1 Mad 12:42; Luk 11:31Tutuyanina Siba 'ana kwini Kini Solomoni valana i nogai 'ana wagava i vebwaikaga faifaina wata yana ve'ililibu 'Auvea 'waineye, bega i mai i na fogei. Nuanuadi yana 'aseta i na sitonovi velutoli vitadi 'waidiega. 2 Yadi tofolovavo fuedi taiadi i maia, kukua fuedi i yatodi yadi 'aisaya kameli kwavudie, bani'odi 'ani'ani 'eba 'ive'iwana, golida wata kileu 'aninamanamalidi 'adi tutula bwaikidi. Bega kwininina i vona-vekaiwa Kini Solomoni 'waineye nika taiadi i veifufu ava'ai yadi nuanua i mieni 'waineye. 3 Kini Solomoni velutolinidi matatabuna i tutula'a'avadi, kebu tamu velutoli i da vitaga 'waineye. 4 Nika Siba 'ana kwini Kini Solomoni yana nuamageta i 'asetai wata yana vanuga 'ai'aiwabuna i yogoniga i 'iseni. 5 Wata 'ani'ani fuedi 'ana talalia tabwaneye, yana tofolovavo 'adi talauma 'atumaidi, 'ana ufa oine 'ana to'anivelenavo wata 'aisaya i vevelomuyedi 'Auvea yana Vanuga 'waineye, matatabudi i 'isedi, nuadi i vogani.

6 Bega kini 'waineye i vo, Yama 'atamane 'a miamia valamu 'a noganogai, yamu nuamageta wata ava'ai 'u 'idewadiga bwaikidi, tutuya de'e 'ana mogitana 'akonadi 'a 'iseni. 7 Tutuya basenadi kebu 'a da awavemogitanaga we'e 'asiau 'a mai taunima matamega 'a 'iseni. Yamu nuamageta wata yamu 'ai'aiwabu bwaikina, kebu bagase bani'odi i da vonemaga. 8 Yamu tomotogavo tutuya matatabuna matamuye i tovotovoi, yamu kiavemageta i vivinenegeni bega i sososoana. 9 Bega 'Auvea yamu Yaubada 'a subiai, mogitana faifaimu i sosoana, i venua'ivinemu me Isileli 'u na veimeyedi. Yana nuakalikali miamia-vagaina me Isileli faifaimi begaidi i venua'ivinemu 'u vekini, yana tomotoga 'u na 'edakumesedi sauluva tonovina 'wainega wata 'u na vevenua'ivina-'atumai faifaidi.”