4
Iesu di uka maina regika niveyo
(Mk 1.12–13; Lk 4.1–13)
1 Mirona ituari Vima kikifa yaku gagani autu sanari Iesu afei boyo ma Bodaka yaku no reyainedi vonisi ini uka maina rena nivegika reyo.✡Heb 2.18; 4.15 2 Meda 40 ri ma urusa 40 ri oyo resi gabi rauna reyo. 3 Ma uka maina regika nivena amiye yaku baesi ina rofu niyo, “Ya bi Sei di Mida vonisi, bi yomina fore ni kumo iruku niyaine.”
4 Idu Iesu yaku nikabai resi niyo, “Sei di agori bura reyo bi, ‘Amiye bi iruku maka dudu de amebigedi, idu ago neinei Sei di vena ma yakudedi dudu maka amebigedi.’ ”✡Deut 8.3
5 Kamini Bodaka yaku Jerusalem taoni kikifari afei bosi Sei nivakena yava tebori moi are resi 6 niyo, “Ya Sei di mida vonisi, ya kaya maku ne, adina Sei di agori bura reyo bi: ✡Ps 91.11–12
‘Sei yaku ini naivo naivo vima ago gira mago ya dada;
ma ini vana dudu ya moi odoro rigedi,
yi yuka foreri de tagi magiya.’ ”
7 Iesu yaku niyo, “Dudusa bura reyo, ‘Varika amiye yi Sei bi ini uka maina regika ga nive.’ ”✡Deut 6.16
8 Bodaka dudusa omuna ika torari afei bosi ourefeidena amena sana tau mina kono tora noibanuri ini buni vayavayasa oteimasi 9 niyo, “Ya na nivakegi efuka meimigiya vonisi, bi mina tau vakoi ya magida.”
10 Kamini nikabai resi niyo, “Satani, na rofu etagae ri,*na rofu etagae ri; bura bedakai na fufutari di nufa. adina yomakai bura reyo, ‘Varika amiye yi Sei nivakesi ina rofu maka naivo re!’ ”✡Deut 6.13
11 Kamini Bodaka feresi diyo ma Sei di naivo naivo vima yaku okisi nari regamadi.
Iesu ago nirausi regi kora reyo
(Mk 1.14–15; Lk 4.14–15)
12 Iesu John Baptist moi gira reyadi mina neidegasa dadi bosi Galilee ri neyo.✡Mt 14.3; Mk 6.17; Lk 3.19–20 13 Nazareth feresi Capernaum taoni moka daidai tora Galilee adinari ameyo, Zebulun ma Naphtali gaganiri.✡Jn 2.12 14 Mina reyo bi beika Sei yaku ini ago niyo amiye Isaiah rofu niyo bi moi rama aegi ma niyo:
15 “Zebulun ma Naphtali gagani✡Is 9.1–2
bi moka daidai tora idari Jordan koru berou eta rofu,
Galilee gaganiri. Ina vene bi tutubena idana vene.
16 Amiye yaku mukunari amededi
bi vabara tora veyadi.
Ma mukuna kono ma muyena sanari amededi vene
ina fafau bi vabara maro.”
17 Ye mirona ituari mamo Iesu ago nirausi regi kora resi niyo, “Yi vegu no feresi moi etagae rifa, Sei di ourefeidena amena sana omari bi atafu okiyo dada.”✡Mt 3.2
Iesu oyena rutu vene 4 raka niyo
(Mk 1.14–20; Lk 5.1–11)
18 Iesu Galilee moka daidai tora seriri nana digasa uba dubuisa veyo, Simon (Peter vo niyadi) ma ini usika Andrew, kaere bi koruri fate makugamadi, adina bi oyena rutu vene. 19 Iesu yaku ina vene rofu niyo, “Na usi baefa ma oyena koda rena kana amiye nirutu rena ya rigida.” 20 Minari maka ini fate feresi usi diyadi.
21 Minari bogasa bi uba dubuisa James ma John, Zebedee di mida veyo. Ina yaku ini babasa bouti fafau fate veika regamadi. Iesu yaku raka niyori, 22 bi evade ini baba ma ini bouti feresi usi boyadi.
Iesu yaku oteimasi ago nirausi resi gauka moi buni riyo
(Lk 6.17–19)
23 Ye Iesu Galilee gagani tau vakoiri ini usa usa yavari disi oteimasi Sei di ourefeidena amena sana di ago buni nirausi resi gauka tau amiye utari moi buni rigamo.✡Mt 9.35; Mk 1.39 24 Ye ini beika regamo sina bi Syria gagani torari okuyo, ye mina vene ka ini gauka reyadi vene, esika reyadi vene, yuka vana kevo vene, ini roaitari vima no nufa vene, ma ada gauka vene afei baeyadi—ma Iesu yaku moi buni riyo. 25 Amiye tau gade Galilee, Decapolis (taoni 10), Jerusalem, Judea gagani, ma Jordan koru di berou eta rofu gutuna dadisi Iesu usi boyadi.