1 Kamini to gokaisanu moigika yukana kana kodu yokoi na masi*masi; bura bedakai maro ma naivo naivo vima yaku nufa. niyo, “Dadi Sei nivakena yava ma ori sisika rena fore fata, ini doba gokaisanu mina kodu dudu, to moisi ini ideri, Sei nivakededi vene gokaisanu duaiya re,✡Ezek 40.3; Zech 2.1–2 2 idu Sei nivakena yava di ida nefau feresi ini doba ga moi, adina bi gagani gagani vene rofu maro ma mina taoni kikifa bi eyo 42 ri ini yuka dudu dagu magedi.✡Lk 21.24 3 Resi nai niokuna amiye remanu vava magida, ye meda 1,260 ri guruo amena kana, varuka akugasa Sei di ago nigedi.”

4 Mina amiye remanu bi olive yabo remanu, ma ramefa ini amedo sana remanu mina bi kono ourefeidedo Varika amiye†Varika amiye; bura bedakai Sei nufa. di budari are rededi.✡Zech 4.3, 11–14 5 Ye amiye yokoi yaku ugika ura rego vonisi, ita ini venari gutuna yakusi ini tuma vene moi no rego; makai bi buni bi umuyeyaganedi. 6 Sei di ago nigedi di medari, mina amiye ini vava nufa oma kebi rigedi ma miya de rego; ka ini vava nufa koru moi dava risi ma kono vene rofu, deda esika esika tau gade magedi, uru gokaisanu ura regedi.✡Ex 7.17–19; 1 Sam 4.8; 1 Kgs 17.1

7 Resi ini niokuna ni vau regediri, kono ruba moka torari, bae dedo tuma dona nadina yaku mina amiye remanu rofu ruda resi ebu resi umuyego.✡Dan 7.7, 21; Rev 13.5–7; 17.8 8 Ye ini roaita taoni tora di ida tobori varebigedi; mina taoni, Sei di ago nina dada, ini roka nidedi bi Sodom ma Egypt, mirona sanari ka ini‡ini; bura bedakai uni nufa. Varika amiye satauro ikoko reyadi.✡Is 1.9–10 9 Ye amiye, rubu, ago idana idana vene ma gagani gagani vene bedakai yaku meda regodenu ma ini afonari, amiye ini roaita ne rei vesi guri aegi kebi regedi. 10 Kono amededi vene ada resi pati resi gugura buni buni iniye iniye nifeidegedi, mina Sei di ago nidedi amiye remanu kono amededi vene esika esika maradi dada. 11 Idu meda regodenu ma ini afona koina niyo usi, Sei di vegu asa yaku ina vene rofu dui reyo, ma dadi are reyadi ma kaere veyadi vene bi ori yaku no iniye iniye niyadi.✡Ezek 37.10 12 Ye omari gutuna goroka tora yokoi yaku ina vene rofu niyo ma neideyadi,§neideyadi; bura bedakai neideyaka nufa. “Yominari baefa!” Ma ini tuma vene yaku veyadiri, seuya ideri omari boyadi.✡2 Kgs 2.11 13 Ye mina meda nemokori maka kono yagayaga tora reyo, ma taoni berou berou 10 ri, yokoi maka bi moi no riyo. Mina kono yagayaga reyori, amiye 7,000 bi muyeyadi, ma kaere vegu niyadi vene bi ori no iniye nisi oma di Sei di roka moi odoro riyadi.✡Rev 6.12; 16.18

14 No iniye iniye remanu bi baesi koina niyo mini; idu regodenu bi evade okigika redo mini!

15 Kamini naivo naivo vima 7 yaku ini kibi fu reyori, omari goroka tora dudu raka niyadi, “Gua mina kono di ourefeidena amena sana bi uni Varika amiye ma ini Keriso di, ma ina yaku toga toga ourefeidebobigedi!”✡Ex 15.18; Dan 2.44; 7.14, 27 16 Ma amiye tora 24, kaere bi Sei di budari ini ourefeidena amena fata odorori ameinu rededi, ini seira rofu raudai resi Sei rofu nivakesi 17 nigamadi:

19 Kamini Sei nivakena yava omari bi eboka reyo ma ini nivakena yava ideri, ini uka ago maua vegamadi. Minari ayena kamanika reyo ma goroka††goroka; o kukuroka tora. ma ofu niyadi ma kono yagayaga reyo ma aisi fore kana tora yaregamadi.✡Rev 8.5; 16.18, 21