Ioni
Ya Iginuma
Naona
Buki Taina Wayahina
Tomotau habuhabui ivitumahana buki taina a tau ginuma Sebedi natuna ana wava Ioni, Iesu a tau hae ananina aitam. Tauna mani buki kadu mani leta ginumi Awaeha Vovouna taina nihenina.
Ka pai mini leta taina nihenina aitonu. (1) Ioni ya nuanua itoka tau ekalesia Yaubada kadu tauna Natu‑hoina Iesu Tau Ito‑yavuha nui kavi‑yaianei. (2) Ka ya nuanua itoka tau ekalesia mani tau ekalesia kadune‑nuanuaiei kadu kadewa‑vidovidohei. (3) Ka ya nuanua itoka tau ekalesia nau‑vi‑avinika leta taina wayahina tau viwavenena vitupu wayahi.
Ioni avaha anamanei viwavenena vitupu ana pata tau ekalesia yai vi‑yaiana Yaubada wayahina kadu Iesu wayahina vi‑goyoi. Ka kadu anamanei viwavenena vitupu dewa goyona nꞌ‑awaehei na‑nu ekalesia nihenina.
Tau viwavenena vitupu ivonavona tanopi taina goyona, ka aituhu aviyaivia tanopi taina wayahina ini‑awana, dewa goyona vinꞌ‑omo dewaia wayahina. Tau vitupu‑naia iawaehei Iesu ahihinata. Wayahina, ivitumahana eha ana pata Iesu vi‑tomotau itoka tomotau deina. Ka aituhu deina, tauna vi‑gawama tanopia. Ka kadu aituhu tauna vi‑tomotau, ana pata nꞌ‑aniga. Kate taui eha ivitumahana tauna aniga. Ka kadu tau vitupu‑naia ivonavona eha ana pata ininika ito‑yavuha ivaniahei, kate nuaka ana heta ana pata ito‑yavuha ivaniahei. Ka aituhu deina, aviani tomotau yai nuanua idedewei inini nihenina, vivane kenene o mani dewa goyona, dewaia eha aitam aviani. Iuna ininika eha aitam aviani Yaubada matana.
Ioni anamanei viwavenena tanoi vitupu. Vona ahiahina, Iesu vi‑tomotau, itoka tomotau deina. Ka kadu tauna yanꞌ aniga dewa ananina. Aituhu eha yanꞌ aniga, akanai eha ana pata tauna aniga wayahina na‑mini‑havine!
Ioni ya nuanua itoka tau ekalesia habuhabuka Yaubada kadewa‑vidovidohei, ka kadu tauka nau‑wawanika mani tau ekalesia kadewa‑vidovidohei.
1
Yawai Ana Vona
1 Tuta naona a itoava tuta ataina wayahina, Yawai ana Vona maꞌ‑vavaha. Vonana wayahina aginuginumi wayahimia. Tauna avaha tanihaia anononi, kadu mataia adueyei. Tauna avaha adune‑vi‑anai, kadu onotona nimaia avo‑dadani, ka dewaia avaha anamane‑yehai, akanai ataina ahaehaeyei.✡Ioni 1:1. 2 Iuna tauna avaha omoi, ka itoai avaha adueyei, kadu ataina ahaehaeyei wayahimia. Nonova Yawai‑vavaha ka Amana ainua imamaei, ka munia omo wayahiaia, adueyei. Ka tuta ataina wayahina tauna anaunau‑waheyei wayahimia.✡Ioni 1:14. 3 Ka itoai avaha tauna yana dewa adueyei kadue anononi, ka ataina wayahimia ahaehaeyei, e yama nuanua vivane itomi nui kavi‑yaiana. Iuna itoai avaha Amaka kadue tauna Natu‑hoina Iesu, Tau Ito‑yavuha, nui avi‑yaiana. 4 Wayahina yami leta taina aginuginumi, una‑iavi, e unꞌ‑anamanei adewa‑haiawa‑iaua.✡Ioni 16:24.
Yaubada Maheta‑hoina
5 Ka aitam mataeda Yaubada Natu‑hoina wayahina anononi, e ataina amataedami. Ka mataedana taina. Yaubada vivane maheta‑hoina, ka eha aitam aviani novanovanina tauna nihenina.✡1Ti 6:16; Iam 1:17. 6 Aituhu novanovanina a papania emamaei, ka aituhu evonavona, “Avaha Yaubada nui avi‑niana,” akanai wamke yam vonana vivane vona vitupu, ka eha dewa tunuhina ededewe.✡1Io 2:4. 7 Kate Yaubada maheta a papania mamaei. Wayahina, aituhu maheta a papania tauna nui kamamaei, ana pata habuhabuka kavi‑yaiana ahiahina, kadu Yaubada Natu‑hoina, vivane Iesu, tauna dayahina hadahadanika yaka goyona aitamoata aitamoata wayahina.
8 Aituhu evonavona, “Yauke ahiahiu. Eha aitam dewa goyona ata‑dewe,” akanai vonana wayahina taum enonom, ka vona tunutunuhina eha ta‑mamae nihenima.✡Sam 32:5; V.T 28:13. 9 Ka aituhu yaka goyona kahaehaeyei ahiahina, kadu aituhu kanua‑vinana dewaia wayahia, akanai Yaubada dewaia goyona aitamoata aitamoata wayahia na‑nua‑piahika, kadu yaka goyona habuhabuna na‑nosi‑yavuneyeka. Iuna tuta tuta tauna yana vona ka yana dewa aitamoata, ka nonova tauna ya vona‑dabadaba boui vivane dewei deina. 10 Aituhu evonavona, “Eha aitam tuta goyona ata‑dewe,” vonana anꞌ anamana vivane, “Yaubada vivane tau vitupu.” Aituhu ededewei deina, Yaubada yana vona eha aitam pai vi‑ai yawaim nihenina.