4
Diyabolo Yesu ye nohoi
(Maleko 1:12-13, Luka 4:1-13)
1 Na kabo Yaluwa Tabuna Yesu ye laei balabalaena bena diyabolo iya ye nohoi. 2 Menai ye kaihudi ye lau mayadai 40 yo boniyai 40, ede ye hasali. 3 Na taunohonoho wa ye laoma kalinaena ye wane, “Ena kowa Yaubada Natuna, ku hededelau weku ta udiyedi se hemala pwalawa.” 4 Na Yesu ye wane, “Yaubada kalinana unai ta hasili ye wane,
‘Tamowai taba nige pwalawa mo unai ye maumauli, na Yaubada yona hedehedede maudoidi udiyedi hinage ye maumauli.’ ” (Dutelonomi 8:3)
5 Na kabo diyabolo wa Yesu ye laei magai lakilakina tabuna** Magai lakilakina tabuna ne meta Yelusalema. unai na ye saei Numa Tabuna kewana tehana saesaekalilina unai ye hetolo, 6 na ye hededelau unai ye wane, “Ena kowa Yaubada Natuna, kabo ku kamposidobi. Matawuwuna buka tabuna unai se kuli se wane,
‘Yaubada kabo ye hededelau yona anelu udiyedi na se kitahetetego,
kabo nimadiyena se kabisinigo, na taba nige gonowana kaem ne ku koiyedi weku udiyedi.’ ” (Same 91:11-12)
7 Na Yesu ye hededebui ye wane, “Na hinage buka tabuna unai ta hasili meta ye wane,
‘Tabu Guiyau yom Yaubada ku lautonogi.’ ” (Dutelonomi 6:16)
8 Na kabo diyabolo wa Yesu ye laei kuduli saesaekalilina unai na tanoubu ta basileiyana maudoidi yodi namwanamwa saesaedi ye hekita 9 na ye wane, “Ena ku tulibono yo ku tabaꞌohu kaliguwai, kabo ginauli maudoidi ta ya haidiwa.”
10 Na Yesu ye wane, “Satani, ku tausuwala! Matawuwuna buka tabuna unai ye wane,
‘Guiyau yom Yaubada ye bom mo ku hekasisiyei, yo iya ye bom mo unai ku tabaꞌohu.’ ” (Dutelonomi 6:13)
11 Ede diyabolo wa Yesu ye laugabaei, na anelu se laoma Yesu se kitahetete.
Yesu ye hetubu ye lauguguya
(Maleko 1:14-15, Luka 4:14-15)
12 Huya hesau Yesu wasa ye lapui meta Yowane se haiyako na numatutugudu unai se tole. Ede Yudeya ye laugabaei na ye uyo Galili. 13 Nige ye uyo yona magai Nasaleta, na ye lau Kapelenauma unai ye miya, Galili Gabwana dedekanaena, meta Sebulona yo Napatali tehadiyena. 14 Unai saha Aisaiya peloweta ye hededeyako wa ye hemamohoiyei:
15 “Sebulona tanona yo Napatali tanona,
tanodiyao udiyedi keda ye dobi gabwa,
tano Galili Gabwana dedekanaena,
Yolidani sagasagana hali sanakawasina,
Galili tanona dagela tamowaidiyao yodi kabamiya,** Sebulona tanona yo Napatali tanona yo tano hedehedededi maudoidi ne kaniyodi ede teha Galili tanona, na peloweta Aisaiya Galili tanona hesadiyao beyabeyadi udoiꞌudoi ye kataidi.
16 siya masigili unai taumiya wa meta mala lakilakina se kita,
yo mwaloi logulogunaena taumiya kalidiyena mala ye sina.” (Aisaiya 9:1-2)
17 Tenem huyana ne unai Yesu ye hetubu ye lauguguya ye wane, “Kwa nuwabui, matawuwuna ede galewa basileiyana ye hanahanaumako.”
Yesu yona hekahekatao bagubagunadi ye yoganeidi
(Maleko 1:16-20, Luka 5:1-11, Yowane 1:35-51)
18 Huya hesau Yesu ye yona ye laulau Galili Gabwana dedekanaena ede tauyamayama labui ye kitadi yodi hinaya udiyedi se yamayama. Tamowaidiyao ede Simona – hesana hesau ede Petelo – ma kana kaha Andeleya. 19 Na ye yogadobi udiyedi ye wane, “Kwa saema kwa hemuliwatanigau, na kabo ya hekatagomiu tamowai tauyamayamaidi.” 20 Ede mahanana ne unai yodi hinaya wa se laugabaeidi na se saema se hemuliwatani.
21 Se tausigilau, na kabo Sebedaiyo ma natunao Yamesi yo Yowane ye kitadi yodi waga unai, yodi hinaya se polapolaidi. Na Yamesi ma kana kaha Yowane ye yoganeidi. 22 Mahanana ne unai tamadi yo yodi waga wa se laugabaeidi, na Yesu se hemuliwatani.
Yesu taukasiyebwa ye henamwanamwadi
(Maleko 1:39 yo 3:7-12, Luka 6:17-19)
23 Yesu Galili maudoina ye tauhetakikili na yodi sunago udiyedi ye lauhekata. Yaubada yona basileiya wasana namwanamwana ye hededehemasalaha, yo hinage tamowai kadi kasiyebwa udoiꞌudoi ye henamwanamwadi. 24 Yesu wasana Galili tehana maudoina ye tauhetakikili, yo hinage ye lau ee Siliya tanona maudoina unai. Na tamowai kadi kasiyebwa udoiꞌudoi se laedima Yesu unai, kasiyebwa doha taukamkamna, yo yaluwa yabayababadi tamowai se luwuidi, yo taukikikikiwasi, yo hinage taubunibuni, na ye henamwanamwadi. 25 Na teha Galili, Dekapolisi,** Dekapolisi kaniyona ede magai lakilakidi saudoudoi, yo iya hinage magai ne tehadi hesana. Yelusalema, Yudeya, yo Yolidani sagasagana hali sanakawasina udiyedi bodalakilaki se laoma Yesu se hemuliwatani.
**4:5: Magai lakilakina tabuna ne meta Yelusalema.
**4:15: Sebulona tanona yo Napatali tanona yo tano hedehedededi maudoidi ne kaniyodi ede teha Galili tanona, na peloweta Aisaiya Galili tanona hesadiyao beyabeyadi udoiꞌudoi ye kataidi.
**4:25: Dekapolisi kaniyona ede magai lakilakidi saudoudoi, yo iya hinage magai ne tehadi hesana.