25
Deikap bi Iso a tubuḡa
19 Niga ba Eiblaḡam natuna Aisik ena titikuna, tana taunana tamana Eiblaḡam.
20 Aisik ena kwalabu 40 bi Lebeka i naḡi. Bi Lebeka tamana ba Betuwel, tana Padan Alan olotona. Bi Lebeka nuvuna ba Leiban. 21 Lebeka i aipoi, taunana aubaina mwanena Aisik i laupali Bada lisinemo. Kamaina bi Bada tana ena pali i vaiye bi mwanena Lebeka i bwaga. 22 Bi tana bwaganemo laḡalaḡa a miyamiya. Bi ena tau vaitena tinedi bwaganemo a waiḡinana. Taunana aubaina Lebeka Bada i wai talayena gado, “Niga bai kauwina lisigumo ya tubutubuḡa?” 23 Bi Bada i giuna gado,
“Tam bwagammo
ba dam labu sa miyamiya.
Bi labuidi yaḡolo sai tamsasalana.
Bi dam ḡemota
yai lewapana gulata.
Tautuwaḡa tasina
aubaina yai taupaula.”
24 Kamaina bi Lebeka ena laḡani i tava te i wai natuna bi natunatuna laḡalaḡa oloolotodi i bewedi. 25 Gomana gei tubuḡina ba tunina sabasabana bi wai kolokolona maibena balaigesi. Taunana aubaina tana ai isana Iso.* Isa Iso banina ba tunikolokolo. 26 Muliḡa gomana tautasi i tubuḡa bi nimana i pwalaḡe te tuwaḡana kaḡeiwakiduna i kaididi te bagibagina. Taunana aubaina tana ai isana Deikap. Aisik ena kwalabu 60 i vai bi Lebeka i wai natuna.
27 Mba libilibidi a nananaka bi Iso tana tau tupatupali bi mote palaimo i miyamiya gausi. Bi Deikap tana lava vovoyaḡotina bi laḡan matabuna palaimo i miyamiyaboni. 28 Bi Aisik tana Iso nuwana i vai kauwe banina Iso laḡan matabuna musala i vunudi bi tamana i kanikani. Bi Lebeka natuna Deikap taunaḡa i ḡoeḡoe kauwe.
Iso tasina lisinemo budeli i kune kamaḡe
29 Laḡan ḡemota Deikap gulewemo gwadai i ḡiu bi i miyamiya. Kamaina bi Iso i bababala nawana i tava. Bi tana kani i peki kauwa. 30 Kamaina bi tana Deikap i giuwena gado, “Tagu kanipeki i laukauwegu, gwadai sabasabana kuna ḡiuḡiuna, waiḡapa kwa tala natome bi yà kani!” Taunana aubaina tedi Iso isana ḡesauna a sakona Edom.† Isa Edom banina ba sabasabana.
31 Bi Deikap ena giu i waimunena gado, “Mba kamaina bi dolinemo em budelimo niga kanina kwa gimeli, kaka yà vitem.”
32 Bi Iso i giuna gado, “Ei kwa kitagu! Tagu ḡotona te kani pekina yà peki. Niga budelina bai visuvisuna ya vitegu?”
33 Bi Deikap i giuwena gado, “Dolinemo kwa gei giuvavasaḡegu te em budeli kwa vitegu, kaka kani yà vitem.” Ḡome Iso, Deikap lisinemo i giuvavasaḡa bi ena budeli kani aubaina i kune kamaḡe.
34 Ḡome Deikap buledi bi gwadai i tala bi Iso i vite. Tana i kani, i tego bi i miya moito te i nawa. Iso niga kauwinemo ena budeli i daboke.