10
Iesu yaku rema mesi ferena di ago oteimaro
(Mt 19.1–12; Lk 16.18)
Kamini minari feresi Jordan koru di berou eta rofu Judea gaganiri boi neyo, ma amiye tau gade dudusa egogo reyadi, ye ini vegu kana dudusa nioteimagamo.
Ye Pharisee vene ini uka maina regika nivegi ina rofu baesi nikaiteyadi, “Rumana yaku ini rema mesi ferego bi ago gira ukero vau rido ba ide?”
Ma nikabai reyo, “Moses bi beika ago gira ya maro?”
Ma ina yaku niyadi, “Moses bi ago ni diyo bi rema ferena fefa bura resi nifeideyainedi.” Deut 24.1–4; Mt 5.31
Ma niyo, “Yi uka gira kiki dada, bi ya rofu mina ago gira bura reyo. Idu ini adinari gutuna beika baika riyori, ‘Sei yaku bi rema ma rumana riyo.’ Gen 1.27; 5.2 ‘Mina dada rumana ini nono baba feresi* ini nono baba feresi...: Mina bi Jew vene di toutou kana. etagae riyo, ini remasa roaita gogo nigedi.’ ini remasa roaita gogo nigedi; bura bedakai mina ago nufa de. Gen 2.24 Ye ina bi dudusa remanu de, idu ‘yokoi maka nigedi.’ Mina dada beika Sei yaku moi gogo resi moi yokoi maka riyo, bi amiye yaku ga moi etagae riyagane.”
10 Ye, mina yavari amegamadiri, Iesu di usi dina vene yaku dudusa nikaiteyadi, mina ago di adina dada. 11 Niyo, “Kaere amiye ini rema nifeidesi rema bouna mego, bi koa rego, mina rema bouna dada. Mt 5.32; 1 Cor 7.10–11 12 Ma rema yaku ini rumana ka nifeidesi rumana bouna mego vonisi, ina bi koa rego.”
Iesu mida keika keika buni tora gade maro
(Mt 19.13–15; Lk 18.15–17)
13 Kamini be vene yaku ina rofu mida keika keika afei baeyadi bi avaka moiyainedi, idu ini usi dina vene yaku nivaiyadi. 14 Ye Iesu mina veyori, gubuyo resi niyo, “Mida keika keika bi ferefo kumo na rofu baeyagane; ga meki refo, adina Sei di ourefeidena amena sana bi mina kana vene di. 15 Rama ya nida, kaere amiye yaku Sei di ourefeidena amena sana mida keika kana de moigo vonisi, bi de iniye iniye dui rego.” Mt 18.3 16 Ye mida keika keika binu masi ini vana ina vene fafau aegasa buni tora gade maro.
Amiye gugura tau nufa
(Mt 19.16–30; Lk 18.18–30)
17 Kamini bi ida nana regamori, amiye yokoi raga bosi ini budari efuka meimisi usa niyo, “Oteimana amiye buni, beika regida bi toga toga ameibobina vegu moigida?”
18 Ma Iesu yaku niyo, “Beika resi na rofu bi buni vo nisa? Amiye yokoi bi buni de; Sei iniye maka bi buni. 19 Ya ya diba ago gira di ago bi: ‘Amiye umuyena ga re; koa ga re; duma duma ga re; amiye di vegu fafau ofa ofa ago ga ni; amiye rofu moi ofa nina ga re; yi nono baba emagui re.’ ” Ex 20.12–16; Deut 5.16–20
20 Ye mina amiye yaku niyo, “Oteimana amiye, na keikari gutuna mina kana vegu ago tau vakoi moi gira rei baeda.”
21 Ma vegasa uka masi niyo, “Yokoi maka bi de reyo; bosi yi gugura tau mina sero resi fore bi irava vene ma, yi gugura buni bi omari baku regiya; na usi bae.” 22 Idu mina ago rofu mokei toe reyori, bi ini uka yarena iniye reyo, adina ina bi gugura tau gade nufa.
23 Iesu bi ne kero resi ini usi dina vene rofu niyo, “Gugura tau gade nufa vene yaku Sei di ourefeidena amena sanari dui rena bi gira iniye!”
24 Ini usi dina vene bi ini agori tururu reyadi. Idu bi dudusa niyo, “Mida mida, Bura bedakai ka gugura tau rofu mokena vari gira aededi vene bi nufa. Sei di ourefeidena amena sanari dui rena bi gira iniye! 25 Kamelo yaku niduru nemokori dui rego bi aita, idu gugura tau gade nufa amiye yaku Sei di ourefeidena amena sanari dui rena bi gira iniye.”
26 Ye mina ago rofu besa tururu iniye resi iniye iniye niyadi, “Kamini kaere moi vegu rigo?”
27 Ma vesi niyo, “Amiye yaku anua regedi, idu Sei rofu bi de; ina rofu tau rena bi aita iniye.”
28 Kamini Peter ina rofu nigi kora reyo, “Ve kumo, uni beika baika tau vakoi feresi ya usi diyafa.”
29 Iesu yaku niyo, “Rama ya nida, amiye yokoi yaku ini yava, o usika ourena, o nono baba,§ Bura bedakai ka o rema, nufa. o mida o kono na dada ma ago buni dada fereyo vonisi, 30 bi gua 100 kana tau besa ini yava, ma usika ourena, ma nono, ma mida, ma kono, ka esika esika moigo. Ma gabi mina meda baegori, toga toga ameibobina vegu moigo. 31 Idu amiye tau gade kaere bi ourededi, bi gabi nigedi, ma gabi nidedi vene yaku ouregedi.” Mt 20.16; Lk 13.30
Iesu dudusa uru regode ini muyena niokuyo
(Mt 20.17–19; Lk 18.31–34)
32 Kamini ini usi dina venesa Jerusalem bogamadiri, Iesu bi oureyo, ma ini usi dina vene bi tururu reyadi ma kaere usi diyadi vene ka ori reyadi. Dudusa ini amiye 12 moi gaima risi beika ina rofu vata nigo mina niyo. 33 Resi niyo, “Una bi Jerusalem bogifa, ma Amiye di mida siri resi Sei ma amiye utari naivo vene di varika vene ma ago gira oteimana vene rofu magedi. Ina vene yaku kota regedi bi muyeyaine, ma tutubena idana vene rofu magedi umuyegedi dada. 34 Ina rofu nikurusi ayaka su resi umuyegedi. Idu gabi meda regoderi, dudusa dadi rae rego.”
John ma James di usa nina
(Mt 20.20–28)
35 Kamini James ma John, Zebedee di mida mida, ina rofu baesi niyadi, “Oteimana amiye, uni ura bi beika ya rofu usa nigifa bi una rofu re.”
36 Ma nikaiteyo, “Ya ura rededi bi beika ya rofu regida?”
37 Ma nikabai reyadi, “Yi vabarari una yokoi bi yi vana rama rofu aesi yokoi bi yi enana rofu aegiya.”
38 Idu Iesu yaku niyo, “Ya beika usa nidedi bi ya ya toto. Na biyori irigida o babatiso rego, mina kana regedi ba?” Lk 12.50
39 Ye nikabai reyadi, “Mina bi buni regifa.”
Ma niyo, “Na biyori irisi babatiso regida, mina kana ya irisi babatiso regedi. 40 Idu nai vana rama rofu o enana rofu ameinu rena di vava bi na yaku de ya magida, idu mina bi kaere kaere dogo reyo vene di.”
41 Ye amiye 10 mina neidesi bi James ma John rofu gubuyo reyadi. 42 Ma Iesu yaku raka nisi niegogo resi niyo, “Ya ya diba tutubena idana vene di ourefeidena vene, kaere vei mama rededi, yaku amiye fafau ini vava moi raga rededi; ma ini tora vene yaku ini vava dudu beika vegu rigedi, amiye ini gabireri ago gira nidedi. Lk 22.25–26 43 Ye yi fogori bi makai de, idu kaere yi fogori ini ura tora nigo vonisi, bi yi naivo rena amiye nigo. Mt 23.11; Mk 9.35; Lk 22.26 44 Ma kaere yi fogori ya ouregi ura redo, bi amiye tau vakoi di moimai rei tavoi redo amiye nigo. 45 Adina Amiye di mida ka deyo, diya amiye naivo reyaganedi, idu bi amiye naivo regi ma ini vegu magi, amiye tau di vegu no reyadi voi regika.”
Iesu yaku ne taufa amiye ini roka Bartimaeus moi buni riyo
(Mt 20.29–34; Lk 18.35–43)
46 Kamini Jericho taoniri okiyadi. Ye Iesu ma ini usi dina vene ma amiye tau gade minari gutuna feregamadiri, ne taufa amiye roka Bartimaeus bi ida atafu amegamo. Ina bi Tameus di mida, kaere bi usa nigamo amiye. 47 Ye neideyo bi Iesu Nazareth amiye bi mini, kamini raka nigi kora resi niyo, “Iesu, David di tutubena, na iriyeduka re!”
48 Emaradi babo niyaine vo niyadi, idu besa raka niyo, “David di tutubena, na iriyeduka re!”
49 Ye Iesu are resi niyo, “Raka nifa.”
Ma ne taufa amiye raka nisi niyadi, “Uka gira nisi are rei gira re! Ina bi ya raka nido.”
50 Ye ini bou varuka makusi dadisi are resi Iesu urana reyo.
51 Iesu yaku nikaiteyo, “Ya ura reisa bi beika ya rofu regida?”
“Oteimana amiye, na ura reida bi dudusa gagani vegida.”
52 Ma ina rofu niyo, “Di, yi mokena vari gira aena yaku ya moi buni riyo.”
Ma evade maka, dudusa gagani vesi Iesu usi idama boyo.

10:4: Deut 24.1–4; Mt 5.31

10:6: Gen 1.27; 5.2

*10:7: ini nono baba feresi...: Mina bi Jew vene di toutou kana.

10:7: ini remasa roaita gogo nigedi; bura bedakai mina ago nufa de.

10:7: Gen 2.24

10:11: Mt 5.32; 1 Cor 7.10–11

10:15: Mt 18.3

10:19: Ex 20.12–16; Deut 5.16–20

10:24: Bura bedakai ka gugura tau rofu mokena vari gira aededi vene bi nufa.

§10:29: Bura bedakai ka o rema, nufa.

10:31: Mt 20.16; Lk 13.30

10:38: Lk 12.50

10:42: Lk 22.25–26

10:43: Mt 23.11; Mk 9.35; Lk 22.26