3
Jesuzi sabata hombaŋko ŋic moc bâpiaŋkewec
(Mat 12:9–14; Luk 6:6–11)
1 Eme juku ŋic moc mene ɋaŋakicne mitificko ferâ ŋehame Jesu e ijaha fewec. 2 Feme jaŋe sabata hombaŋko ŋic bâpiaŋkeme honerâ dâŋko râeniŋte ruc bahuc ŋembiŋ. 3 Eme eki ŋic mene ɋaŋakicne ʒiŋuc âzâcnewec: “Fahare mai domac.” 4 Iŋuc murâ ŋic wio‐jarewec, “Hombaŋko wiac biaŋne me wiac sâqocne ezo, ŋic bâpiaŋ‐jopazo me sipiric‐jopazo?” Mume micnao mi rombiŋ. 5 Eme maŋsanaŋ‐jeŋicte bune sâqoreme mana gâpârehuc risic forisic honec‐joparâ ŋic âzânewec, “Mege fâre tiŋnec.” Mume ŋic e meticne fâre tiŋneme sanaŋkewec. Joh 11:33 6 Eme farisaio jaŋe rarâ izia Herodere ŋicfâc jaŋehec tumaŋnerâ, weniŋuc erâ qanaŋ, muhuc dâŋgie bambiŋ. Mat 22:16
Mâreŋ sâc irec ŋic Jesurao fisi sâqorembiŋ
(Mat 12:15–16; Luk 6:17–19)
7 Eme Jesuzi motecfâcne rocjopame riqicko rapie Galilaia mâreŋkonec ŋic guru sâko jaŋe bâjâpec‐jopambiŋ. Erâ jaŋe sawa mâcne, Judaia mâreŋkonec 8 erâ wâc Jerusalem haeonec â Idumaia mâreŋkonec â Jordaŋ ocniŋuckonec. Erâ Tiro Sidoŋ mâreŋkonec ŋic guru dindiŋ jaŋe mâmâc Jesu mâsi bapa‐ticnere biŋe manarâ qâtu bâturerâ fisimbiŋ. Mat 4:25 9 Mârec qâretec fisihuc guriŋkepie motecfâcne ʒiŋuc jazawec: “Woke moc ware mai jaha ŋeoc.” 10 Ŋic bocjaha bâpiaŋ‐jopahuc juwec, irec huc wicheczi ere maŋfuŋko rarâ bâuaniŋte hehesuec â hehe qaqac boc embiŋte wokere muwec hâcne. 11 Eme demoŋheczi e honerâ mâreŋko fodapehuc kâcɋene wirahuc mumbiŋ, “Go Anuture Ŋokâ hâcne.” Luk 4:41 12 Eme fuŋne‐ticne mupie haŋ bazacte Jesuzi mic muac sanaŋne ejarewec. Mar 1:34
Jesuzi motec 12 rocjopawec
(Mat 10:1–4; Luk 6:12–16)
13 Eme tiki mocko ferâ maŋnezi manasu biric ejarewec ŋic i jaŋere mume erao tumaŋnembiŋ. 14 Iŋuc ehuc ŋic 12 ehec juniŋte motec bacjoparâ ŋic miti jazaniŋte mujarewec 15 â demoŋ jâpe‐jareniŋte tâpiri râe‐jarewec. 16 Ŋic 12 rocjopawec jaŋere ʒâŋe ʒiŋuc: Simoŋ, ʒâŋe ɋâri‐ticne Petoro mucnewec, Joh 1:42 17 erâ Jakobo, Ʒebedaiore ŋokâ, â Jakobo ɋaticne Johane, jahere ʒâŋe Boanerges muwec, nâŋâcne dâŋko Parandaŋ motec, Luk 9:54 18 erâ Anderea, Filipo, Batolomaio, Mataio, Toma, Jakobo Alifaiore ŋokâ, erâ Tadaio â Simoŋ Ʒelote 19 â Juda Karioto haeonec, e juku Jesu doc bawec.
Jesure manapie quŋkewec
(Mat 12:24–32; Luk 11:15–22; 12:10)
20 Eme Jesuzi ficko feme ŋic guru sâkozi mocwâc ijaha tumaŋnepie e â motecfâcne jaŋe wemocko nânâ moc nanʒapiŋ. 21 Eme wiacfâc‐ticne jaŋe biŋe manarâ kecʒiŋuc muhuc roniŋte rambiŋ: “Maŋne sifuckekac.” Joh 7:20; 8:48, 52; 10:20
22 Eme miti qaqazu Jerusalem haeonec fisimbiŋ jaŋe ere ʒiŋuc mumbiŋ: “Demoŋ jaŋere ŋicbomboŋ Beezebulu eki maŋnao jume ere tâpirizi demoŋ jâpe‐jareekac.” 23 Mupie hefârec‐joparâ dâŋ suŋsuŋne ʒiŋuc jazawec: “Sataŋzi weniŋuc erâ Sataŋ jâpeocmu? 24 Mâreŋ moc irec ŋiczi fâuckerâ rârâsi kosa epie tuhu fuaocmu 25 â hae moc irec ŋiczi fâuckerâ rârâsi kosa epie hae tâtieocmu. 26 Â Sataŋzi fâuckerâ Sataŋ qa jâpec ecnekacko sâcne mi sanaŋkeocmu, e omaeocmu hâcne. 27 Me mozi ŋic momori moc ŋeha ficticnao ferâ mafa jâoc roocmu? I aricne, ŋic momori qanaŋ hâporâ me kikene qarâ ie mafa‐ticne jâoc rozo. 28 No jâmbomac ŋazape: Sâqocne fuŋne fuŋne irec kiŋ i bebehene fokac, â dâŋ simbiŋne fuŋne fuŋne irec kiŋ i wâc bebehene fokac. 29 Â ŋic moczi Tiri Mâro ʒaubac ecneocmu ere kiŋ ine bebehene mi fokac, i aricne jâmbâŋ, e kiŋ tatarane tâmiric hotâckekac hâcne.” 30 Dâŋ i ere kecʒiŋuc mumbiŋte jazawec: “Maŋticnao demoŋ huwec jukac.” Mar 3:22
Jesure neŋgoc ɋafâc
(Mat 12:46–50; Luk 8:19–21)
31 Dâŋ iŋuc jazahame neŋgoc ɋafâc‐ticne fisirâ hae ʒoŋao domahuc jaŋerao wahaocte dâŋ mupie fewec. 32 Eme Jesu e ŋicŋondeŋko ŋehame ʒiŋuc âzâcnembiŋ: “Neŋgoc qo ɋafâcge juwic domahuc hefârecguŋgopieŋ.” 33 Mupie ʒiŋuc jazawec: “Neŋgoc ɋafâc‐nane weni jaŋe?” 34 Iŋuc murâ ŋic orâŋkerâ ŋembiŋ jaŋerao ʒâŋe fihuc muwec, “Neŋgoc ɋafâc‐nane ʒi. 35 Anuture mic reŋkeeŋgopieŋ jaŋe hâcne neŋgoc qo ɋafâc‐nane.”