1 Hata Toxoratamona libu xai mana Sara bila ina harua ba, baing Toxoratamona libu baraxinta ina hau haruangua mana ba. 2 Sara gamona saing hayau gara lup tela na Ebraham bungina Ebraham wa duanga sibuna, mana xaidap Urana hau haruangua ba.✡Hibru 11:11 3 Ebraham sina yaya Aisak*Aisak namuxinoa masisi. na gara Sara hayau ba. 4 Bungina garanoa Aisak xaidabing 8, Ebraham xuxu sangganoa, bila Urana tabina na ba.✡Unggutinga (Stat) 17:12; Aposel 7:8 5 Ebraham nianindi bila 100 baing Sara hayau Aisak.

6 Sara harua ba, “Urana libu xai manga saing ngayaha xaung ngamasisi, lipu longa dilungu nga bagula diyaha rangua nga.” 7 Baing Sara harua muli ba, “Gaxarea sibuna bagula bala Ebraham ba, ‘Sara bagula hayau gara tela saing ta su na’? Ne Ebraham wa duanga sibuna ba bungina ngahayau garanoa.”

8 Aisak tubu saing yunga sua, baing xaidapka baguba Ebraham xauxau ba tau anginga sabanga mana garanoa. 9 Ne Sara bagu Hagar Isip haing tela garanoa Ismael hayau mana Ebraham, masisia Aisak. 10 Binabu Sara harua na Ebraham ba, “Usuka haing oxata olanggama xaung garanoa tang mala, labu garanoa xap xalingim telau tai mana bungina umati.”✡Galesia 4:29-30

11 Haruanga ba libu Ebraham hatuminganoa mauxana namua na gara ba bing ina garanoa. 12 Ne Urana bala Ebraham ba, “Labu hatumingama mauxana mana garua xaung haing oxata olanggamau tai. Ulibu baraxinta Sara harua naung ba, namua na haruangagua ngahau ranguaung ba garam xumana disok bagula mana Aisak.✡Rom 9:7; Hibru 11:18 13 Ne bagula ngalibu haing oxata olanggama garanoa bakbagindi disok xumana xauna, namua na garama.”

14 Hilia mana buraraging tela, Ebraham mesa xap anginga xaung asaxa sanggana baxagi’m langa saing sinadi na Hagar. Tadi Hagar yaxunia sina garanoa na saing soxi dingtang mala. Ding tang dahaxa mauli maluxu’m long xoliana Berseba.

15 Bungina langa wa asaxa sanggania sup, yunga garanoa matabu mana long timungtimunging tela. 16 Baing ila rung hasoya monga, namua na hatum ba, “Labu ngabagu garua mati te.” Saing rung la ba, baing ungguti tang haringina.

17 Urana lungu garua tang mua, saing Urana uleginama wagi masok long xaiya mana Hagar ba, “Hagar, mauxangama baru? Labu umaxuwau tai, Urana lungu garua tang. 18 Umesa! Ula uhauli garua, uiti mesa saing utuxu rimamia namua na bagula ngalibu bakbagindi disok xumana titia.”

19 Urana libu Hagar maxandi xaxa ding saing bagu banggum tela baxagi’m langa. Binabu ila sap xu lang mana asaxa sanggang nanggolana ma saing sina na ba nung.

20 Urana wa rangua garua laing tubu. Bing wa mana long xoliana laing sok lipu ruangam. 21 Bungina rung mua long xoliania Paran, bauna hau gabisia mana ba yau haing tela mana titia Isip.

22 Mana bungina baguba Abimelek xaung Pikol yanam mana Abimelek lipuxing haungingamdi tang dima daharua na Ebraham ba, “Urana wa ranguaung mana kubolum longga ulibudi.✡Unggutinga (Stat) 26:26 23 Hatata uharingia haruangua nanga la li Urana maxania ba sanga utuxu murak manga te, kimbo garagudi, kimbo bakbagigudi kimuya te mana mari sabangga lo. Uhatanga kubolu xaiya nanga xaung titia urung mana bila lobu tela, kubolu maxang taininau bila ngalibu maung.”

24 Ebraham harua na dingtang ba, “Maxung sibuna ngaharingia haruangua.”

25 Baing Ebraham hati Abimelek mana banggum tela langa wa mana, Abimelek lipuxing oxatamdi disoxauti mana. 26 Ne Abimelek harua ba, “Ngaxabia te, gaxarea libu kubolua baguba. Hata sibuna tauna ngalungu haruangua li, ubala nga mana te.”

27 Binabu Ebraham xap sipsip xaung bulmakau saing tata na Abimelek baing tang dahau haruangua. 28 Ebraham xap sipsip hagaxang 7 morundi saing tadi halianga. 29 Baing Abimelek xusunga ba, “Sipsip hagaxang 7 usuxuyadi halianga lo, namuxinoa baru?”

30 Harua ba, “Mana sipsip hagaxang 7 dahatanga ba ngaki banggum langina baguli.”

31 Binabu langga ba duxu ba Berseba,†Berseba namuxinoa lang banggumina dahau haruangua mana. namua na lipu luwa dahau haruangua la ba.

32 Kimuya mana dahau haruangua Berseba, Abimelek xaung Pikol yanam mana Abimelek lipuxing haungingamdi tang digoxoya mala mana titi Pilistin. 33 Ebraham xuma xai bila dom,‡tamaris—Tamaris xai yonggam. Yonggaxinoa ganangang xai mana sabu. xaiya ba tubu, saing sabu namuya mana Toxoratamona, Urana walinga subingang teguama. 34 Baing Ebraham wa mana titia Pilistin bunging maxaxaya.