22
Maimaituwa Eiblaḡam i giuwe te Aisik ya lausewasewae
1 Kauwa matabudi mulidimo Maimaituwa Eiblaḡam i laulubuna gado, “Eiblaḡam!”
Bi Eiblaḡam ena giu i waimunena gado, “Tagu niga!”
2 Ḡome Maimaituwa i giuna gado, “Tam natuotim nuwam tauvaikauwena kwai doli bi kwa nawa dobu Moliyamo. Mba ḡome tagu oya yài lovem dabanemo natum Aisik em sewasewa kwa gabuḡosa lisigumo.”
3 Kamaina bi olaolala otamo Eiblaḡam puyo anigabuḡosa aubaina i lau kai bi ena donkimo i wai geludi, bi ena taupaula labu bi natuna Aisik i wai dolidi. Bi nawa aitubu bi a nawa oya Maimaituwa i giugiuwenemo. 4 Laḡan waifaionemo Eiblaḡam gabu Maimaituwa i giugiuwena manekemo i kita nawe. 5 Ḡome tana taupaula i giuwedina gado, “Temi niga ḡome ko miyamiya donki vaitena. Bi tagu gomana vaitena ka nawa noi ḡome bi Maimaituwa ka lauduneye kaka ka nato munaḡa lisimimo.”
6 Kamaina bi Eiblaḡam kai bwainina natuna Aisik i wai avali, gabuḡosa puyona aubaina. Bi tana kwatikwati i vai bi etaḡa a nawanawa bi kai ani taimatakalatina mwalidi i legalegaudi. 7 Bi Aisik i giuna gado, “Tamagu!”
Bi Eiblaḡam ena giu i waimunena gado, “Koko bai?”
Aisik i waitalayena gado, “Tada kai bwainina bi kai matana ani waikalakabina te legaudi bi sipu ani gabuḡosa bamo?”
8 Eiblaḡam ena giu i waimunena gado, “Maimaituwa kaka ḡemota ya kamaḡati.” Kamaina bi a nawa.
9 Laḡannemo Maimaituwa gabu i giugiuwenemo a tavatava ba Eiblaḡam ḡome olta i voiye bi dabanemo kai i waidubu. Kamaina bi natuna Aisik ḡulavemo i maḡini bi kai dabedimo i wai kena. 10 Kamaina bi tana kwatikwati i lageti natuna waipekina aubaina. 11 Bi Bada ena aneya malamo i binau yovona lisinemo gado, “Eiblaḡam! Eiblaḡam!”
Bi Eiblaḡam i giuna gado, “Tagu niga.”
12 Bi tana i giuna gado, “Gomana mote tuninemo bai kuma voiye. Tagu niganana e sibe te tam Maimaituwa kwa nainaile bi kwa vovoteyeteye banina tam natum ḡemota bi mote ku nuwevi.”
13 Bi Eiblaḡam i wai tautinamuli bi sipu olotona donana kai tomboluna ai ḡalo bi i moimoito i kita. Kamaina bi natuna i kaikamaḡe bi epaiyanina i nawa sipu i vunu bi sewasewa i gabuḡosa. 14 Taunana aubaina Eiblaḡam mba dobuna i wai isana, Bada i kanonoḡi. Bi niganana laḡannemo lava sa giugiuna, “Bada ena oyamo i kanonoḡi.”
15 Bada ena aneya malamo Eiblaḡam lisinemo giu i wai labuna gado, 16 Bada niga mainana i giuna gado, “Tam kuna voteyeteyegu bi natuotim ḡemota bi mote ku nuwevi, taunana aubaina tagu e giuvavasaḡem. 17 Te tam yà kavisuvisum bi bilem sa wapana mai kipola galewemo ee gimoli nisa diyanemo. Tam bilem yaḡolo edi ḡaviya sa vawaiubedi. 18 ✡ Giu 3:25Tam em tubulelesemo lava matabudi dobumo visuvisu sa vai. Banina tam egu giuvavasaḡa kuna voteyeteye.”
19 Kamaina bi a munaḡa ena taupaula lisidimo bi matabudi a nawa Biyasiba, Eiblaḡam ena ani miyamo.
Sela ena kwalabu ba 127 bi i peki. Eiblaḡam mwanena i wai nuwaboyae bi mote gabu te mwanena ya dobo. Kamaina bi dobuna lavedi lisidimo doḡa i gimeli bi mwanena i dobo. Bi kwalabu faiona mulidimo Eiblaḡam natuna Aisik Alan waivinina i naḡi, isana ba Lebeka bi tana ba Eiblaḡam tasina Nao natuna. Aisik ena kwalabu 40 bi i naḡi mulinemo Eiblaḡam i peki bi natunatuna labu taubeuna a vai bi mwanena diyanemo a dobo. Eiblaḡam ena kwalabu ba 175 bi i peki.