1 Lamur a oroi pas a rokoio a inagoi i burak ot miting na puka tasi. Ning a bonot a komna, pa mais a pukulna, pa ning a bonot a kukuh na king i kes saot na komna. Pa ana taktakai pukulna, di ka tumus tar na risana ning i atong saksakan e God onoi. 2 Pa rokoio a inagoi ning a oroi i arlar ana lepat,*A lepat, ning a ngas a rokoio a inagoi i arlar ana taiga. Pa hih a palaona i toktok. ika naur a hana i arlar ana naur a hana bea,†A bea, ning a tnan rokoio a inagoi. pa a pahana i arlar ana pahana laion. A dregon ning, i saran tar a rakrakaina, pa nun a keskes a king, pa anuna tnan warkurai tetek a rokoio a inagoi. 3 Takai a pukul a rokoio a inagoi i tai arlar onoi ning di ka um kol tari, ika a masik a minat ning, ka mah ulak. Pa rakrakan hanua rop la kulkulan, pa la mur a rokoio a inagoi ning. 4 Pa tarai la lotu tetek a dregon, anasa ka saran tar a warkurai tetek a rokoio a inagoi. Pa la lotu otleng tetek a rokoio a inagoi, pa la deke mang, “Esining i arlar ana rokoio a inagoi ne? Esi ning i tolsot sur ir umi?”

5 Di malmaling tar a rokoio a inagoi suir atong a warwarala na iaunan pa warwarala ning ir anan e God ono, pa ir titol pas ana nuna warkurai diat a bonot pa naur a kalang. 6 I sapang a pahana sur ir anan e God, pa ir atong laulau a risana, pa pukna ning i kes ia pa la ning la kes saot na langit. 7 Di saran tar a rakrakai tana suir harum taum ana tarai ane God, pa ir tolsot pas la. Di saran tar a warkurai tana sur ir warkurai na mangis a tarai rop, a tarai miting na hananuala rop, la ning la warwara ana urmatana ngas a warwarala rop, pa a tarai miting na matanitula rop. 8 Pa la rop te na rakrakan hanua, ning a risanla bel i kes ting na buk a lalaun, lar lotu tetek a rokoio a inagoi. A buk a lalaun ne, anuna Nat a Sipsip, ning di um kol seni, di ka tumus tari ning e God belot i akes a rakrakan hanua. 9 Esining a talngana kaning, i wakak sur ir longor onoi.

11 Lamur a oroi ning a rokoio a inagoi maleng i pusa ot miting na piu. Naur a komna i arlar ana kom ana nat a sipsip, ika i warwara lar a dregon. 12 I titol ana warkurai rop miting na ningnigo na rokoio a inagoi, suir nangani, sur a rakrakan hanua, pa la ning la kes teia, lar lotu tetek a ningnigo na rokoio a inagoi, ning a masik a minat kaning onoi ka mah ulak. 13 A rokoio a inagoi ning i pusa ot miting na piu i tol a tatatnan akinalangla. Ning a akinalang ning i toli, i tol otnan a iah misaot na langit ute na rakrakan hanua namatana tarai. 14 I ben rongon a tarai ning la kes te na rakrakan hanua, anasa ana akinalangla ning i toli ana rakrakai ning di saran tari tana suir nangan a ningnigo na rokoio a inagoi onoi. I atai la sur lar atur a manar a ningnigo na rokoio a inagoi sur lar aitna pasi onoi. A ningnigo na rokoio a inagoi ning nating di so tari ana liwan a harum, ika i laun ot. 15 Di saran tar a rakrakai tana suir tabar a manar a ningnigo na rokoio a inagoi ana wuwu na lalaun, suir warwara pa ir warkurai sur dir um kol la ning bel la longor sur lar lotu teteki.

16 Pa munaur a rokoio a inagoi i angongos pas a tarai rop, sur dir suah a akinalang ting na sot a kunla pa ting na patarinla. I angongos pas la ning bel al risanla pa la ning la leklek, la ning la leklek ana gongonla pa na kapan a tarai, na tena titol oros, pa la ning bel na tena titol oros. 17 Bel tik ir lolou pa bel tik otleng ir siusiurai, ning bel ta akinalang kaning onoi. A akinalang ning a risana a rokoio a inagoi pa wawas ana risana. 18 Esining i tastasmai ir talapor wakak ana utna ne. Ir was taman a wawas ana rokoio a inagoi, anasa a wawas ana barsan. Anuna wawas ine diono na mar diono na bonot pa diono (666).