9
Yesu Solón Yalüngürr Tóba Zaget Tómbapónóm
(Apostolab Tórrmen 22:6-16; 26:12-18)
Ene tonarrdó, Sol Lodón umulbain olmal gum-guman ngintinóp kolae tónggapónóm ibüka akó akrranóm büdülümpükü. Wa wamórr singüldü prristdü, da oya imtinürr peba mórrag wibalómóm blaman ⌊Zu pamkolpamab kwóbbazen müót⌋ wirri pamdó Damaskus wirri basirrdü, igó bóktanpükü wagó, Sol ne ola nigó pamkolpam nóma nóserre Lodón Kwat* Lodón Kwat, oya küp módóga: Lod ne kwat nómtyenóp pamkolpama ia ki ngyabenórre. mamoande, ia pam ó kol, sab bumige da simarrue Zerrusalem wirri basirrdü.
Wa Damaskus minggüpanan nóma yarilürr, ugósan ene pokodó zyóna oya blaman we myangrao sapónórr kwitümgab. Wa tüpdü aupürr, da bóktan bómgól arrkrrurr. Tóbtanórr oyaka wagó, “Sol, Sol, ma kürü wirri müp iade akyandóla?”
Sol oya imtinürr wagó, “Ma ia nótókla, Lod?”
Wa bóktan yalkomólórr wagó, “Ka Yesu, ma noan wirri müp akyandóla. Bupa, da Damaskus wirri basirrdü ugó bangri, da sab marü darrü pama müzazile, ma kubó laró tónggapono.”
Ne pama zutalórr minggüpanan oya solkwat, i nóma esenóp ene tonarr, bórrangórr, bóktan babul. I bóktan bómgól barrkrrurr, a darrü olom ma koke esenóp. Sol tüpdügab bupadórr, a wa ilküp nis nóma nomgolórr, oya ma gaodó koke yarilürr elklaza basenóm. Da i oya tang nisdü emonóp da idódnóp Damaskus wirri basirrdü. Aüd ngürr ngarkwat oya ilküp nis wata tümün namülnürri. Wa alo koke elolórr akó nae ta koke enólórr.
10 Damaskusüm darrü Yesun mamoan pam asi yarilürr, ngi Ananias. Ananias aerrde nuszan kla esenórr. Lod oyaka tóbtanórr, da wa arrkrrurr bóktan bómgól wagó, “Ananias!”
Wa bóktan yalkomólórr wagó, “Ó Lod, ka inamüla!”
11 Lod oyaka bóktanórr wagó, “Ma ugó wam ene kwatódó, ngi Dümdüm Kwat, Zudasón müótüdü, da oya imtinke darrü pamóm ngi Sol, Tarrsus basirr pam. Wa tóredase. 12 Sol aerrde nuszan kla esenórr. Wa darrü pam esenórr tóbaka tótókde, ngi Ananias, nótó nómngyelórr tóba tang nis Solka, oya morroal ngabkanóm.”
13 Ananias bóktanórr wagó, “Lod, ka wa ne abün bóktan arrkrrudóla Solónkwata, wa ne kolae tómbapónda marü pamkolpam ne nidipasko Zerrusalemóm! 14 Akó wa bóktanpükü tame aini wirri prristdügab, we pamkolpam bumiógüm, marü ngi nidi ⌊ótókdako⌋!”
15 A Lod bóktanórr Ananiaska wagó, “Wam, ini ne olome kótó irruna kürü ngi okaka amzazilüm ibüka, Zu-koke nidipko, ibü kingdü, akó Isrrael blaman pamkolpamdó. 16 Ka oya sab umul ino, wa sab iazan azid aenge, kürü zaget tómbapónde.”
17 Da Ananias we wamórr, da dümdüman müótüdü bangrinürr Sol ne yarilürr. Wa tóba tang nis nómngyelórr Solka da bóktanórr wagó, “Sol, kürü Yesun amkoman angun zonaret! Lod Yesu, nótó okaka tübyónürr marüka kwatódó, ma nóma tamnórró ala, kürü wató zirrkapóne. Ene igósüm, ma kubó akó morroal ngabkan namulo akó marü büb Godón Samua iade gwarrarrón yarile.” 18 Aibwób babul, wapi zyólzan klama we tóbalókórr oya ilküp nisdügab, da we ngabkan yarilürr morroal. Wa zamngólórr da oya we ⌊baptaes yónürr⌋. 19 Ene solkwat wa alo elorr, da oya arünga we tolkomólórr.
Sol Damaskusüm Yesunkwata Ikik Yarilürr
Sol ngibürr ngürr amanórr Yesun umulbain olmalpükü Damaskusüm. 20 Wa dümdüman wamlórr blaman Zu pamkolpamab kwóbbazen müótüdüma ene basirrdü, da ola bóktan amgol yarilürr wagó, Yesu Godón Olome.
21 Oya ne pamkolpama arrkrrunónóp, gübarirr aengóp, da i bóktónóp wagó, “Wa ene olom go ia módóga, nótó kolae bain yarilürr Yesun ngi nidi ótókdako Zerrusalemóm! Akó wa ala tai we zitülkusdü tame ibü azebóm, ama amarrum wirri prristdü Zerrusalem!”
22 Solón bóktan amgol Yesunkwata, Godón arüngi dódórr bailürr. Solón bóktana Zu pamkolpam, Damaskusüm nidi ngyaben kwarilürr, abün müp gyagüpitótók nüliónónóp, da i myamem darrü bóktan koke yalkomólóp, zitülkus wa ibüka amkoman poko okaka izazilürr Yesunkwata wagó, Yesu ene ⌊Kerriso-e⌋.
23 Abün ngürr kakóm, Zu pamkolpama darrpan pokodó kwób bazenórr Solón amkal bóktan angrinüm. 2 Korrint 11:32-33 24 A i oya izazilóp ini bóktanankwata. Blaman irrüb ngürr, Zu pamkolpama wata blaman wirri basirran barrbün mamtae ngabkan kwarilürr; ibü ubi i wata oya ki emkórre. 25 A darrü irrüb, Solka nidi atan koralórr, i oya sidüdóp ene wirri basirran ingülküpi akólórrón kaldó. Da i oya sye-i amelórrón wirri alópe sabinóp kalkuma pokar mamtaeana, oya zid ainüm.
Sol Zerrusalemóm Yarilürr
26 Sol Zerrusalem nóma abzilürr, oya ubi Yesun umulbain olmalpükü dabyónüm yarilürr, a i ma oya gum kwarilürr, zitülkus i oya amkoman koke yangunóp wagó, wa errkya ama Yesun umulbain oloma. 27 Da darrü pam ngi Barrnabas oya ipadórr, da idódürr Yesun ⌊apostoldó⌋. Da wa ibüka bóktanórr wagó, “Sol Lodón esenórr kwat-kwat, wa nóma wamlórrma Damaskus wirri basirrdü, akó Lod oyaka bóktanórr, da Sol gum-koke bóktan yarilürr Yesunkwata Damaskusüm.” 28 Barrnabasón bóktandógab, Sol inkü Zerrusalemóm igósidi ngyaben akó agóltagól yarilürr popa, akó gum-koke bóktan yarilürr Lodónkwata. 29 Wa bobarr Yesunkwata bóktan akó darrem-darrem bóka bamgün yarilürr Zu pamkolpampükü, Grrik bóktan nidi bóktanónóp, da i kwat amkün kwarilürr oya amkalóm. 30 Yesun amkoman angun ⌊zonaretala⌋ nóma barrkrrurr ini poko, da i oya idüdóp ama Sesarria wirri basirrdü, da zirrapónóp tóba amtómól basirrdü Tarrsus.
31 Dudu sosan pamkolpama Zudia, Galili akó Samarria prrobinsdü paudüdü we ngyabenónóp ene tonarrdó. Ibü Godón Samua arüngan ngintanónóp, akó arüng bütan bóktan irrbülürr ibü moboküpdü. I abün bainónóp akó Lodón amkoman moboküpi we ótóknóp blaman ngürrzan.
Aenias akó Dorrkas
32 Pita blaman bwób-bwób enezan wamlórr, da darrü tonarr wa wamórr Lida wirri basirrdü, Godón pamkolpam basenóm. 33 Da wa ola darrü büb bidal olom esenórr, ngi Aenias. Wa 8 pailüm ngyabelórr utürrün tóba ut bwóbdü ini azidpükü, bupad nabe. 34 Pita oyaka bóktanórr wagó, “Aenias, marü Yesu Kerriso dólóng ainda. Bupa, moba ut elklaza tómbapó!” Darrpan güblang wa bupadórr. 35 Blaman kolpama nidi ngyaben koralórr Lida wirri basirrdü akó Syarron buruburudü oya esenóp, da i blamana tübyalüngóp, ama Lodón amkoman we yangunóp.
36 Zopa wirri basirrdü, darrü kol asi warilürr ngi Tabita, Yesun mamoan kol (darrü ngi Dorrkas, oya küp módóga: “dia”). Wa blaman tonarr morroal tulmil okaka azazin warilürr, akó wa elklaza-koke pamkolpam tangbamtin warilürr. 37 Ene tonarr, oya azida tumiógürr, da we nurrótókórr. Oya büdül büb wapüróp gapókdó angrinüm, da darrü kan pokodó ungrinóp kwitana paugdü. 38 Lida wirri basirr wirri kan koke yarilürr Zopagab. Yesun umulbain olmala nóma barrkrrurr wagó, Pita Lidamase, i nis pam nis zirrnapónóp ola, da Pitaka batorri tótókóm wagó, “Gyaurka, yao, ma irrbain-gu!” 39 Pita dümdüman bupadórr, da inkü we wamórr. Wa nóma abzilürr ola, i oya elngomólóp ama kwitana paugdü. Blaman kol kóblea Pitan kal-kal yangónóp. Dakla yón kwarilürr, dakla Pitan umul ain kwarilürr Tabita ne mórrkenyórr barrgüp warilürr, wa arról nóma warilürr. 40 Pita ibü blaman zirrnapónóp bausüm pul basirrdü. Wa wakósingül nülkamülürr, da tóre ekorr Godka. Ene solkwat, Pita tübyalüngürr Tabitan büdül bübdü, da bóktanórr wagó, “Tabita, bupa!” Wa ilküküp nomgolórr, da wa Pitan nóma esenórr, we mórran-mórran bainürr. 41 Pita tangdó omoanórr, ursumülürr, da we zamngólórr. Da Pita Yesun amkoman angun pamkolpam akó kóble ngibaunürr, da ibü nókyenóp ene arról kol. 42 Tabitan büdüldügab arsümülankwata bóktana Zopa wirri basirr blaman gwarranórr, da abün pamkolpama igósidi Lodón amkoman we yangunóp. 43 Pita abün ngürrüm ngyabelórr ola, darrü paman müótüdü, ngi Saemon. Saemon tüób küsil lar sopae zaget pam yarilürr. Pamkolpama ene sopae oyakagab bumiógnóp, ngibürr elklaza tómbapónóm ene sopaedógab.

*9:2 Lodón Kwat, oya küp módóga: Lod ne kwat nómtyenóp pamkolpama ia ki ngyabenórre.

9:23 2 Korrint 11:32-33

9:43 Pamkolpama ene sopae oyakagab bumiógnóp, ngibürr elklaza tómbapónóm ene sopaedógab.