1 “A kum tistising, ma a kum tamtamang, mot in longoro a wasiso ra an wasiso bat iau nami.”

2  Ap 5:34Ra det longoro i ra i wasiso nama wasiso Ibru torom det, det tur wowon rop. Ra i watungi lena, 3 “Iau a te Juda, di usus iau tong o Tasus una papor Silisia. A barman taru ut nin o Jerusalem, ma iau a nat na ususer anun o Gamaliel, ma i ususer wakak iau una Warkurai anun a kum tumtubun dat tagun numugu, ma a papam dekdek torom o God lenutri mot pami. 4  Ap 8:3A ban laulau a taro ra det mur a Kisapi anun a Labino. A um doko a ramano taro, ma a ramano taro kai a dat pas det, a kum musano ma a wardain utkai, ra a uruk tar det una karabus. 5 A mugumugu na tene etabor torom o God ma a taro na kiwung rop det talapor una kum utna ri, ma det pet lar pasi sur det in wasiso uni. A los pas a kum pas gusun det ra det tumusi torom a kum tistisin det a kum te Juda tong o Damaskus. Ra a wan utong sur an ker pas a taro ra det mur a Kisapi anun a Labino, ma an ben det usapat o Jerusalem sur din ukadik det.

6 “Ra a wan milau nanan o Damaskus, una labino suan, a labino talapor tagisapat una langit i wanpat kisin ma i sisio talilis pas iau. 7 Ma a puku pirso una piso, ra a longoro in nalngan ara i watungi tang lena, ‘Sol, Sol, sur asau ra u ser ban laulau iau?’ 8 Ma a tingi lena, ‘Labino, osi ui?’ Ma i balu iau lena, ‘Iau o Iesu, a te Nasaret, ra u ser ban laulau iau.’ 9 Ra a taro ra met wan tomo, det tama a talapor, ikut ka det longoro in nalngan ara ra i wasiso torom iau. 10 Ma a tingi lena, ‘Labino, asau ra an pami?’ Ra a Labino i balu iau lena, ‘Un katutur ma un nan utiro una tamon Damaskus, ra din inanos ui nama sau ra un pami.’ 11 Det ra met wan tomo, det pam benben tar iau mukut utiro o Damaskus, uni a dekdekin a talapor i upulu iau.

12 “Ara musano, a risano o Ananias, i ara lingmulus na tene lotu ra i ser mur a kum Warkurai anun o Moses, ma a taro Juda rop ra det kis tiro iai, det ser ru i. I wanpat torom iau, 13 ra i tur milau iau, ma i watungi tang lena, ‘Sol, a tising, un tamtama melet.’ Ra una du bung ut ra, arin matang i tamtama melet ra a tama o Ananias. 14 Ra o Ananias i watungi tang lena, ‘O God anun anundat a kabotaro tagun numugu i sa pilok tar ui, sur un tasman anun a nemnem, ma un tama a Tene Tokodos, ma un longoro anun a wasiso. 15 Ma ui, un ser wasiso puaso torom a taro rop un asau ra u sa tama tari, ma u sa longoro tari kai. 16 Ra sau mo ra u kis pasi? Un tur, ma din baptaiso ui, ma una risano, un wararing sur din unus ru anum a kum sakino petutna.’

17-18  Ap 9:29-30“Ra a milet melet usapat o Jerusalem, ma a wararing una rumu na etabor, a tama a Labino una tamtama, ra i watungi torom iau lena, ‘Un tur ma un nan lakit taginin o Jerusalem, uni ka det in longoro a wasiso puaso anumi un iau.’ 19  Ap 8:3; 26:9-11Ma a watungi tano lena, ‘Labino, det tasmani lena a ser ruk una kum rumu na lotu rop ma a ser dat pas det ra det nurnur un ui ra a ser uruk tar det una karabus, ma a ser miras det. 20  Ap 8:1Ra di duku doko o Stiwen, i ra i ser wasiso puaso un ui, iau kai a tur ut tiro iai. A mulaot tomo nam det, ma a tamtamabat a kum saket anundet ra det duku doko i.’ 21  Ap 9:15Ikut a Labino i watungi torom iau lena, ‘Un nan, an tulu bakbak ru ui utong torom a taro ra awu sur a taro Juda.’ ”

22 A taro det longoro a wasiso anun o Pol tuk ut una wasiso ri. Numur det kukukuk nama labino walngandet lena, “Din um doko ru i! Din lakro ru i gusun a rakrakon bual. Ke sot sur in laun.” 23 Ra det kukukuk, det rakon ru anundet a kum saket, ma det woro sarara a kubus usapat netes. 24 Ma a labino mugumugu i pitar a warkurai lena, din ben o Pol utiro una rumu anun a kum tene inaim, din mirasi ma din tingi sur din tasman asau a kibino ra det kukukuk lenra uni. 25  Ap 16:37Ra det ker tari nama kum sen sur det in mirasi, o Pol i watungi torom a mugumugu anun a kum tene inaim ra i tur milau i lena, “Pepetlai, i tokodos kut sur din miras tu te Rom, ra ka di warkurai i utmakai?”

26 Ra a mugumugu anun a taro na inaim i longoro i, i wan torom anun a mugumugu, ra i watungi tano lena, “Asau ra u nem na pami? A musano ri a te Rom.” 27 Ra a labino mugumugu i wan torom o Pol ra i tingi lena, “Ai, inanos iau. Ui a te Rom?” Ra i balu i lena, “Ma! Iau a te Rom.” 28 Ma a labino mugumugu i watungi lena, “Iau a ikul nama labino mani sur an nanpat a te Rom.” Ra o Pol i balu i lena, “Iau awu. Di usus iau, a te Rom ut.” 29  Ap 16:38Ma det, ra det nem na tingi, uniutra det wan susuaro mut gusuni. Ra a labino mugumugu i tasmani lena o Pol a te Rom, i ngara, uni i ker tari nama sen.

30 Una bung numur, a labino mugumugu i nemi sur in mananos wakak pas una utna ra a taro Juda det takun o Pol nami. Ra i palos ru a kum sen, i itula sur a kum lamlabino tene etabor torom o God, ma a taro na kiwung rop kai, sur det in nan tomo. Ra i ben pirso pas o Pol, ra i utur tari sa numugu umatandet.