4
Takam kinkiini pa ŋgar ambaiŋana
1 O lutuŋŋan, tomoyom ta nio i. Keleŋ sua tio tutŋana ti mi motoyom iŋgalŋgal.
Naso ŋgar tiom ipet mi kikilaala ŋgar iŋgoi ta ambai ma ilip.✡Tut 1:8, 13:1
2 Ŋgar ambaiŋana ta tipaute yo pa kek, ta iŋgi be aŋkam piom i.
Tana kezem sua tio ti pepe.
3 Muŋgu ta nio naŋgaŋŋoŋ mi aŋbotmbot tamaŋ ruumu kini na, naŋgoŋ lutuunu tamen ŋonoono ta nio i.
Tana ni leleene pio ilip.
4 Indeeŋe mazwaana tana, tamaŋ ipaute yo ma iso ta kembei:
“Motom iŋgal be kiskis sua tio ila lelem, mi toto tutu tio. Naso mbot ambai.
5 Kam kinkiini be kam lem ŋgar ambaiŋana mi kilaala ŋgar iŋgoi ta ambai ma ilip.
Mi motom mbelele sua tio pepe, mi paŋoobo pa pepe.
6 Pizil ndemem pa ŋgar ambaiŋana pepe.*Pa ina ko iuulu be mbotmbot molo pa mbulu sananŋana.
7 Kam kinkiini pa ŋgar ambaiŋana. Pa ina ilip pa koroŋ ta boozomen.
Tana ru zaala be kam lem ŋgar ambaiŋana. Sombe zem koroŋ ku ta boozomen ma ila bekena kam lem ŋgar ambaiŋana, na ila lak! Nin pepe.✡Mt 13:45,46; Tut 23:23
8 Nu sombe pakur ŋgar ambaiŋana, nako ŋgar ambaiŋana ipakuru tomini.
Mi sombe yogeege lem ŋgar ambaimbaiŋan matakiŋa, nako ikam ma zom iwe biibi.
9 Ŋgar ambaiŋana ko iwe kembei mogar ndabokŋana kat tau imbot la ndomom mi iwe aigau pu.
10 O lutuŋ, leŋ sua tio ti mi kan la.
Naso mbotmbot su toono ma molo, mi kom ndaama boozo.✡Tut 3:16+
11 Nio iŋgi aŋpaute u pa zaala ki ŋgar ambaiŋana.
Aŋmuŋmuuŋgu pu, mi aŋzzo u pa zaala ndeeŋeŋana.
12 Zaala tana, ambaiŋana. Sombe pa pa, na koroŋ sa ko irao iŋgal kumbum na som.
Mi sombe loondo pa, na kumbum ko irao ikam giris ma mel na som.
13 Sua tutŋana ta aŋkam pu na, zem pepe.
Motom iŋgalŋgal mi kiskis la lelem.
Pa ina ko ikamu ma mbot ambai.
Tombot molo pizin wal sananŋan
14-15 Zaala ta zin wal sananŋan titoto na, ur kumbum ise ri sa pepe.
Kokena gaaba zin mi to zin pa mbulu kizin.
Tana pizil ndemem pa zaala kizin mi mbotmbot molo pa. Motom iŋgalŋgal zaala ambaiŋana men mi toto.✡Mbo 1:1, 17:4-5; Tut 1:15, 3:31
16 Pa wal sananŋan ŋgar kizin ta kembei: Aigule ta boozomen bela tikam mbulu sananŋana sa, tona lelen ambai mi tisu murin ma tikeene kat len.
Mi sombe tipasaana tomtom sa som, na irao tikeenekaala matan na som.
17 Pa mbulu sananŋana ta iwe kan kini. Mi mbulu ki malmal ta iwe kan yok.
Aigule ta boozomen bela tikam, to lelen ambai.
18-19 Tana zin wal sananŋan titoto zaala ki zugut biibi.
Mi koroŋ tabe titutkat zin sala ma sursur ma tila kaŋkuruŋ su na, tikilaala som.
Tamen wal ndeeŋeŋan na, zaala kizin toro. Mbotŋana kizin kembei zoŋ mataana ta pok ma ise,
mi iyaara iyaara ma ila irao aigule palakuutu, to ka azuŋka biibi kat.✡Mt 5:13; Yo 8:12; Pil 2:15
Matanda iŋgal itundu
20 O lutuŋ, motom mar mi ŋgun talŋom pa sua ta aŋzzo i.
21 Motom mbelele sua tio pepe.
Kiskis mi ur la lelem.✡Tut 3:21
22 Pa zin wal ta so tikam sua tio ti ma iwe len, nako tindeeŋe mbotŋana ambaiŋana.
Mi sua tio ko iuulu zin ma kulin tomini imbot ambai.✡Tut 3:8
23 Motom iŋgalŋgal be mboro kat lelem. Ina koroŋ biibi ta ilip pa koroŋ ta boozomen.
Pa lelende ta ipiyotyooto mbotŋana kiti.✡Mt 12:34; Mk 7:20+; Lu 6:45
24 Mi mboro kat kwom tomini:
Kokena sua sananŋana, som pakaamŋana sa ipet pa.✡Ep 4:29; Yems 3:6
25 Motom su pa zaala ndeeŋeŋana men mi toto.
Motom rikrik pepe.✡Mbo 119:37
26 Motom iŋgalŋgal kumbum be itoto kat zaala ndeeŋeŋana.
Naso pa pai ku ma ambai men, mi irao yasipir na som.✡Mbo 119:5; Ibr 12:13
27 Kumbum ilalae mi imarmare pepe.
Kokena kam mbulu sananŋana sa.