28
Jesu faharewec
(Mar 16:1–10; Luk 24:1–10; Joh 20:1–18)
1 Sabata hombaŋ tarame Sondao hae fufurecte Maria Madala haeonec â Maria âgone jahe ʒâŋeruŋ honenicte rapic. 2 Rahapire homeŋ sâko ɋeŋfâfâc jaha bame Wofuŋte aŋelo moczi sambâŋkonec waharâ qânâ tuŋkeme rârieme fainao ŋewec. 3 Hawari‐ticne bâbâric hawari â ŋaqi‐ticne qaŋqaŋ kisieckekicne. Mat 17:2; Apo 1:10 4 Eme soŋaŋ jaŋe honerâ maŋjeŋic bâzickeme hâhâmocne ejareme forambiŋ. 5 Eme ŋokac rafisipire aŋelozi ʒiŋuc jasawec: “Ŋohe mi hâwic‐ŋofaoc, no manakopac, ŋohe Jesu maripoŋko qakicne e honenicte warekopirec. 6 Erâ e ʒira aricne, e qanaŋ ŋazawec iŋuc erâ faharejec. Ŋohe ware fofotacne ʒi honenic. Mat 12:40; 16:21; 17:23; 20:19; Apo 2:36 7 Erâ biac rarâ motecfâcne ʒiŋuc jazanic: ‘Jesu e hâmockonec faharejec, erâ Galilaia mâreŋko rahuc bânie‐ŋareocmu, ŋoŋe ira honeniŋmu.’ Dâŋ ine hâcne ŋasakopac.” Mat 26:32 8 Eme jahe biac jaha ʒâŋeruŋ râpeckerâ hâhâwic â ʒeri sâko mâmâc manahuc motecfâcne biŋedâŋ jazanicte gagasac jaha rapic. 9 Rahapire mi Jesuzi bâfuac‐jofazejec i! Bâfuac‐jofarâ jasawec, “Ʒeri enic.” Iŋuc mume jahe maŋfuŋnao fodaperâ kikenao ropic. 10 Eme Jesuzi ʒiŋuc jasawec: “Ŋohe mi hâwic‐ŋofaoc, ra qomâfâc‐nane jazapire Galilaia mâreŋko fârâ honecnuniŋmu.” Heb 2:11; Fuf 45:4; 50:19
11 Ŋokac jahe rahapire ʒâŋeruŋ soŋaŋ jaŋeraonec gâcne biac haeo gasacke ferâ mi wiac fuawec irec binaŋ taha bapa micne jaza‐fârenʒepieŋ i! 12 Eme jaŋe soŋaŋ hefârec‐joparâ jaŋehec dâŋ muc manac erâ momori moneŋ bocjaha jarembiŋ, 13 ehuc ʒiŋuc jazambiŋ: “Ŋoŋe kecʒiŋuc munʒepieŋ, ‘Ŋafeo guŋ fohapene motecfâcne jaŋe fisirâ qâŋɋâŋ‐ticne fiuc rombieŋ.’ Mat 27:64 14 Dâŋ i kiazi manarâ wiac moc eŋarezacte mi hâwic‐ŋopazejec, nâŋe sâcne mu bâmâteŋ ecnenaŋmu.” 15 Iŋuc muhuc jazapie momori jaŋe moneŋ i rorâ dâŋ jazakicne i reŋkembiŋ. Eme irec burecdâŋ i Judaŋic jaŋerao haŋ barâ foweczi fokac jaha.
Jesuzi tikio fua‐jarerâ miti kiŋaŋte jazawec
16 Motec 11 jaŋe ine Galilaia mâreŋko tiki moc Jesuzi qanaŋ mutâcne‐jarewec ira fembiŋ. Mat 28:7 17 Ferâ e jahacne honerâ erao fodapembiŋ. Moc moczi ine maŋguru embiŋ. 18 Eme Jesuzi maŋfuŋ‐jeŋicko rarâ kecʒiŋuc muhuc jazawec: “Tâpiri sasawa sambâŋte â mâreŋte no nare‐fârekicne. Mat 11:27; Efe 1:20–22; Dan 7:14 19 Irec ŋoŋe mâreŋne mâreŋne rahuc ŋic gurune gurune kikefuŋfâc‐nane bacjopanʒepieŋ, ehuc Mamac â Ŋokâ â Tiri Mâro ere ʒâŋeo ʒuhuc‐jopahuc Miti Opâ rua‐jarenʒepieŋ. Mar 16:15, 16 20 Â dâŋ ŋaza mutâc ehuc jupo i qazu‐jarepie reŋke‐fârenʒepieŋ. Erâ ŋazape mananiŋ, no ʒoaŋne ʒoaŋne ŋoŋehec juhape mâreŋte dameŋ tarazokac.” Mat 18:20; Joh 14:23