33
Tambou mbouŋ paaghu pa Maaron
1 Yam tau ataghon ŋgar duduuŋa na, lolomim poia pa Yoova, ve ayoor eeza toman aliŋamim tiina.
Yam tau aghamgham ŋgar poia na, apait Yoova eeza, o iduduuŋ.
2 Arav ambam ve gita, ve apakur Yoova.
Arav gabua maata maata, ve apaiti ila mbouŋ tau aliiŋa poia na.
3 Ambou mbouŋ paaghu pani, *Saawe naol, isaav ighe Maaron igham uraat tiina ve igham mulin tamtamon tooni, ene yes timbou mbouŋ paaghu to tipaiti. Ughita Mbo 40:3, 96:1, 98:1, 144:9; Is 42:10; Syg 5:9, 14:3.
ve arav poghania ambam ve gita. Leso mbouŋ tsiam paghuuna.
Ambou tiina, ve apaiti toman lolomim poia! *Mbo 40:3, 96:1, 98:1, 144:9, 149:1; Is 42:10; Syg 5:9, 14:3
4 Pa saveeŋ to Yoova, ene onoon ve iduduuŋ mon.
Uraat naol tau ighamgham zi na, ene itotoia ighe i itataghon saveeŋ mbuaaŋ tooni. *Mbo 19:8, 119:142; Syg 19:11
5 I loolo pa ŋgar duduuŋa ve ŋgar to gharatooŋ pataŋani to tamtamon le iduduuŋ.
Ve loolo isaghav tamtamon tooni ariaaŋ ve iuluul zi. Ŋgar tane, i itotoia irau taan isov. *Mbo 11:7
6 Muuŋ, saveeŋ to Yoova mon, tauta gabua to sambam saamba tisov tivot.
Aavo isaav, ve aaz, kaiyo, ve pitum tisov tivot ila sambam saamba. *Gnp 1:14+; Hib 11:3
7 I igham te ila ilup ghi ila niia eemon.
Mazavan tau muuŋ geeg itav taan na, ene i ighur poghania ila niia. *Gnp 1:2, 9-10
8 Yam tau aleep irau taan na, aroi pa Yoova ve ataghon ŋgar tooni.
Yam nughmariŋ, aroi pani ve apakuru.
9 Pa i isaav mon, ve sambam ve taan tivot itaghon i tauu aliiŋa.
I isaav ariaaŋ, ve gabua tisov tivot ve tigheen tuŋia ila niazi niazi.
10 Nugh nugh matazi iŋgal ŋgar katini tighe tigham zi.
Eemon Yoova iponpoon eez pazi.
Tauta ŋgar toozi tawe imin kaut sorok, ve le anooŋa mako.
11 Eemon Yoova, isaav ighe maata iŋgal ŋgar eta, ene pale ŋgar tana iyooz tauvene irau saawe.
Saa ŋgar tau ighe loolo ighur pani, ene pale ighengheen tauvene taghon taghon gha ila. *Nam 23:19; 1Sam 15:29; Yems 1:17
12 Yes Israela Maaron toozi, ene Yoova. Tauta tintinizi pa poia tooni tau izazaa toozi.
I tauu isiigh zi, ve igham zi timin le motot. *Mbo 144:15
13 Yoova ileep izi sambam, ve maata izizi pa eval tiina to taan. *Mbo 11:4, 14:2, 53:2
14 I ileep ila niia to ghamuuŋ pooz, ve ighitghita tamtamon tisov tau tileep izi taan.
15 I ta ighurghur ŋgar ila tamtamon eŋaeŋa lolozi.
Ve ŋgar naol tau tamtamon tighamgham zi na, i iwatagh zi tisov. *Mbo 119:73; Hib 4:13
16 Isaav ighe kinik eta le zaaba katini, irau zaaba tana zigazi tiliiv pa malmal mako.
Zaaba ariaŋazi paam. Irau tauzi tapirizi ve tiliiv koiazŋa mako.
17 Ve hos tau zaaba tilandoov zi pa malmal na, tauvene paam. Isaav ighe tighur matazi pazi to tiuul zi ve tiliiv koiazŋa, ene aat tighur matazi pazi sorok.
Onoon, hos tapirizi. Eemon irau tiuul zi mako. *Mbo 20:7
18 Onoon kat, yes tau tiroi pa Yoova ve titaghon ŋgar tooni na, i maata pazi.
Yes tau tinumeer Yoova tighe i loolo isaghav tamtamon tooni ariaaŋ ve iuluul zi na, i iŋgin zi tileep poi. *Igham 3:16; 1Pe 3:12
19 I iuluul zi, ve igham mulin zi pa pataŋani toozi. Leso tileep poi.
Ve isaav ighe pitool tiina ivot, i aat iuul zi, ve igham lezi aniiŋ ve tileep poi. *Mbo 56:13; Mbaŋ 12:11
20 Tauvene iit tanumeer Yoova ve taghur mataan pani.
Pasaa, i Uleeŋa toit, ve imin sigheu pait.
21 I mon, tauta loloon poia kat ve tintiniin.
I patabuyaaŋ ve eeza tiina. Tauta taghur ila tooni ariaaŋ.
22 Yoova, yei nighur matamai payo to uul ghei.
Ughur poia tsio izaa tsiei itaghon ŋgar tsio tau lolom isaghav tamtamon tsio ariaaŋ ve uluul zi.
*33:3: Saawe naol, isaav ighe Maaron igham uraat tiina ve igham mulin tamtamon tooni, ene yes timbou mbouŋ paaghu to tipaiti. Ughita Mbo 40:3, 96:1, 98:1, 144:9; Is 42:10; Syg 5:9, 14:3.
*33:3: Mbo 40:3, 96:1, 98:1, 144:9, 149:1; Is 42:10; Syg 5:9, 14:3
*33:4: Mbo 19:8, 119:142; Syg 19:11
*33:11: Nam 23:19; 1Sam 15:29; Yems 1:17
*33:13: Mbo 11:4, 14:2, 53:2