11
1 Mbulu ki tapakaam zin tomtom mi tawatke lende koroŋ kizin na, Yooba leleene pa ri sa som.
Tana iti sombe takam ŋgomo pa koroŋ sa, na tere be tuur kadoono ma irao kat pa ka kin. Pa Yooba leleene pa mbulu ta kembei. Kokena tasala mete.✡ Tut 20:10
2 Tomtom ta so ipakurkuri ma iso ni irao, na kaimer ko ka miaŋ.
Mi tomtom ta so ikototo itunu, nako ikam le ŋgar ambaiŋana.✡ Tut 16:18, 18:12
3 Zin wal ta lelen ŋgeezeŋan na, lelen be tipa pai kizin ma ambai men. Mi ŋgar tana ta ikamam peeze pizin.
Tamen zin wal ta so tisu mini mi tiur koi pa zitun wal kizin na, mbulu kizin pakaamŋana ko ipasaana zin.
4 Anutu isombe iswe kete malmalŋana kini ma ipet kat mat, na koroŋ boozomen ta wal sananŋan tindoundou na, ko irao iuulu zin ri sa som.
Tamen mbulu ndeeŋeŋana, ina ikamkewe iti pa meeteŋana.✡ Tut 10:2
5 Zin wal ta len uunu sa isaana som na, mbulu kizin ndeeŋeŋana ta iurpewe zaala pizin.
Mi zin wal sananŋan na, mbulu kizin sananŋana ta ipasansaana zin.
6 Zin wal ta lelen ŋgeezeŋan na, mbulu kizin ndeeŋeŋana itatkewe zin pa pataŋana kizin.
Tamen zin wal pakamkaamŋan ta so tisu mini mi tiur koi pa zitun wal kizin na, koroŋ ta zin lelen pa i ko iwe kembei kilis pizin mi ikeene zin.✡ Tut 5:22, 12:13, 13:6
7 Wal sananŋan tipase pa zitun mburan, mi tiso ko tikam len koroŋ boozo.
Tamen sombe timeete, na tisula len naala raama ŋgar kizin tana. Tabe koroŋ ta tiurur matan pa i, na tire ka ŋonoono som.✡ Tut 10:28
8 Pataŋana tabe ikam zin wal ndeeŋeŋan na, Anutu ipiŋgisŋgis
ma ila izze kizin wal sananŋan.
9 Tomtom ta so ikamam ŋgar pa Anutu som, na kwoono ko ipasansaana waene bizin.
Mi wal ndeeŋeŋan na, ŋgar kizin izzo zin pa zaala tabe tiko pa pataŋana kizin.
10 Sombe wal ndeeŋeŋan timbot ambai, na kar kan ko menmeen zin.
Mi sombe zin wal sananŋan tisaana ma tila len, ina tomini ikam zin tomtom ma lelen ambai.
11 Kampeŋana ta imbotmbot se kizin wal ŋgeezeŋan na, ikamam ma kar niini ise.
Mi sua ta iwedet pa wal sananŋan kwon, ta ipasansaana kar.
12 Zin wal ta len ŋgar somŋan na, kwon pasomsom waen bizin pakan.
Mi tomtom ta so ikam kat ŋgar, nako imborro kat kwoono.
13 Zin wal ta tininin kao na, tilala ma tizzwe sua turkeŋana kizin tomtom.
Mi tomtom ŋonoono na, ni irao iswe sua turkeŋana ki waene bizin pakan na som. Tana iti irao tendemeeri.✡ Tut 20:19, 25:9
14 Sombe zin bibip ki lele sa tikamam kat peeze som, nako lele tana isaana.
Mi sombe wal boozomen tiuluulu zin bibip tana pa ŋgar, nako lele tana imbot ambai.✡ Tut 15:22, 20:18
15 Tomtom ta so imbuk sua be imender pa tomtom toro mi ikot mbun kini, nako indeeŋe pataŋana.
Tana nu sombe lelem be mbot ambai, na mbuk sua ta kembei pepe!✡ Tut 6:1+, 17:18, 20:16
16 Moori sa, sombe mbulu kini irao pa tomtom lelen, nako ikam zaana biibi.
Mi zin wal ta tikamam zaaba pizin tomtom na, tikamam len pat men. Koroŋ toro sa som.
17 Tomtom ta so iurur leleene pa wal kini mi ikampewe zin, na iuluulu itunu.
Mi tomtom ta so imuŋaiŋai zin tomtom som, ina ni ipasansaana itunu.✡ Mt 5:7
18 Kadoono ta wal sananŋan tikamam pa uraata kizin, ina ŋono somŋana.
Mi tomtom ta so iwaswaaza mbulu ndeeŋeŋana, na kadoono tabe ikam i, ina koroŋ ŋonoono.✡ Tut 22:8-9; Ga 6:8-9; Yems 3:18
19 Tomtom ta so ikam kinkiini be ito mbulu ndeeŋeŋana, nako ikam mbotŋana ambaiŋana.
Mi zin wal ta tirru zaala pa mbulu sananŋana, nako timetmeete ma tila len.
20 Zin wal ta tikamam ŋgar sananŋana na, Yooba leleene pizin ri sa som kat.
Mi zin wal ta tipa pai kizin ma ambai men na, ni leleene pizin ilip.✡ Mbo 15:1-2, 101:4, 119:1; Tut 12:22
21 Lelem iwe ru pepe. Wal sananŋan na, Anutu irao ileele zin na som. Zin kola tire kadoono pa mbulu kizin.
Mi wal ndeeŋeŋan ziŋan popoŋan kizin na, zin len uunu sa isaana som. Tana pataŋana sa ko irao ikam zin na som.
22 Moori ta so ruŋguunu ambai, mi tamen ipizil ndemeene pa mbulu ambaiŋana,
ina kembei aigau ta izuk koroŋ buzaanaŋana.
23 Wal ndeeŋeŋan lelen pa koroŋ ambaimbaiŋan men. Tana kaimer zin ko tindeeŋe kampeŋana ambaiŋana.
Mi wal sananŋan na, tiurur matan pa koroŋ sananŋan men. Tana kaimer Anutu kete malmalŋana kini ko ikam kat zin.✡ Ro 2:8-9
Matanda kon pepe
24 Tomtom ta, ni mata merereŋana mi irairai koroŋ boozo pizin tomtom. Tamen koroŋ ta imilmiili pini na, boozo ma ilip.
Mi tomtom toro, ni mata konŋana, mi ikiskis koroŋ kini ta boozomen. Tamen molo som na, koroŋ kini tana imbiriizi, mi isu ma imbot ŋoobo.✡ Mbo 112:9; Tut 22:9; 2Kor 9:6-9
25 Tomtom rairaiŋana ko ikam mboti ambaiŋana.
Pa tomtom ta so ise yok mi ikam pizin wal pakan, na itunu ko iwin kana tomini.✡ Lu 6:38
26 Tomtom ta so iruutu kini kini pa mazwaana ki peteele, nako tipiri sua sananŋana pini.
Mi tomtom ta so iyok pizin tomtom be tiŋgiimi kini kini na, kampeŋana tabe imbotmbot se kini i ko ikam ma zaana iwe biibi.✡ Un 41:53-57
27 Zin wal ta tikamam kinkiini pa koroŋ ambaimbaiŋan, nako tindeeŋe kampeŋana biibi.
Mi sombe ŋgar kiti ilala pa koroŋ sananŋan men, na mbulu sananŋana ko ipet piti.✡ Mbo 7:15-16; Mt 7:12
28 Tomtom ta le koroŋ boozo mi ipase pa, na mbotŋana kini ko isaana.
Mi wal ndeeŋeŋan na, zin kembei ke ka saluundu ta indom ma ise i.✡ Mbo 1:3, 49:6-8; Mk 10:25; 1Tim 6:17
29 Tomtom ta so ikamam pataŋana pa wal kini, nako irao ikam le matamur sa na som.
Mi wal kankaanaŋan ta tizorzooro na, zin ko tiwe mbesooŋo sorok pizin wal ta len ŋgar ambaiŋana na.
30 Wal ndeeŋeŋan tiuluulu zin tomtom be timbot ambai, kembei ke ta ipiyotyooto ŋonoono ambaimbaiŋan.
Mi zin wal ta tikamam zaaba pizin tomtom na, tipunun zin tomtom ma timetmeete.
31 Iti tuute: Indeeŋe ta wal ndeeŋeŋan timbotmbot men su toono na, tikamam len kadoono ambaiŋana pa mbulu kizin.
Kenako toso parei pizin wal sananŋan mi zin wal ta tikamam ŋgar pa Anutu som na? Zin tomini ko tire kat kadoono pa mbulu kizin.✡ Mbo 11:5-7, 73:17-19; 1Pe 4:17-18