8
Kini Solomoni 'Auvea yana Veakutagona 'ana Didiwaka i mieni Vanuga 'Eba Velu'ui nageneye
1 2 Sam 6:12-16; 1 Ifu 15:25-29Vanuga 'Eba Velu'ui i yogona'a'avai, Kini Solomoni me Isileli i goleva'augidi bani'odi, to'edakumetavo 'au'auveadi, wauma 'adi to'edakumetavo wata 'aila'a tulina tulina 'adi to'edakumetavo, matatabudi i na maia Ielusalema. Kini nuanuana 'Auvea yana Veakutagona 'ana Didiwaka i na 'ewai Kini Devida yana 'atamana Saioni*Saioni, Ielusalema tamu 'ana wagava, we'e mogitana 'awasasanina Yaubada yana Vanuga 'Eba Velu'ui bei i tovotovoi. 'wainega, i na naweni Yaubada yana Vanuga 'Eba Velu'ui 'waineye.
3 Tutuyanina me Isileli to'edakumeta 'au'auveadi i le'wai, tovelomuvo Didiwakanina i silakai. 4 Tovelomunidi wata tomotoga 'ifwaidi Livai 'ana wauma 'wainega, 'Auvea yana Veakutagona 'ana Didiwaka i evai, Vadavada Tabutabuna i geuyaga, wata 'ana kukua tabutabudi taiadi. 5 Solomoni wata me Isileli matatabudi taiadi, Didiwakanina manawaneye 'aisaya sifi wata bulumakau fueotogidi i vevelomuyedi, 'aisayanidi 'adi 'aila'a lu'iawawa-wayoga.
6 Bega tovelomuvo 'Auvea yana Veakutagona 'ana Didiwaka i evai, i lukuveni Vanuga 'Eba Velu'ui nageotogineye, Tutudaba Tabutabuotogina 'waineye. Tutudabanina nageneye kumaea Selebimu†Selebimu Yaubada yana tomotoga toketokeotogidi anelose bani'odi. 'adi 'ailuga i tovotovoi ma fafedi. Fafedi 'ayaneye Didiwakanina bei i yatoi.
10 Sou 40:34,35Tutuyanina tovelomu i souyedi Tutudaba Tabutabuna 'wainega, nika waowa i obuma 'Auvea yana Vanuga 'Eba Velu'ui i luvaia. 11 Waowanina tovelomu i veve'etobodedi kebu 'adi fata yadi folova i na 'i'idewadi fai 'Auvea yana mageta mataududulina yana vanuga inagena i umai.
22 Bega Solomoni i tovoi 'Auvea yana 'eba velomu weyaginega we'e me Isileli fueotogidi i tovotovoi mulineye. Nimana i silakaidi abame nika i velu'ui. 23 Side bani'odi i velu'uiedi i vo,
'Auvea, 'omu me Isileli yama Yaubada, kebu tamu yaubada 'omu bani'odiga abame wata fwayefwayeye. Tutuya matatabuna yamu veakutagona 'u nunuave'avini, we'e egavo yadi nuanua matatabuna i tauyedi 'waimuye bega i vevematayakeyakemu, 'u nunuakalikaliedi.
27 2 Ifu 2:6Yaubada, 'amu fata 'omu 'u na mia fwayefwayeye? Yamu 'eba mia 'etowava-wayoga, abama wata fwayafwaya 'u vebwaika-'iawedi. We'e Vanuga 'Eba Velu'ui a yogoniga, kebu tamu sai'afo 'amu fata. 28 Siwe yau yamu tofolova, nuanuaku yaku velu'ui 'u da nogai. 'Auvea yaku Yaubada, nuanuaku yaku velu'ui-nuakalikali 'u da vinenegeni. 29 VeL 12:11'Omu taunimu 'u vona de'e vanuganina faifaina 'u vo, Bei 'aku wagava i na 'eno'eno.’ Bega tutuya matatabuna de'e Vanuga 'Eba Velu'ui 'u da 'i'isave'avini 'aiata wata lovana 'waidie we'e tutuyanina a na 'i'isanago 'waineye yaku velu'ui 'waimuye 'u da noganogaidi. 30 Yau yamu tofolova, nuanuaku yau wata yamu tomotoga me Isileli yama velu'ui-nuakalikali 'u da noganogaidi. Tutuyanina 'a na 'isanago vanuga de'e 'waineye wata 'a na velu'ui 'waimuye, yamu 'eba mia abama 'wainega yama velu'ui 'u da noganogaidi wata yama sakona 'u da nuatavunidi.
41-42 Wata kumanidiavo mali tomotoga taunidi kebu Isileli, 'amu wagava, yamu toketokena wata naninidi 'eba nuavogana 'u 'idewadiga, valana i na nogai nika 'ani'ieyega i na maia i na 'isanago yamu Vanuga 'Eba Velu'ui 'waineye nika i na 'odu 'waimuye. 43 Yamu 'eba mia abama 'wainega yadi velu'ui 'u da nogaidi wata ava'ai faifaina i vevelu'uiga 'u da 'idewadi, bega tomia fwayafwaya 'adi 'aila'a tulina tulina i na 'asetamu bega ma yadi kololo i na subisubiamu, bani'odi 'ima me Isileli 'a vevesauluvedi. I na 'asetai vanuga de'e a yogoniga, 'eba subia 'omu faifaimu.”