3
Ioni Tau Bapitaiso Ya Nau‑wahe
(Mateu 3:1-12; Marika 1:1-8; Ioni 1:19-28)
1 Ka munia aitam ponimana omo, ka tau veimea ai wava tupwai deina. Me Rom ai tau veimea (o kadi yai sisaV) ana wava Tiberiusi, ka tauna avaha vi‑sisaV ponimana ai yau 15 iakwa. Ka papani Iudea a tau veimea Rom wayahina ana wava Ponitiusi Pilate. Ka papani Galili a tau veimea ana wava Erodi, ka tauna vaneina ana wava Pilipi papani Iturea kadu papani Tarakonitisi veimeyei. Ka papani Abilene a tau veimea ana wava Lisaniasi. 2 Ka Anasi kadu Kaiapasi ainua tau vi‑nomu anani. Ka ponimana tanoi nihenina Yaubada yana vona omo Sekaria natuna ana wava Ioni wayahina. Ka tauna papani anata mamaei. 3 Wayahina, Ioni udanata ni‑tawanei, omo Daudau Ioridani a papani wayahina, e tomotau tenoke naunau‑wahei, ivona, “Itomi nau‑wawanimi yami dewa goyona uvihahaiei, e avi‑bapitaisoemi, e Yaubada yami goyona na‑nua‑piahi deina.”✡Dew 13:24. 4 Nonova tau apa‑taputapu ana wava Isaia yana buki nihenina ginumi deina, ka Isaia Ioni yana dewa apa‑taputapuei, ivona,
“Tau vi‑hone aitam udanata movina ananina
vi‑honehone, ivona,
‘Nau‑wawanimi Kauvea ya etawana uvunahi
kadu uvo‑vi‑tunutunuhi,
ka ya paisewa uvo‑vi‑meani deina!✡Isa 40:3-5.
5 Nau‑wawanimi avi awa‑haha ataina imamaei
uvi‑nau‑vi‑anai nau‑peuna,
kadu avi oya o avi atu‑oyaoyana ataina imamaei
utana‑yaveni.
Ka nau‑wawanimi avi etawana bwagobwagona
uvo‑vi‑tunuhi,
kadu avi etawana vitana
uvo‑vi‑meani.
6 Iakwa, e tomotau habuhabui
ito‑yavuha Yaubada wayahina idueyei!’ ”
7 Ka tomotau habuhabui iomomo Ioni wayahina, iuna yai nuanua tauna vi‑bapitaisoei, ka Ioni naunau‑wahei, ivona,
“Ia! Taumi tau vitupu, mwata deina! Avaha uanamanei Yaubada ya nua‑goyo kadu ya dewa‑yaiyai inꞌ‑omo, ka ataina yami nuanua dewaia ainua una‑novo‑tawanei, a?✡Mat 12:34; 23:33. 8 Akanai ka, nau‑wawanimi yami nua‑vinana ahiahina Yaubada uviwavenei yami dewa ahiahina wayahia. Eha uvonavona wayahimia, ‘Itoai Abaraham ya tupua‑nenenehi. Wayahina, vona ahiahina, Yaubada dune‑nuanuaieai.’ Ataina avonemi eha ana pata! Memeanina Yaubada wayahina hanu taina wayahia tauna Abaraham ya tupua‑nenenehi vovoui vevewane‑neiei.✡Ioni 8:33, 39. 9 Udune‑vivinimi! Aituhu yami dewa eha ahiahina, tuta eha ani‑hoina na‑iakwa wayahina Yaubada na‑tana‑yavunemi, tomotau ai eha uana ahiahina itana‑yavunei aitamoata deina. Ka Yaubada ai ananata nihenina na‑onemi nꞌ‑anaimi.”✡Mat 7:19.
10 Ka yokoia Ioni ivi‑tanaiei, ivona, “Aituhu yam vonana tunuhina, aviani nau‑wawaniai adedewei, e avidoha Yaubada matana?”
11 Ka Ioni vona‑nau‑pata, ivona, “Aituhu aviyaivia wayahimia ami kwama ainua, ka aituhu koiaka eha ana kwama, akanai tauna aitam uvenei. O aituhu aviyaivia wayahimia ami maꞌ anani, akanai tau am navovo uvo‑patai.”
12 Ka takesiV a tau vitue tupwai iomo ai bapitaiso wayahina, ka taui Ioni ivi‑tanaiei, ivona, “Tau Viwavenena, medeina eveimeyeai?”✡Luk 7:29.
13 Ka Ioni ivona, “Nau‑wawanimi takesiV uvivitue takesiV a veimea aitamoata deina, ka eha yami nuanua uboubou hetana.”
14 Ka tau nau‑havia tupwai ivi‑tanaiei, ivona, “Ka itoai medeina ama veimea?”
Ka Ioni ivona, “Eha tomotau uvo‑vi‑matautei, e taui yai kina ivenevenemi, ka eha uvitupu‑kavokavovo tomotau wayahia. Ka nau‑wawanimi ami nau‑pata ataina wayahina udewa‑haiawa. Eha tuta tuta unau‑vonuvonu ami nau‑pata wayahina.”
15 Ka tomotau habuhabui Tau Ito‑yavuha yana omana ipotepotei, ka tupwai inuanua‑mwagemwage tauna vivane Ioni. 16 Wayahina Ioni vonei, ivona,
“Yauke daudaua avi‑bapitaisoemi. Ka aitam onoto muniua omomoi, ka tauna vi‑bapitaisoemi dewa ainua wayahia, vivane Nuana Ahihinata wayahina, ka kadu ai ananata wayahina. Ka tauna bagibagi‑tawaneu deina. Eha nau‑wawaniu aena anꞌ ae‑yapayapa a manawa ayavuhi, iuna tauna ananina, ka yauke kikitu.✡Dew 13:25. 17 Ka onoto‑nana yana ipea witiV na‑yueyue, e uana imaumaua. Ka munia, tauna uana ahiahi na‑totohi yanꞌ anana nihenina, ka hainina ai ananata‑vavaha nihenina na‑tunui.”
18 Ka Ioni tomotau naunau‑wahei vona habuhabuna ka tunina tunina wayahia, ka Vaneana Ahiahina naunau‑waheyei.
19 Kate Ioni KiniV Erodi yapoyapoi, iuna Erodi avaha vaneina awana ai wava Erodiasa awa‑nemei ka tavine‑tamanei, ka Ioni kadu Erodi ya goyona tunina tunina haehaeyei.✡Mat 14:3-4; Mar 6:17-18. 20 Ka aitam auyewa Erodi Ioni poyꞌ‑avini, e manua yohona nihenina boui. Ka dewana wayahina Erodi tauna ya dewa goyona vo‑vi‑natei.
Ioni Iesu Vi‑bapitaisoei
(Mateu 3:13-17; Marika 1:9-11)
21 Ka tuta tanoi wayahina, tutana Ioni ni‑awana ka paipaisewa, tauna yoko habuhabui vi‑bapitaisoei. Ka munia, kadu Iesu omo wayahina, e Ioni kadu Iesu vi‑bapitaisoei. Ka Iesu Yaubada wayahina viama, ka wahuma am‑waei, 22 ka Nuana Ahihinata opu‑me Iesu wayahina aitam bunebune deina. Ka aitam movi wahuma wayahina Iesu vonei, ivona, “Wamke Natu‑hoiu adune‑nuanuaiem, ka wayahim adewa‑haiawa ananina.”✡Ioni 1:32.
Iesu Ya Tupua‑nenenehi
(Mateu 1:1-17)
23 Ka tutana Iesu a ponimana ai yau 30 vaniahei, tauna ya paisewa tomotau wayahia vi‑putu. Ka tomotau habuhabui ivitumahana‑kavokavovo vivane tauna amana Iosepa.
Ka Iosepa amana Eli✡Luk 4:22; Ioni 6:42.
24 ka Eli amana Matati
ka Matati amana Levi
ka Levi amana Meliki
ka Meliki amana Ianai
ka Ianai amana Iosepa.
25 Ka Iosepa amana Matatiasi
ka Matatiasi amana Amosa
ka Amosa amana Nahum
ka Nahum amana Esili
ka Esili amana Nagai.
26 Ka Nagai amana Maati
ka Maati amana Matatiasi
ka Matatiasi amana Semeini
ka Semeini amana Ioseki
ka Ioseki amana Ioda.
27 Ka Ioda amana Ioanani
ka Ioanani amana Resa
ka Resa amana Serubabela
ka Serubabela amana Sealitieli
ka Sealitieli amana Neri.
28 Ka Neri amana Meliki
ka Meliki amana Adi
ka Adi amana Kosam
ka Kosam amana Elimadam
ka Elimadam amana Eri.
29 Eri amana Iosua
ka Iosua amana Elieseri
ka Elieseri amana Iorim
ka Iorim amana Matati
ka Matati amana Levi.
30 Ka Levi amana Simeoni
ka Simeoni amana Iuda
ka Iuda amana Iosepa
ka Iosepa amana Ionam
ka Ionam amana Eliakim.
31 Ka Eliakim amana Melea
ka Melea amana Mena
ka Mena amana Matata
ka Matata amana Natani
ka Natani amana Davida.
32 Ka Davida amana Iese
ka Iese amana Obedi
ka Obedi amana Boasa
ka Boasa amana Salimoni
ka Salimoni amana Nasoni.✡Rut 4:17-22.
33 Ka Nasoni amana Aminadaba
ka Aminadaba amana Adamini
ka Adamini amana Arani
ka Arani amana Esironi
ka Esironi amana Peresi
ka Peresi amana Iuda.
34 Ka Iuda amana Iakobo
ka Iakobo amana Isaki
ka Isaki amana Abaraham
ka Abaraham amana Tera
ka Tera amana Naori.
35 Ka Naori amana Seruge
ka Seruge amana Reu
ka Reu amana Pelegi
ka Pelegi amana Eberi
ka Eberi amana Sela.
36 Ka Sela amana Kainani
ka Kainani amana Arapakisadi
ka Arapakisadi amana Semi
ka Semi amana Noa
ka Noa amana Lameki.✡Nao 11:10-26.
37 Ka Lameki amana Metusela
ka Metusela amana Enoki
ka Enoki amana Iaredi
ka Iaredi amana Mahalaleli
ka Mahalaleli amana Kenani.
38 Ka Kenani amana Enosi
ka Enosi amana Seti
ka Seti amana Adam
ka Adam amana Yaubada.✡Nao 4:25-26.
✡3:4: Isa 40:3-5.
✡3:19: Mat 14:3-4; Mar 6:17-18.
✡3:32: Rut 4:17-22.
✡3:36: Nao 11:10-26.
✡3:38: Nao 4:25-26.