49
Iakob gagalowa ompa me obampa mampo wade
1 Mape Iakob obampa diamono mampe auweieno tauma me wane wanase, “Dima e manlawo ando segalepia umanawa wapo etana.
2 Ne obaina, winlene asisuneana!
Ne Iakob e mamala asisuneana.
3 Ruben, e ipa ne otona tautuwa,
ne apana sanaa mukamukaua wainedina walamawe e gamoena.
E apana debama ita mukamukaua mai ne obaina isiwa ruau, dia.
4 Tane e dewaa ipa abaia noseidie leusaituleidia rua,
mai mida enabodaepia rua, dia.
Tauma e ando mai eboeboua segaita, dia.
Ipawa e mamaa manainapa nata ninaiten
ita e mala debamaia ne osonawo ituana.*Ruben Iakob manainapa Bila ninasan (Bumpaida 35.22).
5 Tane Simion e wana Liwai nata e dewala deawaa.
E nata onala puraiwa oteile mampe rebareba onaitilana.
6 Ne ando mai e manlawo wimpa ba e waninala bedewenteapa, dia.
Ipawa e nuala kadileidia walamawe apana bomoilana†Simion Liwai nata bola debama Sikem bedewe apana bomoiena umanawa wade (Bumpaida 34.25-31).
tane do e waninaitilana walamawe kau wau epawirosimoilana wasi baiwa.
7 Ita e nata eba nuasigasigaitilana baiwa,
God matangelawa osolawolepio kadiwa rebarebaida dewasanuno segalempa.
Sa baiwa ne e tanalepo Israel damba waimoia bolau bedewainta deawantana.
Iakob sau euda Iuda osowe itude
8 Iuda, e sosoa ando ituposiempa ita e mamaa obampa e manawo imimpu emisintompa,
ipawa e emalawoa apanawa gadompau osowe wadadomone aimona.
9 Iuda ne otona, e ipa pue onawa laion rua,
pue sa moiawa adediboe nadie aupe aleidie bubualeidia rua.
Mida wisepie e sinsiepi?✡Gagalo 5.5
10 Ita warere koinawa Iuda witape winepi ita e nosinosia warerentompe waimompo koina sa apanawaida wisepi.
Ita dan uwa daitada apanawa me aiawa ruawantompa.
11 Tane e manawo wain eubu iawa uarakadilepi
ita e donkia wadone aitone wain iawa osowe taunadoe ena,
ita e donki otopa sanaa wadone aitone wain iawa euda
osowe taunadoe ena.
Ita wain ipawa naumpatewampo nampalewae moawa
winompo mampe garawa mitamompa.
12 Me emawa osinakadilempa wain rua
ita moawa nepa sapusapuaida ama sogapa rua segalepi.
13 Tane Sebulun, e ando owa tampe bolaa dewasae wana
ita e bolaawo waa wimompe odompe obasa euwa bedewe enompa,
ita e tawoa alepia makawa bola debama Saidoniwa enepitudepi.
14 Ita Isaka, e ipa donki dea mukamukauaida
puraiwa saiwa do obasa di ituitona.
15 Tane e aitone bola euda ewone wanempe bubuaitona,
tane apana da nolau dewasaa baiwa
dieempe sai debama osoawo itumpo nolaitona.
16 Tane Dan, e ionoite wane apanaa oniamona
Israel damba isiwa ruau.
17 Tane do e ipa mota kadiwa onawa rua inta waiwe anuitone wanempe
ita oas wimompe antompa e rowoitone wau adona.
Ita mo poka etompe apana osouwo waimoia epaubamompo nomompa.
18 O Iawe God ne sumanaiantedine intaewaewantedina inanea baiwa.
19 Tane Gad, e poi apanawa wadeepue kadiepua baiwantompo
e mo onau enee tanamowo antopu.
20 Ita Asea, e ando iraitona bedewe nanaa eubu daitada inintompa
ita nana sa wadone laulaitona ewaewa eudida warere ewompe nanawa menasampa.
21 Tane Napitali, e ipa pue ebowa waia dia,
taudosia di leidia rua wanempe sedaa eubu os gamoitona.
22 Tane Iosep, e ipa wain naunautetela rua,
wain naunautetela sa esa aleidia tampe enede
ita ragapu gonaa asiasi inintompe odompe antompa.
23 Tane e emalawoa apanawa nuakadintopue
ona badowa dewasapue pidu mampe enepue
ita kadiwa daitada dewasapu e manawo.
24 Ita Iosep, e pidu teinee badowa enakasaitaa mabua mai garigarilepi, dia.
Ipawa Iakob Godiwa ipa mukamukaua
ita do Israel onioniau Godiwa,
me ipa seu e sauepio osowe badowa enakasaitaa.
25 Ipawa mamaa Godiwa mida e sauedia
ita me mida mukamukauaida sauwa euda osoawosapi,
me sauwa euda unu uboe wapiaubepio iepi
ita do dogo bedewe esa dewasapio wisepi
ita puea otootontompe uarantompa.
Ita do e nosinosia uaraia eneepi.
26 Tane e mamaa sauwa ipa debamaidalen
mai wadi debamau osowe sau iedia rua.
Tane e mamaa sauawa ipa debamaidalene wadi uduudu amboiamon.
Iosep, tatataa bedeuwoe ionoitaa
ita sau euda e osoawolempo wanempa.
27 Ita Beniamin, e ipa elo onawaa rua,
tadinaida e moia bomone nana
tane rawilempo e moia sa kampa odaitona.”
28 Tane ema ipa Israel damba 12, ita mo mambu dima insedie ita dewau ewedia rua wane mo deadea osouwo sau euda itun.
Iakob bowa gagalowa
29 Ita me mo diadewasamone wanase, “Ne bonteape mamamana wawo anteapa baiwantedina. Tane e ne mamamana bontone wineiawo Itai apanawa Epron bolawe guba bedewe dobosaneana. 30 Tane guba sa bola Mapela Mamre tampe Kanaan bolawa bedewe winede. Abraam Epron Itai apanawa bolawa uduudu bo teamompa baiwa gimaralene en. 31 Ita sape Abraam manainapa Sara nata ita Aisak manainapa Rebeka nata dobosamoiena ita do ne Lea sape dobonten.”✡Bumpai 35.29
33 Tauma Iakob obampa diadewasamono dialeno aupe me wawa nukusamone ita ituwa bolawa oso itulene ita boleno aleupa me nosinosiwa bontone antonawo wawo alen.✡Aposel 7.15
Iakob Isibt bedewe waina enawa 17 waden ita meida ena ipa 147 waden.
*49:4: Ruben Iakob manainapa Bila ninasan (Bumpaida 35.22).
†49:6: Simion Liwai nata bola debama Sikem bedewe apana bomoiena umanawa wade (Bumpaida 34.25-31).