12
Heie Pe Ilimo Palaungana Nenge I Uneinei Ia
1 Iok, hengeilang e nge nakuna altoto lochloch herura hot nga lut nga tapa. Ana hengeilang lohot ke pomai koi: Hei e heronia chaia matana ke pomanga nena hengeron pe mes haka nga teio. Pe iengiengka nenge are haka nga palpalna ana itoch iri analoch pe nai. 2 ✡Mic 4:10Ana hei sana pe melmelenga nenga hohonga poia i ke alngana haka iange lala nga hoho ngana mam lom.
3 ✡Dan 7:7Iok, ute e pule lohot nga lut nga tapa. Ngana laka ilimo palaungana e nge singina remenmen. Ilimo neu palpalna iri rahtele nai pe ana sangkar iri analoch. Pe iengiengka iri rahtele nai te ronge palpalna nemur. 4 ✡Dan 8:10Pe hoena pelsis hote itoch ana tuluk mol ngana nga tapa sana ke sio langa ich. Pe mes nga hei neu matana ke teke tone hei neu tuna nga etue nenge hoho hote. 5 ✡Psa 2:9; Isa 7:14; 66:7; Hem 19:15Iok, hei neu hoe tuna tamane ngana e nenge lape rahite nena kula lekina ngana pe nauele hulua lochloch nga ich. Ke hei neu hoe tuna neu pe angkelo e chalem heke ke laia nge NeHalang nga nena kilanga seina ngana. 6 Pe hei neu ua ke langa ich sana lomona nenge NeHalang tatalo ele i ia. Pe lape tenau ele i nga kileng nem ke etue iri ana non kina lime iri analoch pe ana non kina analoch pe ana non kina mol (1,260).
7 ✡Iut 9Ol pe hunelinga lohot nga lut nga tapa. NeHalang nena angkelo palaungana nenge ene Mikael pe pekngana mur, iriul ilimo palaungana neu pe nena tula mur ke te hunel. 8 Pe angkelo Mikael pe pekngana mur te hekou sue ilimo neu pe nena tula mur pe te lope hote iri nga lut nga tapa. 9 ✡Gen 3:1, 14; Luk 10:18; 22:31; Hem 20:2Pe tesau sue ilimo palaungana neu luluch nge nena tula mur ke tela nga ich. Pe ilimo palaungana neu i uneinei pe i ur halangana toto nenge te hetue ke non soanna ngana. Pe ene e pule laka Satan. I pallaka ia hulua nga ich ke te nanasia poinga poreke ngana.
10 ✡Job 1:9-11; Zec 3:1Ol pe e longe mele nge haliu ke soke toto nga lut nga tapa ke teke,
“Heueu ta mene maulinga ke koko nge ara Soke NeHalang.
Kikina ngana pe nena naualanga pe nekinga
lohot nga mallaha ke ulolo.
Pe Kristus nenge i sipona tal hote,
Talune ana ume ke nauele hehei pe hana nga kikina ngana.
Pe non soanna ngana nem laka tesul hote i nga lut nga tapa lo,
iange i hele porekreke titira mur.
Hele porekreke iri nga NeHalang matana ke kokoes
nga sinanga pe nga miliko.
11 Pe titira mur te hekou sue i nga Sipsip Tuna eina,
pe nga nena helenga manmanna ngana nenge te haliu hottote.
Iri te hile hot tote singiria
pe te matau metenga ero.
12 ✡Isa 44:23; 49:13Ke pomalam imo nenge atu nga lut nga tapa a iech toto.
Pe imo lochloch nenge atu nga ich pe nga ruach letena
lape a amneia melmelenga palaungana
iange non soanna ngana nem laka tesul hote
ke sio lange imo lo!
Pe non soanna ngana nem letena inin toto
iange eteia ke ana etue choro mana ol.”
13 Pe ilimo neu eteia nge tesul sue i langa ich lo, pomalam tango rere hei nenge hoe tuna tamane ngana nem. 14 ✡Dan 7:25; 12:7Pe NeHalang tunge ngie pisou palaungana sahana nai lange hei neu ke leheia. Pe lehe kela tu ke kangkanga ilimo neu ana nga ich sana lomona nenge te tatalo ele i ia. Pe lape tenau ele i nga kileng nem ke hesinga mol pe teio iri rahtele elle. 15 Pomalam ilimo palaungana neu muta hote ech nge pomanga ech tana ke nanasia hei neu ke teke hole hote i. 16 Pe ero, iange ich halaua hei neu. Ich hanna pangpanga ke pomanga polo e pe halaua hei neu ke tone ech tana nenge ilimo palaungana neu muta hote. 17 ✡Hem 11:7Ol pe ilimo neu letena inin taua hei neu. Pomalam lange hei neu tutuna mur hel pule ke iriul te hunel. Ngana laka iri nenge te nanasia NeHalang nena hotonga mur pe te nanas tau tote helenga manmanna toto ngana nenge Iesus hemallaha hote. 18 Pe ilimo palaungana neu mes nga ruach ilina nga peipei.