48
Iakob sau euda Eparaim ita Manase osouwo itude
1 Walama isiwa diantono aupe apana Iosep diane waienase, “E mamaa kero waden.” Me epe etene obampa Manase ita Eparaim otamone Iakob ewapua baiwa antoiena.
2 Mo wimoieno apana ewamone Iakob diane waienase, “E otoa Iosep eweepia baiwa wisen.” Iakob epe etene meba enapona babisadie tane kasawogalene enenwisene ituwa bolawe wain.
3 Ita Iakob otopa Iosep diene wanase, “Ne bola Lus Kanaan bolawa bedewe wainedino God Mukamukaua mainawo segalene ita sau euda ne osonawo itune,✡Bumpai 28.13,14 4 dianene wanase,
‘Ne e dewaepo obana uarantopu, do dewaepo nosinosia uarantopue uwa daitada segantopu ita do bola ema e nosinosia wanamopo bolauidawanalepio wankasantopu.’ ”
5 Me gagaloleidie wanase, “Tane e obana nata Isibt bedewe wainiano muntono, muriwa ne mape winena, Eparaim ita Manase mo ipa neida nebaana ne obaina Ruben ita Simion ruau. 6 Tane e obana isiwa muriwa gamomona sa ipa e ebaa, ita mo ando tatatau Eparaim ita Manase ebou asiasi bolau wadapu.
7 Tane ne bola Padanwae leuntene iedino Reitel boleno bola Kanaan tawowa bedewe, sa ipa bola debama Epra (ebowa da waia Beteliem) tampentite ita sape ne nuapareidantedine ita Epra intawa waiwe me dobonten.”✡Bumpai 35.16-19
8 Ita Iakob Iosep obampa nata ewamone wanase, “Ema e obana ba?”
9 Ita Iosep wanase, “Ne Isibt bedewe wainedino God sedana ema nata nen.”
Ita me epe etene wanase, “E mo banlamoe mainawo wino sau euda mo osouwo itupa.”
10 Tane Iakob gulauidalen emawa oaoaraidalen mai sala ewepidewalepia rua, sa baiwa Iosep sedawa banlamone mampe wiseno me seda sa otamone mampemone isuruwamon. 11 Ita Iakob Iosep diene wanase, “Ne insedina ne mai ibua ewapa tane God ne oniadewasanedio e obana do wileno ibula ewana.” 12 Tauma Iosep obampa atau abupa osowe waimoia otamone nambemone aupe Iosep dunelene mamba auwasan. 13 Tane Iosep obampa nata, Eparaim mamba witapa on deneuwe enene namba Iakob witapa sen deneuwesan. Ita Manase mamba witapa sen deneuwe enene namba Iakob witapa on deneuwesan. Ita banlamone Iakob mampe wisen. 14 Tane Iakob witapa leusaitumone on oto kerauwa Eparaim osowe itun ita sen oto tautuwa Manase osowe itun. 15 Ita Iakob sau euda Iosep osowe itune wanase,*Iakob sau euda Eparaim ita Manase osouwo itude. Mo ipa Iosep obampa, mo sau sa osowo itudie ita Iosep do sau euda osowe itun.
“God mida ne atana Abraam ita mamana Aisak wadaposisaia,
God sa ne inawana bedewe walama uduudu oniadewasanedie,
me ipa sipsip onionila apanawa rua.
16 God enseliwa poka bedewe ne saunene inanena rua seda ema nata sau euda osouwo itupie oniamopi.
Tauma ne rauparintedina, apana ando seda ema ebou asiasi ne ebona,
ita do ne atana Abraam ita mamana Aisak ebou insempa.
Ita do rauparintedina mo otootontopue tawo ema
osowe nosinosiu uarantopu.”
17 Mape Iosep mamba Iakob witapa on Eparaim osowe itudio ewene mai menasapona, sa baiwa me mamba witapa wadapaaubepe otopa Manase osowe itupona baiwaleidie.†Israel apanawa inseia wita on ipa mukamukauaida mai wita sen rua, witapa sen, ipa oaoaraida. Iakob witapa on oto kerauwa osowe ituna me ando sau euda debamawa wadepi. Sa baiwa Iosep, Iakob witapa on oto kerauwa osowe itudio ewene memesalen. 18 Ita Iosep mamba diene wanase, “Mako mai epe dewasaa, ne otona tautuwa Manase uwawa osowe witaa on itua.”
19 Tane mamba me aiawa etendabue wanase, “Otona, ne dima atentena rua dewasadina. Manase ando ebowa debamalepi ita do dan ua dea segalepi. Tane me wamba ebowa debamaidalepi ita do nosinosiwa uarantopue dan uwa daitada segantopu.”
20 Ita walama sawo me sau euda mo osouwo itune✡Ibru 11.21 wanase,
“Ando Israel apanawa sau euda itutuwa baiwa e ebola wampe wampaase,
‘No rauparintitana God sauwa euda e osoawo itupi, Eparaim ita Manase osouwo ituna rua.’ ”
Me epe wane ita Eparaim ebowa bautasane wan ita muriwa Manase ebowa wan.
21 Ita ema aupe Iakob Iosep diene wanase, “Asisunea, ne bo baiwantedina, tane God ipa e do ando banlaepio leuite nosinosia bolauwo wiea. 22 Tane e Amori bolawa debama moa kerauda ne isima ita pidu mampe onantene wadana e eneedina mai tatataa ita wanwana wanamopa, dia.”
*48:15: Iakob sau euda Eparaim ita Manase osouwo itude. Mo ipa Iosep obampa, mo sau sa osowo itudie ita Iosep do sau euda osowe itun.
†48:17: Israel apanawa inseia wita on ipa mukamukauaida mai wita sen rua, witapa sen, ipa oaoaraida. Iakob witapa on oto kerauwa osowe ituna me ando sau euda debamawa wadepi. Sa baiwa Iosep, Iakob witapa on oto kerauwa osowe itudio ewene memesalen.