1 A Talngan Tabu i apuasa i mang al tarai lar han masik kusun a momol a tortorot ana ararop a pukakiarla, pa lar mur a ingunla ning la asasongo, pa lar mur a asaerla anuna motla. 2 A asaerla ne i hanot miting tana tena asasongola, a tarai ning bel la oroi lalan a tostosna pa laulauna, anasa a tostos a nuknukinla ka mat. 3 4:3 Stat 9:3; Rom 14:6; 1 Korin 10:30-31A ngas a tarai ne, la sairas a tinaulai pa la sairas a tarai sur gong la ien al ngas a utna na hangan. A utna na hangan ning, e God i akes tari, sur a tarai a tortorot ning la tasman a momolna, lar atong wakak tetek e God onoi pa lar ieni. 4 Anasa a ututnala rop ning e God i akes tar la, la wakak, pa gong dala bilbilor la. Dalar atong wakak tetek e God onoi ning dalar ieni. 5 Anasa a warwara ane God pa niaring dia awakak a utna na hangan sur ir wakak na matana e God.

6 Ning ur asaer na tastasimla ana asaer ne, u a wakak a tena titol ane Karisito Iesu, ning u ka alasan wakak pas u ana tortorot momol pa wakak a asaer ning u muri. 7 4:7 1 Timoti 1:4Ur han masik kusun a asaer orosla ning bel i to pas al utna. Ur alasan u sur ur gomo ana ngas a lalaun ning e God i mang suri. 8 Ning dala alasan a palaondala ana ngas a urmatana mon, i nangan a palaondala, ika ning dala alasan dala sur dalar gomo ana toltol ning e God i mang suri, i wakak kol tana ututnala rop. I nangan a lalaun ne pa a lalaun lamur otleng. 9 A warwara ne a atongi, i momol kol, i wakak ning dalar muri pa dalar tortorot onoi. 10 4:10 1 Timoti 2:3-4Ine a kamkamna ning mila rakrakai pa mila titol rakrakai, anasa mila harnanai ana tortorot oe God, esaning i laun pa i sira alaun anuna taraila rop, ning la tortorot onoi.

11 Ur asaer la pa ur arakrakai la ana ututnala ne. 12 4:12 Taitus 2:15Gong u noren tik ir oroi purpurum u anasa u barman. Ur tol a wakak a toltol tetek a tena tortorotla ana num a warwara, anum a toltol, anum a marmaris, anum a tortorot pa anum a totoh a lalaun, sur lar muri. 13 Ur rakrakai ana wawas ting na Buk Tabu tetek a tarai a lotu, ur rakrakai ana warawai taum ana asaerla tetek la, tuk ning ar hanot. 14 4:14 2 Timoti 1:6Gong u noren a artabar ana Talngan Tabu, ning di saran tari tetek u, ning a ningnigola la warwara na propet pa la suah tar a kunla saot hom.

15 Ur titol rakrakai ana ututnala ne. Ur saran anum a lalaun sur a ututnala ne, sur a taraila rop lar oroi u mang u gomo ana lalaun ning e God i mang suri. 16 Ur tai alar anum a lalaun pa anum a asaer, ur tur rakrakai ondiau. Anasa, ning ur toli larne, ur alaun pas u ot, pa la otleng ning la longor u.