13
Barnabas ma Saul i viaiaini ma i paritawanei
1 Kerisiana au Antiok au orai peroveta ma taugiu wavai wenanare, Barnabas, Simeon (e ḡoreḡorei Gawara), Lusias Sairiniei, Manaen (Tauna gulau Herod Antipas maiteni i rata tagogi), ma Saul. 2 Mara tagogi maranai taui i ujiuji ma Bada i vovoepaepai ma Arua Vivivireina i riwa i pa, “Tau, Barnabas ma Saul a vinei, ona tereriei au nola aubaina.” 3 Anina ma uji ma pari au murina taui urai Barnabas ma Saul au tepai i terei ma God ruaḡai i viaiaini ma i paritawanei.
Au Saipras
4 Ma Arua Vivivireina Barnabas ma Saul i paritawanei da i ḡaira au Selusia ma kampa i amkuka damana au bonabona Saipras. 5 Ma au Salamis i ḡota ma i nae mai Jew ai au boru numana ma God riwana i raugugulei. John-Mark taui maiteni i nae da ai tauagu.
6-7 Taui bonabonana i kwaviviroi da au Paphos taon i ḡeta. Weka Jew ei barabaravuna ma peroveta morumoruna i nebelei wavana Bariesu. Tauna bonabonana ana gavena Segius Paulus i vituranei, Segius Paulus rava nualaulaunana ma i ḡoei da God ana babani ita nonori ma lamna aubaina Barnabas ma Saul i rauḡoreiai. 8 Wate barabaravuna Bariesu (Greek ponanei lamna Elimas) Saul ma Barnabas i viḡaviei da gavena ana tumaḡana ita viapoapoeni. 9 Saul wavana ḡelauna Paul, Arua Vivivireina orana i oai ma barabaravuna matana i ʼnana-tunutunui. 10 Ma i pa “Tam Satan natuna ma kaua aiaii ma jijimani tauviapoapoenina! Tam morumoru kaukauam ma gwalagwalamerum. Ma amapo da Bada ana kaua ma voviravirai da moru. 11 Ma marina Bada urana ina kovoḡim da matam ina apoapoe mara aburuna ma eḡa madeḡa lalalaina ma inanai.” Maratagogi matana i vinawanawa ma i gimtona ma nare da were i voladaḡa-nae da rava au urana ita vojijina.
12 Maranai gavena i ʼnanai aiwai i tupua ma i vitumaḡana, aubaina tauna Bada ana viararamana i bana-kauei.
Paul God Riwana Aiaina i jimejimei au Antiok taon au Pisidia
13 Paul ana rava maiteni Paphos i voterei ma i amkuka damana au Perga taon au Pamphilia provins, Ma weka John-Mark taui i voterei ma i naeme au Jerusalem. 14 Perga i voterei ma i rui da au Antiok taon au Pisidia provins. Ma au Sabate i rui au boru-numana ma i kiala. 15 Ma rava ḡelaui, Moses ana tarawatu bukana ma peroveta ḡelaui ai buka i ʼavi, ma babada riwa i paritawanei Paul ma Barnabas awari i pa, “Varevareiu! Mepa da awarimi nota aiwai da ota voaguiai lamna marina ona ḡei da ona babaniei.”
16 Paul i vomairi ma urana i voepai da rava i genuana ma babani i vikarei i pa:
Mai Israel ma taumi eḡa mai Jew ai God tauviborumeina, ona rautaniḡaneu! 17 ✡Exo 1:7Mai Israel ai God noinoita i vinei, ma i vimaurai ai au mae au Egypt, ma ana rewapana ḡaeḡaenei dobunei i taravaina-opunei. 18 ✡Num 14:34Madeḡa 40 au mutulua ami kaua apoapoei ami beura ma ami gunura anatapui am-iauei. 19 ✡Deu 7:1Dam ḡaeḡaei 7 i vipupui au Canaan ma dobuna mai Israel i verei da i viḡariana-nonoei. 20 *(a) Jdg 2:16; (b) 1Sa 3:20Wei anatapuna madeḡa 450 au orana i tupua. Wei au murina God taurauetara†Wei ravai lamna ai ḡavia babadai ma ai tauravena ma taurauetara Judge. i terei da taui i vibadei da peroveta Samuel ana mara. 21 ‡(a) 1Sa 8:5; (b) 1Sa 10:21Anina ma rava God i vibaḡai da gulau ita verei. Ma God Saul, Kish natuna Benjamin ana damei i terei; ai gulau da madeḡa 40 i kwa. 22 §(a) 1Sa 13:14; (b) 1Sa 16:12Ma God Saul i tere-opunei ma David i terei ai gulau. Ma wenanare i riwa i pa, “Tau a aramanei da David, Jesse natuna orau ana rauoḡara, ma au ḡoana anatapuna ina kauei.”
23 Muriai me God i parivainuaḡani nanare, Mai Israel ai Tauvilawana, Iesu David ana damei i nei. 24 ✡Mrk 1:4Muriai da Iesu ita nei, John mai Israel anatapui awari i jima da ai ḡoʼapoapoe ina voterei ma ina mae-tavirei God awarina ma ina babataito. 25 ✡Mrk 1:7Ma John ana nola au damona i riwa, “Taumi o notanotai da tau Tauvilawana bo? Eḡa! Tau eḡa tauna. Wate ona rautaniḡana, rava au muriu e nenei tauna i ḡetelara, tau eḡa tagotagogina da ana ae uma ḡuravana ana rupeni.”
26 Varevareu - Abraham natunatuna ma taumi Jentail God tauviviborumeina, God tauta awarita, kwakokwakoi vilawanai riwana i paritawaneiai! 27 Mai Jerusalem ai babada maiteni God ana Tauvilawana i vinua-nainei, ma lamnei Iesu i kovoḡi, Peroveta wei lamna i jimejimei au Sabate marana patapatana. 28 ✡Mrk 15:13-14Taui eḡa ana apoapoena aiwai ita nelaḡai da Iesu ita viraḡeni, wate Pilate i vibaḡai da ita viraḡeni.
29 ✡Mrk 15:42-47Maranai rava ai babada maiteni, ai nuabola Iesu awarina i kauana-paiei me peroveta i ririwei nanare, ma tupuana au korosi i tere-ḡairei ma au guba i vimataveni. 30 Wate God Iesu iraḡelei i vovaimairini. 31 ✡Act 1:3Ma au pom maḡamaḡaui Iesu taui maiteni au Galili da i ḡeḡae au Jerusalem awari i eḡa. Wei ravai marina e vivimatamata rava awarii.
32 Marina tauai Riwana Aiaina a paripariveremi. Wei parivainuaḡanana wariaḡa noinoita awari i kauei. 33 Ma God nanare i kauei tauta eda muri aubaita, da Iesu iraḡelei i vovaimairini, au Psalm viruaina wenanare I girumi,
Tam natu.
Amadodo Tau a viamanem. (Psalm 2:7)
34 God Iesu iraḡelei i vovaimairini da eḡa tupuana ina buda. Me i girugirumi nanare i pa,
Au viaiaina vivivireina David a parivainuaḡani tam ana verem. (Isaiah 55:3)
35 Psalm ḡelauna wenanare i girumi,
A ʼramanei da Tam am Messiah-Tauvilawana tupuana eḡa au kokoaḡa ma voterei da ina buda. (Psalm 16:10)
36 Maranai David i mamae ma God ana nola i kauei ma iʼraḡe, ma amamana maiteni i doboi ma tupuana i buda. 37 Wate God Iesu iraḡelei i vovaimairini ma tupuana eḡa ita buda.
38-39 Lamna aubaina au rava, ona aramanei da Iesu awarinei God ami ḡoʼapoapoe ina nota-tawanei. Rava anatapui da Iesu e vivitumaḡanei, ai ḡoʼapoapoe e notanota-tawanei ma ai viturana e viviaiaini. Wei Moses ana tarawatu eḡa ita kaukauei. 40 Ona paina-melemi da peroveta aiwai i ririwei eḡa awarimi ina tupua. Aubaina i riwa;
41 Ona rautaniḡana vivijiboḡami,
kaua ḡaeḡaena ana kauei da Ona baei ma ona iraḡe!
Aubaina ami au lawana kaua ḡaeḡaena ana kauei da taumi ona vitumaḡana-avei.
42 Paul ma Barnabas i opuopu ma rava i nei ma i vibaḡa-guratei da ita nememei au Sabate ḡelauna da Tauvilawana ana kaua ita babanana-kauei. 43 Boru i kwa da rava i vilamonei, mai Jew borui ma ḡelaui marina ina bori i vaia da i vimai-jew, taui Paul ma Barnabas i votaḡoi, ma i riwana-guratei da Iesu ana aguei ina mae jijina.
44 Au Sabate ḡelauna taon ravai anatapui i ḡeta da Iesu riwana aiaina ita nonori. 45 Maranai mai Jew wei patarana i ʼnanai ma orai unura i oai ma Paul i vikaua-morumoruei ma i vitepaubaubai.
46 Ma Paul ma Barnabas ana tepatorai i babani, “God riwana a jimei awarimi au naona, wate taumi wei riwana o geduaiei. Wei e viviatataiana da taumi lawana mamae-nonoana eḡa ota ḡoeḡoei. Lamna aubaina ana voteremi ma God riwana ana jimei Jentail awarii. 47 Bada wenanare riwa bagibaginei i riwelai,
Tau a vinemi da lalalaina Jentail awarii,
da rava anatapui au dobu ona riwei menanare ai ḡoʼapoapoe a nota-tawanei ma a vilawani. (Isaiah 49:6)
48 Maranai Jentail wei riwana i nonori, taui i vinuaiai kaua ma Bada Riwana Aiaina i voepaepai, ma taui da God i vinei lawana mamae-nonoana ita vaia, i vitumaḡana.
49 Ma Bada Riwana Aiaina i vituai nai au paratana. 50 Wate mai Jew Jentail waivinei manemanei ma mai Jew ḡelaui i egari da Paul ma Barnabas ai ḡavia i vomairi ma dobunei i viaḡaḡana-opunei. 51 ✡Mrk 6:11Anina ma taui aei pokauna i rauabuabui da ita viatataiei da Bada eḡa ita vinuaiai awarii ma i nae au Ikoniam taon. 52 Wate Arua Vivivireina kerisiana voui au Antiok orai i oai ma i vinuaiai kaua.