15
Levenanasa At Lubung Parisi La Lubung Sadiusi
(Mk 7:1-13)
Lentaba lubung Parisi mi luvuttadi loklox ase at Laulis Linga diga vas kaxat boro Jerusalem la diga vot pasa ne Iesu la diga sue i, * Lu 11:38“Tila ba lavaun pinivu ram di ronga xepe leveloklox ase at lavalabat atdik? Dixo sogos avot be levengkikngen di la melemu dina anan.”
La ne Iesu ga vorang i ridi xeretna, “La tila ba ming tonga xepe levelinga at ne Moroa xusu mi epovo do mina mumu asu xa levenanasa atnimi? * Lal 5:16Levelinga at ne Moroa i lok keretna,
‘Mina lok ngangao at luvuttemen nimi mi luvutnen nimi, la do tara i paase kapmek ti ne temen mi nenen, limixin dina sev amer i.’ Pas 20:12; 21:17
5-6 Ketla nemi mi lok keretna. Mo do tara na ruuna tempanga do ri lox epovo lavakpakes at ne temen kopla nenen, nemi mi tong i rin do neni na mumu asu leveloklok at lavalabat la na raba ne Moroa min la neni na ke loklok ti lok tooro du. At na mun langas nemi ming tonga xepe levenanasa at ne Moroa la mira mumu asu nga leveloklok atnimi. Nemi luvuttadi loklok sosolom. Aisaia ga paase ali nunuan mumu nimi. Ni ga tong asu levelinga at ne Moroa keretna,
‘Na limixin di lok ngangao rak mi levelinga mun atdi, ketla lebelen di i vaxalom tino basinge ia. Dixo lotu saparav ia mi luruturun, la dik lox ase mi levelinga at limixin mun!’ ” Ais 29:13
Lempanga I Lox Abilinga Lorooro At Laradi
(Mk 7:14-23)
10 Melemu Iesu ga ro xaka limixin saparav i la ga lok tidi, “Mina ronga ka nunuan lempapaase rak la mina xasep teren. 11  * Mt 12:34Lempanga i vubeles keneng at lungusno laradi, anai xopmen na lox abilinga i. Ketla levelinga laradi i vaase asu i at lungusno, anaa i lox abilinga i.”
12 Melemu lavaun pinivu diga vot pasa i la diga lok, “Uklen pam i do lubung Parisi di suma xapmek ti levelinga ram?”
13 La ni ga lok tidi, “Larauna axap ne Tamak goxotlo li di, neni naba xat pes di. 14  * Mt 23:16,24; Lu 6:39; Ro 2:19Mina ke xepe di mi levenanasa atdi. Nedi di lok ngan lengkatli main la di lok do nedi luvuttadi loklok tooro at limixin. Do laxatli main im lam lara laxatli main, nedu buru dunaba subu tup at lemet.”
15 Pita ga lok ti ne Iesu, “Una soxomus be lavasuun at nom lavapaase poovo rinama.”
16 La ne Iesu ga sue di, “Kereva mo? Nemi bok kovisi mina xasep? 17 Mina xasep do lempanga anan laradi i anan i la i beles keneng at lebelen, nom i neni i lox asu box i. 18 Ketla lempapaase laradi i vaase asu i at lungusno ren, nom i, i ravasu boro xeneng at lorooro ren. La na mun levelinga, ni i epovo na lox abilinga i. 19  * Lur 8:21; Mt 12:34Na levempanga xapmek i ravasu boro at lorooro at laradi i lok keretna. Levendoxoma xapmek, la loklok tip sev amet tadi, loklok ting longka, la leveloklok kakapmek maxamang at lixitkis epot, loklok tip kip pilo, la lavapaase xaxarang mu tara, la loklok ti lox asi tara. 20 La nai lempanga i lox abilinga laradi. Ketla do tara na anan la kopmen na gos avot be lukngen, nom kopmen na lox abilinga i.”
Iesu Ga Lox Aroo Loolik At Latkin Kopmen Boro Israel
(Mk 7:24-30)
21 Iesu ga on basinge mo lemenemen la gat pas uto at lengkot saparap Taia la Sidon. 22 Lara latkin me Kanan mo ga nemen ap mo lenep ga vot pasa ne Iesu, la ga xup silok tin keretna, “Leeme Silok! Livisik li at ne Devit. Una lox asuusu lebelen tuntun tia la una lok mumu be loolik tarak. Lagas i suxuna i la i lox atpospa rino i.”
23 Ketla Iesu goxo tong tekolinga rin. La lavaun pinivu ren diga vot pasa ne Iesu la diga lok tin, “Una riki aonon mo latkin! Ia mumu asu dik la irak lox avurupit amisik dik.”
24  * Mt 10:6La ne Iesu ga lok ti mo latkin keretna, “Moroa ga riki ia xusu tinedi mene limixin me Israel diga on soogong.”
25 Nom latkin ga ronga i na la ga xis tiktikbu mi luvatgulom teren la ga lok, “Leeme Silok. Una lok tooro ia.”
26 La ne Iesu ga lok tin keretna, “Ixok mokso do ana lok ka lempanga anan at laxamdak la ana lu raba lubungman min.”* Limixin me Judaia diga so asen limixin petpes mi lubungman.
27 Ketla nom latkin ga lok, “Leeme Silok. I ruturun, ketla lubungman di anan bok lengkon mumus luxa im subu su boro vana at loxonin anan at luvuttadi atdi.”
28  * Mt 8:10,13La ne Iesu ga lok tin, “Latkin. Lununu ram i silok aleng. Ana lox epovo lisingising taram.” La ap mo mun loxonaleng loolik teren ga lox avukat ta.
Iesu Ga Lox Aroo Buaang Limixin
29  * Mk 7:31La ne Iesu ga vas kaxat me go la gat pas to loxon at lavatdan kis Galili. La ni ga vas urut at lakaana la gat kis go. 30 La buaang nedi limixin, diga vot pasa i la diga lam ka limixin, lengkot atdi ga molo, la lengkatli main, la lentaba levengkikngen di la lengkangkedek atdi ga lok kapmek. La lenbaalung baa la buaang bok nedi luvuttadi mi levenanmeres kerepmo, la diga lok ka di uto saparap ne Iesu la ni ga lox aroo di. 31  * Mk 7:37Limixin diga sangu aleng atla diga ven lenbaalung baa diga paase, la luvuttadi mi levengkikngen di mi lengkangkedek ga lok kapmek, diga lox avukat. La nedi di goxot pas gano, digat pas ta. La lengkatli main, diga reven. La diga emi asu aleng mi ne Moroa me Israel.
Iesu Ga Raba Luxa
Buaang Limixin
(Mk 8:1-10)
32  * Mt 14:14Iesu ga ro xaka lavaun pinivu ren saparav i la ga lok, “A balamu aleng na limixin, mila ira vantun ta levenaleng nedi dik lok eburu minia, la kopmen ta tempanga anan kusu tidi ri anan. Axo para i do ana riki aonon gamasa nedi mi lantoxo atdi. Lavanga dina meroxon mu langas uto at laramenemen atnedi.”
33 La lavaun pinivu diga sue i, “Ata ba lok ka tempanga anan ua at na lenep gamasa kusu naba epovo at na limixin solo?”
34 La ne Iesu ga sue di xeretna, “Lavanisa lengkongkide nemi mi ruuna i?”
La diga vorang i, “Lavanuti lengkongkide la lutpen mat lixilik bok.”
35 La ne Iesu ga tong i ri limixin kusu dina xis kopok at laxangka. 36 La ni ga lok ka lavanuti lengkongkide la lutpen mat la ni ga tong aorong ti ne Moroa, la ga sebex i, la ga raba lavaun pinivu ren min, la diga raba limixin min. 37 La limixin axap diga anan la diga an mais. La melemu lavaun pinivu diga lok ka lavanuti leventat silok la diga suxa aumsu di mi lempanga anan limixin diga an ake ren. 38 Luutus atdi na lavatlok ga epovo at lavanuet larabin sangsangaun kobot (4000). Lavakin mi laxamdak la laxaalik lixilik kopmen di goxo nemen at na luutus. 39 Melemu Iesu ga riki aonon limixin uto at laramenemen atdi la ga los kas at lesepang la ga sen uto at lenep Magadan.

*15:2: Lu 11:38

*15:4: Lal 5:16

*15:11: Mt 12:34

*15:14: Mt 23:16,24; Lu 6:39; Ro 2:19

*15:19: Lur 8:21; Mt 12:34

*15:24: Mt 10:6

*15:26: Limixin me Judaia diga so asen limixin petpes mi lubungman.

*15:28: Mt 8:10,13

*15:29: Mk 7:31

*15:31: Mk 7:37

*15:32: Mt 14:14