1 Ya Theophilus e:✡Lk 1.1–4

Nai ouresi bura reyaka bukari bi Iesu yaku beika resi oteimagi kora regamo mironari bura reyaka. 2 Mina bi ini ouresi moimai reyo medari gutuna bosi mamo Sei yaku omari afei boyo medari. Oma odorori dadina koderi bi Vima kikifa di vava dudu ini ago gira ini vo niyo mina nifeidena vene rofu nimaro. 3 Ini esika esika moiyo fufutari, bi vegu nisi ari yokoi yokoiri meda 40 ideri ini vene rofu baesi ogau nigamo. Rama iniye baesi ogau nigamo dada mina vegamadiri, bi mokei anua de reyadi; rama ina bi dudusa vegu nisi ina vene rofu Sei di ourefeidena amena sana di vegu mina nioteimagamo. 4 Ma inasa vakoi gogo amegamadiri*vakoi gogo amegamadiri; o iruku irigamadiri., bi ini ago gira masi niyo: “Jerusalem ri ga ferefa kumo, ye na yaku ya nigamaka kana, nai Baba yaku beika nitore reyo bi ya mago vo nigamo mina tua refa.✡Lk 24.49 5 Adina bi, John bi koru dudu ya babatiso reyo, idu meda tau koina koderi bi Vima kikifa dudu babatiso rego.”✡Mt 3.11; Mk 1.8; Lk 3.16; Jn 1.33

6 Ma nifeidena vene yaku Iesu sa egogo regasa nikaitegamadi, “Varika amiye, gua yomina medari Israel vene vava magiya ma ini gagani dudusa ourefeidegedi ba de?”

7 Ma niyo, “Baba ini vava iniye dudu ari ma meda aedo, idu ya bi mina ari ma meda ya toto. 8 Idu Vima kikifa yaku ya vene fafau desi vava ya mago. Ma Jerusalem ri, Judea ma Samaria gagani tauri ma mina kono tora noibanu di gagani maike torari ka nai roka ninegau regedi.”✡Mt 28.19; Mk 16.15; Lk 24.47–48 9 Mina ago ni vau reyo ma neyadiri, Sei yaku omari afei boyo ma seuya yaku fono reyo dada de veyadi.✡Mk 16.19; Lk 24.50–51

10 Omari boyo sana mina toga vegasa amegamadiri, bi evade amiye remanu varuka feyo akuyadi ina vene atafu are reyadi. 11 Resi mina amiye remanu yaku niyadi, “Galilee vene, beika resi minari are resi oma odoro ne rededi? Mina Iesu, kaere Sei yaku ya vene rofu omari afei boyo bi mina ida ya veyadi mina maka dudu omari dairi dego.”

12 Kamini nifeidena vene bi omuna ini roka bi Olive yabo di ikari gutuna Jerusalem ri dairi boyadi. Mina omuna gutuna Jerusalem bona bi Sabati meda yokoi makari nana rena di maike kana.†Sabati meda yokoi makari nana rena di maike kana: Mina bi kilometre yokoi kana. Mina bi Jew vene Sabati meda di nana rena ago gira dada. 13 Jerusalem ri dui reyadiri, bi ini amededi daiyuturi boyadi. Mina bi Peter, John, James, Andrew, Philip, Thomas, Bartholomew, Matthew, Alphaeus di mida James, zealot amiye Simon, ma James di mida Judas.✡Mt 10.2–4; Mk 3.16–19; Lk 6.14–16 14 Ina vene tau vakoi uka yokoi maka dudu egogo regasa toga toga usa usa nigamadi. Rema be ka ina venesa egogo regamadi; minari bi Mary, kaere bi Iesu di nono, ma ini dubuiyaka.

15 Mina ariri, Peter yaku dadisi mina usika ourena‡usika ourena; bura bedakai usi dina nufa. vene di utari are reyo. (Ina vene tau egogo reyadi bi 120 kana.) Niyo, 16 “Usika ourena vene, Sei di agori beika bura reyadi mina rama niyo bi Vima kikifa yaku David di venari Judas rofu niyo kana: Ina yaku Iesu moi gira reyadi vene moi ourefeideyo. 17 Judas ka uni amiye yokoi, adina Iesu ina rofu uni moimairi mokeyo dada.”

18 Ini mokena rorobo de fore dudu bi kono kefuka yokoi voi reyo; ye minari keto resi muyeyori, bi ini uka uesi reyo ma ini diyekuki rausi reyo.✡Mt 27.3–8 19 Jerusalem amiye tau mina vegu neideyadi, ye ini ago iniye dudu mina kono roka niyadi bi Akeldama, ini adina bi “Dava Kono”.

20 “Adina Psalms bukari bi sena bura reyadi:✡Ps 69.25; 109.8

21-22 “Mina dada amiye yokoi kaere ari tauri una tau vakoi egogo reyafa ma Varika amiye Iesu unasa diga bogamafa bi Varika amiye Iesu di dadi rae rena di sina niogau rena amiye kana unasa niyaine: John di babatiso rena di ago ogau niyo§John di babatiso rena di ago ogau niyo; o John ina rofu babatiso reyo. di ari gutuna Sei yaku Iesu omari afei boyo di meda rofu.”✡Mt 3.16; Mk 1.9; 16.19; Lk 3.21; 24.51

23 Mina dada amiye remanu nivabi reyadi: Joseph, kaere bi ini roka nigamadi bi Barsabbas (ma ini roka yokoi ka bi Justus), ma amiye yokoi bi Matthias. 24 Ye usa usa niyadi, “Varika amiye, ya ya diba amiye tau di uka di mokena. Mina dada, una oteima, mina amiye remanuri bi kaere moiyo, 25 adina oteimana moimai rego dada. Adina bi Judas ini moimai feresi ini amena sanari diyo.” 26 Resi bi mina amiye remanu di roka bura resi laki dudu isira rena kana resi ini roka maina reyadi. Roka moiyadi bi Matthias. Ye ina bi mina nifeidena vene 11 di rafuri boi dui reyo.