139
Maaron ineep toman ghiit irau sawa isob
Mbouŋ to David
2 Ighaze mboleg izi ve ateg izi, ma namundig nala pa uraat, yom uwatag ghou wa.
Ighaze you naneep mala payom, yom uwatag ŋgar tiou isob. Pasa, yom matam mala. Mbo 94:11
3 Sawa to nalaagh nala pa ndug eta, ma naghaze nazi nagheen, yom ughita ghou, ve uŋgagabiiz ghou.
Tovenen ŋgar naol to naghamgham di, yom uwatag di tisob. Yo 21:17
4 Yoova, saveeŋ to inepneep ila lolog ve nasavia ivot sone,
nene paam, yom uwatagi wa.
5 Yom umuŋmuuŋ payou, ve ulaghlaagh muri payou.
Ve nimam ikiskis ghou, ve ipapalot ghou.
6 You nagham ŋgar pa ŋgar tiom tonanan, le naraua maau.
Pasa, ŋgar tiom, nene ite kat. Ilib payou kat. Ro 11:33
7 Ighaze you naghau payom, pale nala sine? Irau nayooŋ pa matam maau. Yona 1:3
8 Ighaze nazala pa sambam, yom unepneep tonowe.
Ve ighaze nagheen ila mateeŋa inadi, yom unepneep tonowe paam.
9 Ighaze naroov nala pa ndug to ndag iza pani,
ma naghur inag to nepooŋ ila te dige ite to ndag izila pani,
10 nene paam, yom unepneep toman ghou.
Ve nimam waan pale ikis ghou, ve ipasaluŋgan ghou pa laghooŋ.
11 Ve ighaze naghason ndoroom pa inim ikau ghou,
ma nasaav pa ghazooŋa to isul luvutin ghou pa inim ndoroom,
nene paam irau iŋgooz ghou pa matam maau.
12 Pasa, ndoroom irau ipoon mbeb eta pa matam maau.
Mboŋ, yom ughita mbeb tisob tineep ghazooŋa raraate inimale ughita di pa ndag.
Tovenen ndoroom ve ghazooŋa, nene raratedi moghon ila matam.
13 Yom to ughur babaŋag tisob,
ve ulup di tinim ee moghon ilooŋ ila tinaŋ apo lolo. Mbo 119:73
14 You nawatag kat: Uraat tiom to naol ne, popoiadi ve ite kat. Tauto namatughez payom, ve napait ghom.
15 Sawa to nayooŋ ila tinaŋ apo lolo, yom ughita tuag titub ve tiwaseŋgan di.
Mbeb to tivot payou pa sawa tonenen, eta iyooŋ pa matam maau.
16 Tovenen sawa to tinaŋ inaama payou, yom ughita ghou wa.
Ve sawa to nepooŋag izi taan, toman sa mbeb to pale ivot payou, nene matam ighur pani, ve timbooda ila rau tiom pataghaaŋ, ghoro tinaŋ ipoop ghou.
17 Aa Maaron, ŋgar tiom tiina ve poia kat! You nazuaria ghou naghaze le nawatag katin ŋgar tiom. Eemoghon naraua maau.
Pasa, yom matam iŋgal mbeb katindi kat.
18 Ighaze natoova pa nanin di, nene naraua maau. Tilib pa magargaar to naari.
Mboŋ, matag iŋgalŋgal ghom tovene ila le ndugizau, ghoro namundig ve naghilaal naghaze yom unepneep toman ghou.
19 O Maaron, you naghaze yom urab ndiran samsamia tisob timatmaat, ghoro poia!
Ve yes to tirabrab tamtoghon le naghodi siŋ, upaghau di tila saguan payou.
20 Koiamŋa tonowen, tighamgham ŋgar samsamia naol ila izam.
Tiwatwaat izam sorok pa tipariaaŋ kaarom todi.
21 O Yoova, yes to tighur koi payom, you paam naghur koi padi.
Ve yes to tizorzoor ghom, lolog padi rita maau.
22 You naghur koi padi,
ve naghita di tinimale koiagŋa kat.
23 O Maaron, uŋgabiiz lolog ve ŋgar tiou.
Utoov ghou, leso uwatag katin ŋgar to ineep ila lolog.
24 Ighaze you nayel pa ataam tiom, upasaluŋgan ghou. Leso nataghoni kat, ve naneep pooi itaghoni taghoni gha ila. Ataam tonenen ineep muuŋ ve inim. Mbo 17:3+