12
Iesu Ga Paase Mumu
Laaleng Kaala
(Mk 2:23-28; Lu 6:1-5)
* Lal 23:25Ap mo levenaleng, ne Iesu gat pas kantubu at leventaamang at laaleng kaala. La lavaun pinivu ren diga roxo la diga xidik kaka lempeven at lempiao, la diga anan i. * Pas 20:10Lubung Parisi diga ven di, la diga lok ti ne Iesu, “Pen ba i. Lavaun pinivu ram dira los polo vam Laulis Linga, i tong i do nemen mitak lok lempanga xeretnom at laaleng kaala.”
* 1 Sml 21:1-6La ne Iesu ga sue di xeretna, “Mi doma bok levelinga at Lovoang Kaala mumu ne Devit? At lara laaleng neni eburu mi limixin teren diga roxo. * Mas 24:5-9Neni ga vubeles at loogu at ne Moroa la ga lok ka lengkongkide digam taba min ti ne Moroa, la neni eburu mi limixin teren diga anan i. La kerepmo diga los polo vam Laulis Linga mila lavamaasa xusuk mun diga anan mo lengkongkide. * Kex 28:9-10Mina domangke at levelinga at Laulis Linga i tong i do at laaleng kaala lavamaasa di los polo Laulis Linga mila di gugu ro xeneng at loogu laplavang ap mo laaleng. Ketla kopmen taxapmek atdi mumu i nom. * Mt 12:41-42; Lu 11:31-32Nia a tong i rinimi do lara i silok ti loogu laplavang ira vot pam. * Mt 9:13Nemi xopmen mina xasep at levelinga at Lovoang Kaala mo i lok keretna,
‘A vara i do lebelen tuntun na umsu atnimi, a xopara loklok tiplavang.’ Ose 6:6
Do nemi gitaklen lavasuun at nai, nemi gitoxo lok li lumumuat atnedi kopmen taxakapmek atdi.” * Mt 8:20La ne Iesu ga lok bok, “Nenia Laradi Mevana. La nenia Lamgomgo at laaleng kaala la ak lok tatao mo laaleng.”
Iesu Ga Lox Aroo Laradi Lekngen Ga Molo
(Mk 3:1-6; Lu 6:6-11)
Iesu ga vas kaxat basinge mo loxot la ga vubeles uto at loogu singising atdi. 10  * Lu 14:3Lara laradi mo ga nemen lekngen ga molo. La lubung Parisi diga doma i do dina bala raba ne Iesu, kuren la diga sue i, “Ik mokso do tara na lox aroo taradi at laaleng kaala?”
11  * Lu 14:5Iesu ga lok tidi, “Do tara atnimi i ruuna lisipsip, la mo lisipsip na subu uto at tamamara silok at laaleng kaala, neni ba rebeng ka i la ba xiv asu ka i. 12 La laradi i silok aleng ti lisipsip. Kuren la ik mokso do ata lok lempanga avukat at laaleng kaala.”
13 La ni ga lok ti mo laradi, “Una song asu mi lakngam.” La mo laradi ga song asu mi lekngen, la lekngen ga lox avukat axap ta kerekngan mo lara lekngen. 14  * Jo 5:16Ketla lubung Parisi diga sixisu la diga puse ngas kusu dina sev amet ne Iesu.
Iesu Neni Lasaxaruki At Ne Moroa
15  * Mk 3:7-10Iesu gaklen mo levendoxoma atdi la ga vas kaxat basinge mo lemenemen. Buaang limixin diga mumu asu i la neni ga lox aroo nedi digak meres. 16  * Mt 8:4; Mk 3:12Neni ga tong alolos i ridi do di noxo tong asu i do neni nege. 17 Iesu ga lox i na kusu na lox asoorun levelinga at leeme vapaase ali ne Aisaia keneng at Lovoang Kaala, i lok keretna,
18  * Mt 3:17“Neni na lasaxaruki rak, mo nia aga soxolik ka i. Nenia a balamu i la a lok momo aleng min. Nenia anaba suxa aumsu i mi Loroonan tarak. La neni naba paase axasep loklok manmanton ti limixin axap. 19 Neni noxo etep mi levelinga kopla nap kup mukmusak. Neni noxo ru asuvos i ro melamgo at limixin axap. 20 Neni noxo ru mi loboat tinedi limixin molobe kopla na lok kapmek nedi limixin pakpakes. Neni naba gugu se limixin diba siam kaka leveloklok in manton. 21 La levenabung mixin axap dinaba nunu at laasen teren.” Ais 42:1-4
Iesu Ga Paase Mumu
Ne Belsebul
(Mk 3:20-30; Lu 11:14-23)
22  * Mt 9:32-33La limixin diga lam ka lara laradi uto at ne Iesu. Lagas kapmek ga suxuna i la goxo epovo na paase la luxatli ren ga main. La ne Iesu ga riki asu lagas basinge mo laradi la ni ga lox epovo i xusu na paase la na reven. 23 La limixin axap diga sangu la diga esue, “Kereva, na laradi neni Lanarong, la livisik li at ne Devit?”
24  * Mt 9:34; 10:25La lubung Parisi diga ronga i na la diga lok ti mo limixin, “Neni i riki asu lubunggas mi lolos at ne Belsebul, laradi gomgo at lubunggas.”
25 Ketla ne Iesu gaklen levendoxoma atdi la ni ga tong lavapaase poovo ridi xeretna, “Dola tubung mixin di epes di ri lengkon binam tadi, la dia esep eburu minedi xa, letuna atdi kopmen noxo lok nunuan. La limixin at legese menemen kopla loxoetemen do di epes di kusu ti esep, dinabat kis epeseves. 26 Kuren la mo do ne Satan eburu mi limixin teren dina epeseves ti legepu binam tadi la dina esep, lolos teren naba nemen atmatkun kereva? 27 Mo do nia a lox asu di mi lolos at ne Belsebul, limixin atnimi di lox asu di xereva? Nedi di lox asuusu i do levelinga atnimi kopmen nak mokso. 28  * Gu 10:38; 1 Jo 3:8Ket do a lox asu di mi lolos at Loroonan Kaala at ne Moroa, Linintoo at ne Moroa monga ira vot pam saparap nimi.
29  * Ais 49:24; 1 Jo 4:4Do tara i vara na xip pilo xaka lempanga at loogu at taradi lolos, neni na xoxo alis be mo laradi la melemu na xip kaka ba mo lempanga ren.
30  * Mk 9:40; Lu 9:50Do taradi kopmen na xis esogo eburu minia, neni i munepen minia. La do tara kopmen nak lok tooro ia tip kup bubua ka laxasipsip, neni mo laradi ik sak teteles laxasipsip. 31  * 1 Ti 1:13; Ib 6:4-6; 10:26La a tong i rinimi xeretna. Moroa naba doxoma xepe laxakapmek axap la lavapaase vupu. Ket do tara na vaase vupu ri Loroonan Kaala, ne Moroa noxo doxoma xepe mo laxakapmek. 32 La ne Moroa naba doxoma xepe tara i paase kapmek mumu ia, Laradi Mevana. Ketla neni noxo doxoma xepe tara i paase kapmek mumu Loroonan Kaala, at na levenaleng la at lorooro melemu bok.
Luuna Avukat Naba Pisik Larapeven Una Avukat
(Lu 6:43-45)
33  * Mt 7:16-20Luuna avukat, ni i pisik larapeven una avukat. Luuna xapmek, ni i pisik mun larapeven una kapmek. Limixin di ven kibis luuna at larapeven teren i pisik asu i. 34  * Mt 3:7; 15:18; 23:33; Lu 3:7Nemi laxamdak at lempasii. Nemi xopmen mina epovo na tong asu levelinga avukat mila nemi mi umsu mi laxakapmek. Levenngusno nimi i paase asuusu lempanga lebelen nimi i umsu min. 35 Laradi avukat ik lox asuusu lempanga nunuan ik lok at lorooro ren, ketla laradi xapmek ik lox asuusu mun lempanga xapmek ik lok at lorooro ren. 36 Nia a tong i rinimi. Limixin dinaba tu at lavapaase ro melamgo at ne Moroa at laaleng ete mumu levelinga xapmek axap diga tong pam i. 37 Mo do levelinga at tara ga lox avukat, Moroa naba lox asepmus i. Mo do levelinga at tara ga lok kapmek, Moroa naba lok li lumumuat silok teren.”
Limixin Diga Sing Ne Iesu Kusu Na Lok
Tavanga Sangsangu
(Mk 8:11-12; Lu 11:29-32)
38  * Mt 16:1; Lu 11:16; Jo 6:30; 1 Ko 1:22Melemu lentaba at lubung Parisi la luvuttadi loklox ase at Laulis Linga diga lok ti ne Iesu, “Leeme loklox ase. Ma vara i do una lok tavanga sangsangu.”
39  * Mt 16:4La ne Iesu ga lok tidi xeretna, “Limixin at na levenaleng nedi limixin kakapmek tinotno. Di sue ri tavanga sangsangu, ketla kopmen a noxo lok tara ridi. Ketla i epovo do dina doma mumu mun leretere at leeme vapaase ali, ne Jona. 40  * Jna 1:17Jona ga nemen to xeneng at lebelen lavatmat silok at lavantun aleng kangking la lavantun aleng kanimin. La kerepmo nenia, Laradi Mevana, anaba nemen to xeneng tubu at lavatkangka at lavantun aleng kangking la lavantun aleng kanimin. 41  * Jna 3:5At laaleng ete limixin boro Nineve dinaba xatu kaxat upana la dina tong asu laxakapmek atnimi, mila diga leeng basinge laxakapmek atdi at nom laaleng diga ronga ne Jona ga vavang tidi. La lara laradi ik lok kantubu atnimi, neni i silok ti ne Jona. 42  * Mt 12:6; 1 Lav 10:1-10At laaleng ete latkin gomgo boro Sheba naba xatu kaxat la na tong asu laxakapmek atnimi limixin at na levenaleng, mila neni gat pas at lavatpas babaalom aleng kusu na ronga lakleklen at ne Solomon. La lara laradi ik lok pam kantubu atnimi, neni i silok ti ne Solomon.”
Lomlong At Lagas Kapmek
(Lu 11:24-26)
43 La ne Iesu ga lok bok, “Do lagas kapmek na oo su basinge laradi, bat pas saasaa at lengkot kopmen tadan teren, la ba reven ti toxot kusu tin ti lok mamana. Mo do noxo vuse ka toxot, 44 naba doma i xeretna, ‘Anamlong uto at no laradi, nenia aga on basinge i.’
La neni bamlong la na long lenget ka i do mo loxot imgames la ira lox avukat pam la kopmen tara ro xeneng teren. 45  * 2 Pi 2:20La neni bat pas la na lok ka bok lavanuti lubunggas, laxakapmek atdi i volo aleng i, la dibat pas la diba vubeles ap mo laradi. Kuren la mo laradi ba nemen kakapmek tino. Limixin kakapmek at na levenaleng dinabak lok kuren.”
Luvutneton Mi Nenen Ne Iesu
(Mk 3:31-35; Lu 8:19-21)
46  * Mt 13:55Iesu move ga paase ri limixin la nenen mi luvutneton diga tu ro xamang, diga vara i do dina epaase min. 47 [Lara laradi ga lok ti ne Iesu, “Nenam eburu mi luvutnetam no di tu xamang la di vara i do dina ven u.”]
48 La ne Iesu ga lok, “Nege ne naga, la nege di luvutnetak?” 49 La ne Iesu ga song ti lavaun pinivu ren la ga lok, “Na luvuttadi nedi di lok ngan ne naga mi luvutnetak. 50  * Jo 15:14; Ro 8:29Neni mun i mu asu lavavara at ne Tamak no vana at laxalibet, neni netak, kopla neinuk, kopla ne naga.”

*12:1: Lal 23:25

*12:2: Pas 20:10

*12:3: 1 Sml 21:1-6

*12:4: Mas 24:5-9

*12:5: Kex 28:9-10

*12:6: Mt 12:41-42; Lu 11:31-32

*12:7: Mt 9:13

*12:8: Mt 8:20

*12:10: Lu 14:3

*12:11: Lu 14:5

*12:14: Jo 5:16

*12:15: Mk 3:7-10

*12:16: Mt 8:4; Mk 3:12

*12:18: Mt 3:17

*12:22: Mt 9:32-33

*12:24: Mt 9:34; 10:25

*12:28: Gu 10:38; 1 Jo 3:8

*12:29: Ais 49:24; 1 Jo 4:4

*12:30: Mk 9:40; Lu 9:50

*12:31: 1 Ti 1:13; Ib 6:4-6; 10:26

*12:33: Mt 7:16-20

*12:34: Mt 3:7; 15:18; 23:33; Lu 3:7

*12:38: Mt 16:1; Lu 11:16; Jo 6:30; 1 Ko 1:22

*12:39: Mt 16:4

*12:40: Jna 1:17

*12:41: Jna 3:5

*12:42: Mt 12:6; 1 Lav 10:1-10

*12:45: 2 Pi 2:20

*12:46: Mt 13:55

*12:50: Jo 15:14; Ro 8:29