5
Koru moka atafuri amiye yokoi moi buni riyo
Mina usi Jew vene yaku irakuna yokoi reyadi ma Iesu bi Jerusalem ri boyo. Jerusalem ri mamoe di ida vena atafuri bi koru moka yokoi ini maravata 5 nufa; Hebrew agori ini roka bi Bethesda.* Bethesda; bura bedakai Bethzatha nufa. Minari bi gauka vene tau gade—ne taufa vene, yuka no vene ma dibo anua vene. Bura bedakai ka 3b–4 nufa: 3b Koru kita reyainedi nari regamadi, 4 adina uru yokoi yokoi Varika amiye di naivo vima yaku desi koru moi kita regamo. Ye koru kita kita regamori, kaere ouresi ina siko negamo bi ini gauka buni nigamadi dada. Mironari bi amiye yokoi kaere bi lagani 38 gauka reyo. Iesu yaku mina amiye varegamo vegasa diba niyo ina bi ari doba tora makai varegamo. Ye nikaiteyo, “Ya ura reisa buni nigiya ba?”
Ma nikabai reyo, “Varika amiye, koru kita redori, koruri na moi nena amiye bi koina, ma dadi negi reidari, amiye yokoi bi sena ina ya siko na ebu resi nedo.”
Kamini ina rofu niyo, “Dadisi yi ekama vanau moisi nana re.” Ye minari maka buni nisi ini ekama moisi nana reyo.
Mina bi Sabati medari ogau niyo, 10 ye Jew vene yaku mina moi buni riyo amiye rofu niyadi, “Gua bi Sabati meda, ma ago gira dudu yi ekama uakaigi bi tabu.” Neh 13.19; Jer 17.21
11 Idu nikabai reyo, “Amiye kaere na moi buni riyo yaku yi ekama moisi nana re na niyo.”
12 Ye nikaiteyadi, “Kaere amiye yaku makai reyainedi ya niyo?”
13 Idu mina buni niyo amiye bi ina toto mina amiye bi kaere, ini adina Iesu bi minari amededi amiye tau gade fogori forovai reyo.
14 Mina usi Sei nivakena yavari baku resi niyo, “Neide, ya bi buni niyo; besa vegu no ga re, de bi beika yokoi no iniye ya rofu vata nigo baebu.”
15 Kamini mina amiye disi Jew vene nioteimaro ina bi Iesu kaere yaku moi buni riyo. 16 Mina resi Jew vene yaku Iesu esika esika maradi, maradi; bura bedakai masi umuyegi di ida maina reyadi nufa. bi Sabati medari mina vegu reyo dada. 17 Idu ina vene rofu niyo, “Nai Baba bi gua toga mina medari moimai redo, ma na ka moimai reida.”
18 Jew vene bi besa umuyegika maina regamadi mina ago dada, adina Sabati meda di ago gira ukero vau reyo maka de, idu ka nigamo Sei bi ini Baba ma mina ago yaku ina bi Sei sa moi yokoi maka riyo.
Mida di vava
19 Mina resi Iesu yaku niyo, “Rama iniye ya nida: Mida yaku inike beika yokoi de rego; ini Baba yaku beika redo, mina vesi maka redo. Adina beika Baba yaku redo bi Mida ka makai redo. 20 Adina Baba yaku ini Mida uka masi ini beika tau gade inike redo mina oteimado. Ina yaku ka beika tora tora reyainedi oteimago, ye ya vene tururu regedi dada. 21 Baba yaku muyena edadisi ini vegu mado kana, Mida ka ini ura dudu kaere vegu mago vo nido bi mado. 22 Ye Baba ka amiye yokoi de kota redo, idu mina kota rena vava bi ini Mida maro, 23 ye amiye tau gade ini Mida kikifa regedi, Baba rofu rededi kana. Amiye kaere ini Mida kikifa de redo, bi Baba kaere nifeideyo ina ka kikifa de redo.
24 “Rama iniye ya nida: kaere nai ago neidesi na nifeideyo amiye rofu mokena vari gira aego, bi toga toga ameibobina vegu baku rego. Bi kota de rego, idu bi muyena feresi vegu rofu orefaro. 25 Rama iniye ya nida: meda nemoko baego; rama bi sena okiyo—muyena vene yaku Sei di mida di goroka neidegedi, ye kaere neidededi bi vegu nigedi. 26 Ye Baba iniye bi vegu di adina kana, makai ini Mida ka bi vegu di adina risi 27 kota regi di vava maro, bi Amiye di mida dada. 28 Mina rofu tururu ga refa, adina ini meda nemoko baego, guri aeyadi muyena vene tau gade yaku ini goroka neidesi 29 ini guri gutuna dadi rae regediri: kaere vegu buni reyadi vene bi dadisi veguri amegedi, ma kaere vegu no reyadi vene bi dadigedi ma kota regedi. Dan 12.2
Iesu di ago ninegau reyadi vene
30 “Na kaya di vava dudu bi beika yokoi de regida; Sei yaku beika na nido kana makai kota reida, ye nai kota rena bi rama, ini adina na yaku beika regi reida bi na kaya di ura regika de, idu kaere yaku na nifeideyo di ura dudu maka.
31 “Na beika reida mina na kaya maka niokugida vonisi, mina beika nida bi ini rama de nufa. 32 Idu amiye yokoi yaku na beika reida rofu niokudo, ma na diba ina yaku na dada beika nido bi rama. 33 Ya vene yaku John rofu ago moi feideyadi ma ago rama niokuyo. Jn 1.19–27; 3.27–30 34 Idu na beika reida di niogau rena ago bi diya amiye rofu, idu ya vene moi vegu riyainedi rofu mina ago nida. 35 John bi ramefa kana, vaigasa vabara nigamo, ma ari tumu maka ini vabarari ada regi ura reyadi. 36 Nai niogau rena ago yaku John di ago ebu reyo. Adina mina vegu regida di Baba yaku na maro, mina reida ma mina niogau rededi, Baba bi na nifeideyo dada. 37 Ma Baba, kaere na nifeideyo, yaku ka na fafau niokuyo. Ini goroka toga de neidesi ini seira ka toga de veyadi. Mt 3.17; Mk 1.11; Lk 3.22 38 Ma ini ago ka yi uka ideri amena de redo, ini adina nifeideyo amiye rofu mokena vari gira de aededi. 39 Sei di ago vei mama rededi, ya mokededi bi minari toga toga ameibobina vegu baku regedi dada. Ma mina ago maka yaku na fafau niokudedi! 40 Idu vegu moigika na rofu baena bi ura de rededi.
41 “Na bi amiye gutuna nai roka moi odoro rina bi maina de reida. 42 Idu na na diba yi ukari Sei rofu uka mana de rededi. 43 Na bi nai Baba di roka di vava dudu deyaka, idu ya bi de na moiyadi; idu amiye bi iniye di roka di vava dudu soka regori, bi moigedi. 44 Ya bi ya kaya roka moi odoro rina ura rededi, idu ya bi Sei yokoi maka yaku yi roka moi odoro rina bi de maina rededi; makai ye gokai ida dudu na rofu mokena vari gira aegedi? 45 Ga mokefo na yaku nai Baba di nemokori ya tourage regida. Moses, kaere ina rofu uka mokena aeyadi, ina yaku ya tourage rego. 46 Ya Moses rofu mokena vari gira aeyagadu vonisi, bi na rofu mokena vari gira aeyaidu, ini adina bi na dada bura reyo. 47 Idu beika bura reyo rofu mokena vari gira de aeyadiri, ye gokai ida dudu nai ago rofu mokena vari gira aegedi?”

*5:2: Bethesda; bura bedakai Bethzatha nufa.

5:3: Bura bedakai ka 3b–4 nufa: 3b Koru kita reyainedi nari regamadi, 4 adina uru yokoi yokoi Varika amiye di naivo vima yaku desi koru moi kita regamo. Ye koru kita kita regamori, kaere ouresi ina siko negamo bi ini gauka buni nigamadi dada.

5:10: Neh 13.19; Jer 17.21

5:16: maradi; bura bedakai masi umuyegi di ida maina reyadi nufa.

5:29: Dan 12.2

5:33: Jn 1.19–27; 3.27–30

5:37: Mt 3.17; Mk 1.11; Lk 3.22