋe Mesiare findaŋdâŋ qâreŋke rambiŋ i Jesurao fârio qafârewec. Ine Judaŋiczi opâ ruac, âgofâc‐ticne, erâ wâc Judaŋic gâcne jaŋe woserâ ʒiŋuc mana taraniŋte: Jesu e Mesia‐nâŋec ine hâcne. Mataio e papia‐ticne i Judaŋic âgofâcne jaŋere biŋe qahuc qâreŋkewec hâcne. Irec Jesuzi Anuture Akadâŋ mi hetâtiewec, irec fuŋne wâc Mataiozi ritu‐hâmowec. Erâ Judaŋic micnefâc‐jeŋic jaŋe Jesu râsi ecnepie e jaŋehec dâŋ mu bâtikic ewec irec binaŋ bocjaha qâreŋkewec.
Mataiorao Jesure binaŋ i gâcne sâko Mareko â Luka jaherao wâc fokac jaha. Â Mataio erao sawa bâfuazo irec birine ʒi: Qâpuc mâreŋkonec mamana ŋicbomboŋ (gaŋ 2). Tiki miti gâcne (gaŋ 5–7). Johanezi Jesurao wiwio râewec (gaŋ 11). Motec râŋgeŋne (gaŋ 18). Hâmu gie bapa (gaŋ 20). Ŋic qoruc tâmiric (gaŋ 22). Lambe qosecne â bâtâc bâcnâpozokac (gaŋ 25). Erâ gâcne moc moc.
Mataiozi Jesure Biŋebiaŋ qâreŋkewec irec binaŋ neŋgocne neŋgocne biri‐ticne ine ʒiŋuc forakac:
Gaŋ 1—2. Jesu apa ŋosafâc‐ticne â ŋic gaŋne gaŋne fua warembiŋ irec dâŋ binaŋ erâ Jesu fufua‐ticnere binaŋ.
Mat 3—Mat 4:11. Johane Miti Opâ fufuŋke â Sataŋzi Jesu esâickewec irec binaŋ.
Mat 4:12Mat 11:1. Jesuzi Galilaia mâreŋko ra juhuc gie bawec.
Mat 11:2—Mat 13. Judaŋic jaŋe Jesu râsi ecnehuc mi manasiŋkembiŋ, kesaic dâŋ 7 i gaŋ 13 ira fokac.
Mat 14:1Mat 16:12. Galilaia mâreŋ rârec rârec gie bahuc juwec.
Mat 16:13Mat 20:28. Hâmoc‐ticnere biŋe jazawec â Jerusalem haeo feniŋte rambiŋ.
Mat 20:29—Mat 25. Jesu e Jerusalem haeo ferâ gie‐ticne batarawec.
Mat 26—28. Jesu e ʒâic mana raku maripoŋko hâmowec, erâ hâmockonec faharewec irec binaŋ.
1
Ŋic fua warekupie Jesu fuawec irec dâŋ binaŋ
(Luk 3:23–38)
Ŋic gaŋne gaŋne fua wefukupie Jesu Kristo e Abraham â Dawidi jahere ɋâric fuawec. Bin I 17:11; Fuf 5:1; 22:18 Abrahamte bifuŋko Isaka fuawec. Isakare bifuŋko Jakobo fuawec. Jakobore bifuŋko Juda â hahac ɋafâcne fuambiŋ. Fuf 21:3, 12; 25:26; 29:35; 49:10; Bin I 1:34 Judare bifuŋko Perese â Sera fuapic, jahe Tamazi rocjofawec. Peresere bifuŋko Hezoroŋ fuawec. Hezoroŋte bifuŋko Ram fuawec. Bin I 2:5, 9; Fuf 38:29, 30; Rut 4:18–22; Bin I 2:10–12 Ramte bifuŋko Aminada fuawec. Aminadare bifuŋko Nasoŋ fuawec. Nasoŋte bifuŋko Salamoŋ fuawec. Salamoŋte bifuŋko Boasi fuawec, e Rahabazi rowec. Boasire bifuŋko Obede fuawec, e Rutizi rowec. Obedere bifuŋko Isai fuawec. Rut 4:13–17 Isaire bifuŋko ŋicwofuŋ Dawidi fuawec. Ŋicwofuŋ Dawidire bifuŋko Salomo fuawec, e Uriare ŋonâŋzi rowec. Sam II 12:24 Salomore bifuŋko Rehoboam fuawec. Rehoboamte bifuŋko Abia fuawec. Abiare bifuŋko Asa fuawec. Bin I 3:10–14 Asare bifuŋko Josafata fuawec. Josafatare bifuŋko Joram fuawec. Joramte bifuŋko Usia fuawec. Usiare bifuŋko Jotam fuawec. Jotamte bifuŋko Ahaʒi fuawec. Ahaʒire bifuŋko Hisikia fuawec. 10 Hisikiare bifuŋko Manase fuawec. Manasere bifuŋko Amoŋ fuawec. Amoŋte bifuŋko Josia fuawec. 11 Josiare bifuŋko Jekonia â hahac ɋafâcne fuambiŋ, ine Judaŋic Babe mâreŋko bacjopa rakicne dameŋ ira fuambiŋ. Bin I 3:15, 16 12 Eme irec fainao Jekoniare bifuŋko Sealitie fuawec. Sealitiere bifuŋko Serubabe fuawec. Bin I 3:17; Eʒe 3:2 13 Serubabere bifuŋko Abiudu fuawec. Abiudure bifuŋko Eliakim fuawec. Eliakimte bifuŋko Aso fuawec. 14 Asore bifuŋko Zadoko fuawec. Zadokore bifuŋko Akim fuawec. Akimte bifuŋko Eliudu fuawec. 15 Eliudure bifuŋko Eleaʒa fuawec. Eleaʒare bifuŋko Mataŋ fuawec. Mataŋte bifuŋko Jakobo fuawec. 16 Jakobore bifuŋko Josefe fuawec, e Mariare ŋowe ewec. Â Mariazi ine Jesu rowec, ere ʒâŋe Kristo mukicne. Mat 27:17, 22 17 Fufua ine kecʒiŋuc fua warembiŋ: Abrahamtaonec fua fua wefukupie Dawidi fuawec i gaŋjeŋic 14. Â Dawidiraonec fua fua warekupie Judaŋic Babe mâreŋko bacjopa rakicne ine gaŋjeŋic 14 jaha. Â dameŋ irecnec fua fua warekupie Kristo fuawec iŋuc jaha gaŋjeŋic 14 ekac.
Jesu fufua‐ticnere binaŋ
(Luk 2:1–7)
18 Jesu Kristo fuawec irec fuŋne kecʒiŋuc fokac: Neŋgoc‐ticne Maria e Josefe biŋe qacnepie rârâwiŋ juhapire Tiri Mârozi mâsi bame Maria e motec kiweckewec. Luk 1:35 19 Iŋuc ecneme biŋe‐ticne Josefe e mitihec juwecte maŋnezi kecʒiŋuc muwec: No dâŋticne hofao râepe mimi fainao fezacte kamierâ behezepac. 20 Iŋuc eocte manasuhuc juhame Wofuŋte aŋelo moczi guŋko fuacnerâ kecʒiŋuc âzâcnewec: “Josefe, go Dawidire ɋâriczi Maria ŋonâŋge rocmurâ manabâc mi ezemec, motec kiweckekac i Tiri Mâroraonec. Mat 1:18 21 Motec roocmu ere ʒâŋe Jesu muzemec, eki hâcne gurufâc‐ticne sâqocnere niŋgiŋkonec batarac‐jopaocmu.” Luk 1:31; 2:21; Apo 4:12 22 Wiac sasawa fuawec i porofete moczi Wofuŋte micte dâŋ kecʒiŋuc muwec i fârinehec eocte fuawec: Jes 7:14
23 “Manaŋgopieŋ, naru ʒeŋoŋ moczi motec kiweckerâ roocmu,
ere ʒaŋe Imanue muniŋmu.”
(Nâŋâcne dâŋko: Anutuzi nâŋâcnehec jukac.) 24 Eme Josefe e guŋkonec ɋârerâ Wofuŋte aŋelozi dâŋ âzâcnewec i reŋkehuc Maria âgo ecnerâ ficticnao jowa fewec. 25 Â ŋowe ŋonâŋzi juju ine mi juhapire motec fuawec. Fuame Josefezi ʒâŋene Jesu muwec. Luk 2:7

1:1: Bin I 17:11; Fuf 5:1; 22:18

1:2: Fuf 21:3, 12; 25:26; 29:35; 49:10; Bin I 1:34

1:3: Bin I 2:5, 9; Fuf 38:29, 30; Rut 4:18–22; Bin I 2:10–12

1:5: Rut 4:13–17

1:6: Sam II 12:24

1:7: Bin I 3:10–14

1:11: Bin I 3:15, 16

1:12: Bin I 3:17; Eʒe 3:2

1:16: Mat 27:17, 22

1:18: Luk 1:35

1:20: Mat 1:18

1:21: Luk 1:31; 2:21; Apo 4:12

1:22: Jes 7:14

1:25: Luk 2:7