2
Vima kikifa di dena
Pentecost di irakuna di meda okiyori, ina vene tau bi egogo resi sana yokoi makari ameyadi. Lev 23.15–21; Deut 16.9–11 Kamini minari maka oma odorori kukuroka yokoi aura tora baedo kana bi baesi ini amegamadi yava noibanu vata baeyo. Ma minari bi ita afiye kana fairo resi urafo resi amiye yokoi yokoi odorori ameyadi mina veyadi. Vima kikifa yaku mina vene tau di roaita vata baeyo dada gokai magamo kana ina vene bi gagani be vene di ago nigamadi.
Mina ariri Jew vene bi Jerusalem ri amegamadi, gagani gagani tau noibanu kono tora noibanu vene kaere bi Sei rofu nivakegamadi. Mina kukuroka neideyadiri, bi amiye tau gade iniye egogo resi ini vima diyadi, adina bi ina vene iniye ini ago neinei dudu ago nigamadi mina neideyadi. Ina vene ini mokena forovai rei vau resi niyadi, “Gua mina vene bi Galilee vene, ba? Gokai resi bi una tau vakoi neidesifa uniye uni gagani ago neinei nidedi bi? Una bi Parthia vene, Media vene, Elam vene; ma Mesopotamia, Judea ma Cappadocia, Pontus ma Asia rofu vene; 10 ma Phrygia ma Pamphylia, Egypt ma Libya gagani rautu rautu, Cyrene taoni atafu rofu vene. Ma una be bi Rome rofu vene, 11 ma be bi Jew vene ma be bi Jew vene de kaere bi Jew vene di Sei nivakena vegu usi didedi; ma una be bi Crete vene ma Arab vene—idu mina vene bi Sei yaku beika vegu buni reyo bi uniye uni ago neinei dudu nidedi ma neidesifa!” 12 Tururu resi mokena forovai dudu iniye iniye nikaitegasa niyadi, “Mina ini adina bi beika?”
13 Be yaku ina vene rofu ni moi ninika nigasa nigamadi, “Mina vene bi waini ruaka tau gade iriyadi!”
Peter di sina
14 Kamini Peter dadisi ini nifeidena vene 11 sa are resi ago ni tora resi mina amiye tau rofu niyo, “Judea vene ma ya kaere Jerusalem ri amededi vene, nai ago nigida neidefo gua yomina vegu vededi di adina rama iniye bi beika. 15 Yomina vene bi waini de irisi ada forovai de reyadi, yi mokededi kana. Ari uveyori meda nemoko bi 9:00 maka dada.* Ari uveyori meda nemoko bi 9:00 maka dada: Peter ago kana niyo adina Jew vene di vegu kana uriyaku gorogoro ari uveyori, bi iruku ma koru de irigamadi. 16 Idu mina vegu vededi bi Sei di ago niyo amiye Joel yaku ini sena niyo kana:
17 ‘Sei yaku nido ari boi koina nibigediri, bi yomakai regida: Joel 2.28–32
Amiye tau fafau nai Vima moi rausi regida.
Yi rumana mida mida ma rema mida mida yaku Sei di ago niokugedi;
yi godua vene yaku yaduka kana vegedi,
ma yi ugava vene yaku bi yaduka vegedi.
18 Ka nai moimai rei tavoi rededi rema ma rumana fafau
mirona medari nai Vima rausi regida,
ma ina vene yaku Sei di ago niokugedi.
19 Oma odorori mokena vegu resi
kono fafau ka rebe regida.
Bi dava, ita ma iroka tora ogau nigo;
20 meda bi baesi mukuna nigo,
ma eyo bi dava kana kaka nigo,
mina bi Varika amiye di meda tora ma buni tora gade baesi okina kode.
21 Ye kaere yaku Varika amiye di roka raka nigo bi moi vegu rigo.’
22 “Israel vene, mina ago neidefo: Sei yaku ya vene rofu Iesu Nazareth amiye nifeidesi mokena vegu ma rebe vegu ya vene di tobori ini vana dudu regamo, ye ya ka ya diba. 23 Sei yaku ini mokena dudu bi sena yo niyo, Iesu ya vene di vanari aego bi; ye ya vene yaku vegu no vene di vanari aegedi ma sataurori ikoko regedi di. Mt 27.35; Mk 15.24; Lk 23.33; Jn 19.18 24 Idu Sei yaku muyenari gutuna moi dadisi muyena di esika esika rofu youneyo, adina muyena yaku moi gira regi anua rego. Mt 28.5–6; Mk 16.6; Lk 24.5 25 Adina David ina rofu yomakai niyo: Ps 16.8–11
‘Ari neinei Varika amiye bi nai neri maka vegamaka;
ina bi na vana rama atafu amedo, dada toe yaku na moi forovai de rego.
26 Mina dada nai uka bi ada redo,
ma ada dudu nivakena sina nigamaka.
Na bi amiye maka, amiye tau kana,
ye Sei ini beika rego na rofu mina ini uka mokena tua regasa amego,
27 adina bi muyena vene di amena sanari nai vima de feregiya;
ma yi moimai rei tavoi redo amiye kikifa de feregiya ma guri ideri iko de nigo.
28 Vegu rofu boyo ida bi na oteimaro,
na ada iniye reida ya nasa ameisa dada.’
29 “Nai usika ourena, uni tutubena David di sina rama bi ya vene rofu nigida. David muyeyo ma guri aeyadi, ma ini guri aeyadi sana bi gua mini unasa amedo. 30 Adina bi Sei di ago niyo amiye, ina diba Sei yaku ina rofu ini ago nitore reyo bi David di tutubena yokoi ourefeidego, David yaku ourefeideyo kana. 2 Sam 7.12–13; Ps 132.11 31 David bi sena veyo Keriso dadi rae rego sina yomakai niyo:
‘Sei yaku muyena vene di amena sanari de fereyo;
ma ini roaita ka iko de niyo.’
32 Sei yaku sena mina Iesu moi dadiyo, ma una tau noibanu yaku mina beika vata niyo vegu veyafa. 33 Mina dada Sei, ini Baba, yaku ini vana rama rofu moi dadisi ina rofu Vima kikifa maro, ini nitore rena ago kana. Dada gua beika vegasa neidededi bi una mago vo niyo kana mini una fafau moi rausi reyo. 34 Adina bi David iniye omari de boyo, idu iniye yomakai niyo: Ps 110.1
‘Varika amiye yaku nai Varika amiye rofu niyo:
Nai vana rama eta rofu ameinu re
35 bogo na yaku yi tuma vene yi yuka aena sana kana rigida mamo.’
36 “Mina dada Israel vene tau rama iniye vei mama reyainedi mina Iesu, kaere bi satauro ikoko reyadi, bi Sei yaku moi Varika amiye ma Keriso riyo!”
37 Amiye yaku mina sina neideyadiri, bi ini uka okuna iniye reyo, dada Peter ma nifeidena vene be nikaitesi niyadi, “Usika ourena vene, beika regifa?”
38 Ma Peter yaku ina vene rofu niyo, “Ya tau noibanu yi vegu no feresi moi etagae risi Iesu Keriso di roka dudu babatiso moiyagane ye Sei yaku yi vegu no koite makugo; ma Vima kikifa moigedi, kaere bi Sei yaku una mago vo niyo. 39 Adina Sei yaku nitore reyo sina bi ya yi midasa rofu niyo, ma kaere gagani maike amededi vene rofu ka—amiye tau kaere Varika amiye uni Sei yaku ina rofu raka nigo mina.”
40 Sina tau dudu Peter yaku ina vene rofu nisi toga toga ni yeiva regasa nigamo, “Gua yomina vegu no rededi vene di kaunava iniye moi vegu rifa!” 41 Ye amiye kaere Bura bedakai ka ada dudu nufa. ini ago moi rama aeyadi bi babatiso reyadi; mina ariri amiye 3,000 kana ini rafuri dui reyadi. 42 Ari neinei egogo resi nifeidena vene di sina neidegasa usa usa nigasa ma iruku irigasa auta regamadi.
Mokena vari gira aeyadi vene di vegu amena
43 Nifeidena vene dudu mokena vegu ma rebe tau gade regamadiri, bi amiye tau vakoi Sei rofu toga toga ori regamadi. 44 Ma Iesu rofu mokena vari gira aeyadi vene tau vakoi egogo resi ini gugura fore iniye iniye rau regamadi. Acts 4.32–35 45 Ini gugura fore ma kono sero resi ini mokegamadi kana mina fore amiye tau rofu rau regamadi. 46 Ari neinei, rafu yokoi maka dudu Sei nivakena yavari egogo resi ini yava neineiri ada rena dudu ma mokena yokoi maka dudu iruku irigamadi, 47 Sei rofu nivakegamadi ma amiye tau vakoi ina vene rofu uka ada regamadi. Ari neinei Varika amiye yaku moi vegu rigamo vene bi yokoi yokoi ini rafuri moi dui regamo.

2:1: Lev 23.15–21; Deut 16.9–11

*2:15: Ari uveyori meda nemoko bi 9:00 maka dada: Peter ago kana niyo adina Jew vene di vegu kana uriyaku gorogoro ari uveyori, bi iruku ma koru de irigamadi.

2:17: Joel 2.28–32

2:23: Mt 27.35; Mk 15.24; Lk 23.33; Jn 19.18

2:24: Mt 28.5–6; Mk 16.6; Lk 24.5

2:25: Ps 16.8–11

2:30: 2 Sam 7.12–13; Ps 132.11

2:34: Ps 110.1

2:41: Bura bedakai ka ada dudu nufa.

2:44: Acts 4.32–35