1 ✡Act 7:40Maranai rava i ʼnanai da Moses barana i uama au ola, taui i nei Aaron awarina ma i riwei, “Ma nei ma god ma voai da ina painita. Wei ravana Moses, Egyptei i neiaita weka, eḡa ata aramanei aiwai i tupua awarina.”

2 Aaron i paribelei, “Awawami ma natunatumi waivinei ma nelarai ai loji goldei ona neiai awariu!” 3 Anina ma rava anatapui ai loji i votawatawanei ma i neiai Aaron awarina. 4 ✡1Ki 12:28; Act 7:41Tauna i vaia ma ai au menamenana i apui da i wanagwadai ma bull natuna kokoitauna i voai. Maranai rava wei i ʼnanai ma i riwa, “Oo mai Israel wei ami god, Egyptei i tere-opunemi.”

5 Maranai Aaron wei i ʼnanai ma pulo aniapuna i voai bull au naona ma i vinolanola i pa, “Au maratom tana torela Bada aubaina.” 6 Ma Ubaubana boiboḡi rava i vomairi da ḡamoḡamo taputapuna i apui ma viturana maiteni pulona i terei. Muriai i kiala da i am gogona ma i uma-bua guratana da i kaua labalababa.

7 Anina ma Bada Moses i riwei, “Ma ḡaira ma am rava Egyptei u tere-opunei. Tau i geduaieu ma kaua apoapoena i kauei. 8 Taui me marana au tarawatu i geduaiei ma bull natuna kokoitauna i kauei. Ma i raudunelei ma pulo i apui awarina ma i riwa, ‘Wei ami god, Oo Israel, Egyptei i tere-opunemi.”

9 Ma Bada Moses i riwei, “Wei ravai a inanai ma a aramanei taui kolai bagibagii, ma nuapoui eḡa. 10 Ma votereu da au meji ana vikwai taui awarii ma ana pupuni. Ma tam Moses ana terem da am epaepaia maiteni dam patarai ḡaeḡaena ona vitupui.”

11 Wate Moses God i vigigimanei i pa, “Oo Bada am rewapana ḡaeḡaenei am rava Egyptei u tere-opunei lamna aubaina eḡa am rava awarii ma meji ma ma pupuni. 12 Mepa da ma pupuni, Mai Egypt ina riwa, ‘Ana nota apoapoena maranai i tere-opunei da au ola anatapui ita pupuni.’ Meji avena, oram ina uba, ma eḡa ma vipupui. 13 ✡Gen 22:16-17; 17:8Am taunola Abraham, Isaac ma Israel ma notai, tam wavamei u parivainuaḡani, ‘Tau am epaepaia ana vimaḡai me ubona au mara ma wei dobuna a paripari-vainuaḡani ami epaepaia ana vere-nonoei.” 14 Anina ma Bada orana i uba ma eḡa apoapoena ita neiai awarii.

15 Ma Moses i ḡaira me, au urana ḡaima ruaḡa dabadabai. God ana tarawatu wei ḡaimai au naoi ma au murii i girumi. 16 Ḡaima dabadabai lamna God ana kaua. Tauna ainelana i girumi.

19 Maranai Moses i turiai mepa rava i rauḡaravu ma bull natuna goldei i ʼnanai i maimairi ma rava i arara i ʼnanai. Tauna meji orana i oai ma ḡaima dabadabai ruaḡa i viorereni au doa. I viaigimagimai ola au karena. 20 Moses bull natuna goldei i vaia ma i apui ma i tutu-gwadagwadai da i vipokau ma au waira i tawanei ma mai Israel i egari da i uma.

21 Ma Aaron i riwei, “Rava aiwai i kauei awarim da u kauei da kaua apoapoe kaukauna i kauei.”

22 Aaron i paribelei, “Au bada eḡa ma ḡaiawa, rava ai kaua u aramanei, kaua apoapoe ai ḡai. 23 Ma i riweu, ‘god ma kauei da ina ravenita. Ma wei ravana Moses, Egyptei i tere-opunelai, tauai eḡa ata aramanei aiwai awarina i tupua.’ 24 Lamna aubaina rava a riwei, ‘Aiaia awarina via goldei ona votawanei ma i vereu.’ Ma ai au menamenana a tawana-ruiei ma wei bull natuna i opui!”

25 Moses i ʼnanai da Aaron eḡa tagotagogina da rava ita vibadei, ma ana ḡavia ai anivinama i kauei. 26 Lamna aubaina ai rauḡaravu au metaetana i mairi ma i garara, “Aiai da Bada au murina, ona nei awariu!” Ma Levi ana dam i nae Moses au murina.

27 Ma Moses taui i riwei, “Bada, Israel ana God e ririwa. Nelara sod ona lavui ma ona nae ḡaravu au giana da ona nenememei ma dam turam ma vareim ma mae-turam ma viraḡeni.” 28 Levi ana dam Moses i voteletelei ma nai au marana nelara 3,000 i viraḡeni. 29 Ma Moses i riwa, “Amadodo Bada taumi i voviviremi ma i viaiainimi da aubaina ona vipirisi pulo tauapuina, aubaina taumi Bada o voteletelei da natunatumi ma varevareimi o viraḡeni.”

30 Ma maratomna Moses rava i riwei, “Taumi ḡoʼapoapoe ḡaeḡaena o kauei wate ana ḡae Bada awarina da ana kauana dadanei da ami ḡoʼapoapoe ina nota-tawanei.”

31 Anina ma Moses i ḡae me Bada awarina ma i riwa, “Au rava kaua i apoapoe ḡaḡa i kauei. Taui ai god goldei i kauei ma i raudunelei! 32 Wate marina Bada a vivibaḡaim da ai ḡoʼapoapoei ma nota-tawanei ma mepa da eḡa lamna avena ma wavau am au buka ma boa-tawanei.”

33 Ma Bada Moses i paribelei, “Aiavoi ḡoʼapoapoei i kauei awariu, Tau wavai au buka ana boai. 34 Marina ma nae, rava ma naiei dobu a ririweia ma au anela ina ravenim. Wate mara ina ḡeta da ana kovoḡa, taui ai ḡoʼapoapoe aubaina ana kovoḡi.”

35 Ma Bada doria apoapoenei rava i kovoḡi aubaina taui god bull natuna Aaron i voai i raudunelei.