19
Iesu yaku rema mesi ferena di ago oteimaro
(Mk 10.1–12)
Kamini Iesu mina sina nigamo koina niyori, Galilee feresi Jordan koru di berou eta rofu Judea gaganiri boi neyo. Ye amiye tau gade ina usi boyadi ma mironari moi buni riyo.
Ye Pharisee vene ini uka maina regika nivegi ina rofu baesi nikaiteyadi, “Rumana yaku ini rema mesi ferego bi ago gira ukero vau rido ba ide, deda vegu o mokena dada?”
Ma Iesu nikabai reyo, “Bura be veyadi ba, ini adinari gutuna Riyo amiye yaku bi rema ma rumana riyo? Gen 1.27; 5.2 Ka niyo, ‘Mina dada rumana ini nono baba feresi etagae rigo ini remasa roaita gogo nigedi.’* rumana ini nono baba feresi...: Mina bi Jew vene di toutou kana. Gen 2.24 Ye ina bi dudusa remanu de, idu yokoi maka nigedi. Mina dada beika Sei yaku moi gogo resi moi yokoi maka riyo, bi amiye yaku ga moi etagae riyagane.”
Ye nikaiteyadi, “Ye beika resi Moses bi rumana yaku ini rema ferena fefa masi nifeideyainedi mina ago gira maro?” Deut 24.1–4; Mt 5.31
Ma nikabai reyo, “Moses yaku bi yi rema nifeidefo vo niyo, ini adina yi uka gira kiki dada. Idu ini adinari gutuna bi makai de. Idu ya nida kaere amiye ini rema koa de reyo ma ina yaku nifeidesi rema bouna mego, bi koa rego.” Mt 5.32; 1 Cor 7.10–11
10 Ini usi dina vene yaku niyadi, “Rema rumana di ida bi makai vonisi, bi mena de rebigedi bi buni.”
11 Ye nikabai reyo, “Mina ago bi amiye tau yaku bi de moigedi, idu kaere maro vene yaku maka. 12 Adina rumana be bi mena anua rededi, adina be bi makai vata niyadi dada; be bi makai amiye riyadi dada; ma be bi makai iniye riyadi, Sei di ourefeidena amena sana oma rofu dada. Kaere mina ago neidegasa moigo vonisi, buni bi moiyaine.”
Iesu mida keika keika buni tora gade maro
(Mk 10.13–16; Lk 18.15–17)
13 Mina ituari be vene yaku mida keika keika ina rofu afei baeyadi, ini vana ina fafau aesi usa usa niyainedi dada, idu ini usi dina vene yaku nivaiyadi. 14 Idu niyo, “Mida keika keika bi ferefo kumo na rofu baeyagane; ga meki refo, adina Sei di ourefeidena amena sana omari bi mina kana vene di.”
15 Ye ini vana ina fafau aesi mina sana feresi diyo.
Amiye ruaka gugura tau nufa
(Mk 10.17–31; Lk 18.18–30)
16 Ma amiye yokoi ina rofu baesi nikaiteyo, “Oteimana amiye, Bura bedakai ka buni nufa. beika vegu buni regida bi toga toga ameibobina vegu moigida?”
17 Ma Iesu yaku niyo, “Beika resi buni vo nigasa na nikaiteisa? vo nigasa na nikaiteisa bura bedakai na vo nisa nufa. Amiye yokoi maka bi buni.§ maka bi buni; bura bedakai de bi buni; Sei maka bi buni nufa. Ya ura reisa mina vegu buni dui regiya vonisi, bi ago gira neidegasa rebi.”
18 Ma nikaiteyo, “Goina?” Ex 20.13–16; Deut 5.17–20
Ye nikabai reyo, “Amiye umuyena ga re; koa ga re; duma duma ga re; amiye di vegu fafau ofa ofa ago ga ni; 19 yi nono baba emagui re; ma ya kaya uka maisa kana, yi atafu amedo amiye uka ma.” Ex 20.12; Lev 19.18; Deut 5.16
20 Mina godua yaku niyo, “Mina kana vegu ago tau vakoi** Bura bedakai ka na bi keika gutuna nufa. neidegamaka, ye goina be bi regida?”
21 Ma nikabai reyo, “Ya ura rorobo iniye nigiya vonisi, bosi yi gugura sero resi ini fore irava vene masi yi gugura buni bi omari baku regiya, ye na usi bae.”
22 Idu mina godua mina ago neidesi ini uka yarena iniye reyo ma dadisi diyo, adina ina bi gugura tau gade nufa.
23 Ye ini usi dina vene rofu niyo, “Rama ya nida: gugura tau gade amiye yaku Sei di ourefeidena amena sana omari dui rena bi gira iniye. 24 Dudusa nida: kamelo yaku niduru nemokori dui rego bi aita, idu gugura tau gade amiye yaku Sei di ourefeidena amena sanari dui rena bi gira iniye.”
25 Ye ini usi dina vene mina ago neidegasa tururu iniye resi nikaiteyadi, “Makai bi kaere moi vegu rigo?”
26 Ma vesi niyo, “Amiye yaku mina bi anua regedi, idu Sei rofu tau noibanu rena bi aita iniye.”
27 Kamini Peter nikabai reyo, “Ve kumo, uni beika baika tau vakoi feresi ya usi diyafa! Ye bi beika moigifa?”
28 Ma Iesu yaku ina vene rofu niyo, “Rama ya nida, kono beika tau moi ruaka rigedi medari, Amiye di mida ini vabara di ourefeidena amena fata fafau ameinu regori, ya kaere na usi diyadi ka makai ourefeidena amena fata 12 fafau ameinu resi Israel vene di rubu 12 ourefeidegedi. Mt 25.31; Lk 22.30 29 Ma kaere ini yava o usika ourena, o nono baba,†† Bura bedakai ka o rema nufa. o mida, o kono nai roka dada fereyadi, bi tau 100 kana besa ma toga toga ameibobina vegu moigo. 30 Idu amiye tau gade kaere bi ourededi vene bi gabi nigedi, ma gabi nidedi vene yaku ouregedi. Mt 20.16; Lk 13.30

19:4: Gen 1.27; 5.2

*19:5: rumana ini nono baba feresi...: Mina bi Jew vene di toutou kana.

19:5: Gen 2.24

19:7: Deut 24.1–4; Mt 5.31

19:9: Mt 5.32; 1 Cor 7.10–11

19:16: Bura bedakai ka buni nufa.

19:17: vo nigasa na nikaiteisa bura bedakai na vo nisa nufa.

§19:17: maka bi buni; bura bedakai de bi buni; Sei maka bi buni nufa.

19:18: Ex 20.13–16; Deut 5.17–20

19:19: Ex 20.12; Lev 19.18; Deut 5.16

**19:20: Bura bedakai ka na bi keika gutuna nufa.

19:28: Mt 25.31; Lk 22.30

††19:29: Bura bedakai ka o rema nufa.

19:30: Mt 20.16; Lk 13.30