3
A ningnigola ana lotu
1 3:1 Aposel 20:28A warwara ne i momol kol, mang: Ning tik i mang sur ir ningnigo ana lotu, a wakak a titol ning i mang suri. 2 3:2 Taitus 1:6-9Pa ning tik i mang sur ir ningnigo ana lotu i wakak sur a ginina ir manglarne: gong ta artitiu i kes onoi, ir taulai ka takai a hane, ir tai alar anuna lalaun, ir warkurai tostos anuna lalaun, i a ngas a barsan ning a tarai la hanrawai i, ir sira gas pas a tarai uting na nuna rumai, pa i a wakak a tena asaer. 3 Pa gong a tena gang, gong a tena harum, ir tena balmolmol, gong i arlak, pa gong i mang kol sur a mani. 4 I a wakak a ningnigo ana keskes anun latamana, pa i asaer a natnatna sur lar hanrawai i pa lar longor teteki. 5 Esining bel i lasan sur ir nigo wakak a keskes anun latamana, bel ir tolsot pasi sur ir tai alar a tarai a lotu ane God. 6 Ning ta barsan, ono kane i lingir tar a nuknukna, gong i ningnigo ana lotu, sakana ir rakan alekleki pa ir punga ana warkurai arlar oe Satan. 7 3:7 2 Korin 8:21A ningnigo ana lotu a ngas a barsan ning a tarai masik otleng ning bel la lotlotu, la hanrawai i. Ning bel, lar atong kumnani, pa ir hirua ana kun ane Satan.
Na tena arnangai ana lotu
8 Mang otleng larning tetek na tena arnangai ana lotu, i wakak sur la a ngas a barsan ning a tarai la hanrawai la, lar momol ana nunla warwara, gong la gang pa gong la mang sur a galis a mani. 9 Lar tong akes a tortorot momol taum ana nuknukinla ning bel ta rongo na mata e God. 10 Dir toho nigon tar la, pa ning a gininla i wakak, lar kibas bot a titol na tena arnangai ting na lotu.
11 3:11 Taitus 2:3Tetek anunla na gurarala otleng ir manglarning, la a ngas a gurarala ning a tarai la hanrawai la, gong la warwara kumkumna, lar tai alar wakak anunla lalaun, pa lar momol ana titolla rop.
12 A tena arnangai ana lotu ir taulai ka takai hane, pa ir nigon wakak na natnatna, pa la rop ting na nuna rumai.
13 La ning la titol wakak ana titol na tena arnangai ana lotu, lar kibas a hanrawai anuna tarai tetek la. Pa lar warwara talapor ana nunla tortorot oe Karisito Iesu pa bel lar matmataut.
Anundala tortorot
14 A mang ar hanot kapit tetek u, ika ar tumtumus nigo tetek u. 15 Pa ning bel ar hanot kapit, u ka tasman a toltol ning a tarai ane God lar toli na arpotor inla. A tarai a lotu ane God esaning i laun, la arlar ana pos pa kama rumai ning la arakrakai a momolna. 16 3:16 Jon 1:14; 2 Pita 3:3; 1 Jon 2:18Dala tasman momoli mang, a asaer ning dala tortorot onoi i itna kol. Larne:
E Karisito i hanot a barsan,
a Talngan Tabu i apuasa i mang e Karisito i tostos na matana e God,
a angelola la oroi,
di atatai onoi pa warwara ne i han sarara tetek a tarai miting na matanitula rop,
pa galis te na rakrakan hanua la tortorot onoi,
i han kas pa i kes ana matatar saot na langit.
3:1: 3:1 Aposel 20:28
3:2: 3:2 Taitus 1:6-9
3:7: 3:7 2 Korin 8:21
3:11: 3:11 Taitus 2:3
3:16: 3:16 Jon 1:14; 2 Pita 3:3; 1 Jon 2:18