1 VeL 17:17Kini Solomoni me Itifita yadi kini natuna vevinena i toke i nuakalikalieni, wata vevine 'ifwaidi kumanidiavo mali tomotoga kebu Isileli i nuakalikaliedi, vevinenidi me Moabe vevine, me Emumoni, me Idomu, me Saidoni wata me Aiti 'waidiega i maia. 2 Sou 34:16; VeL 7:3,4We'e 'Auvea me Isileli 'adi veimea i veledi i vo, Kebu vevine kumanidiavo mali tomotoga taunidi kebu Isileli taiadi 'wa na nagi i na nunago yami vevinevo nuami i na 'anidi nika yadi yaubadavo 'waidie 'wa na 'odu'odu.” Kini Solomoni vonanidi kebu faifaidi i da nuanua, we'e vevinenidi i toke i nuakalikaliedi. 3 Kini Solomoni yana vevinevo 'adi 'aila'a 700, matatabudi kini 'adi wauma 'waidiega. Wata vevine yana tofolovavo 'adi 'aila'a 300, kumanidiavo yana 'eba sosoana faifaina. De'e vevinenidi nuana i 'ania bega mali yaubadavo yadi sauluva 'waidiega i vesauluva. 4 Tutuyanina Kini Solomoni i ve'auvea, yana vevinevo nuana i 'ania bega yadi yaubadavo 'waidie i 'odu'odu, kebu 'Auvea yana Yaubada yana nuanua i da vematayakeyakeni bani'odi basenadi tamana Devida. 5 Me Saidoni yadi yaubada vevinena Asitoleta i ve'ililibuyeni wata me Emumoni yadi yaubada Moleke, kumanina sakoiotogina 'ana 'odu'odu 'eba bunumayaga.

7 Ielusalema inala lakavinega tamu 'oya siaina deba'aineye Kini Solomoni 'eba velomu i didigidi, tamu me Moabe yadi yaubada sakoiotogina Kemosi faifaina, wata tamu me Emumoni yadi yaubada sakoiotogina Moleki faifaina. 8 Kini Solomoni yana vevinevo, kumanidiavo mali tomotoga taunidi kebu Isileli matatabudi yadi 'eba 'odu'odu i yogonidi bega 'adi fata bei vane i na 'anikabu wata yadi 'anivelena-maimaiga i na velomuyedi yadi yaubadavo 'waidie.

9-10 Avinodi 'Auvea yana souyagi Solomoni 'waineye tutuya 'ailuga, wata i talabodeni kebu yaubada vekavekali 'waidie i na 'odu'odu, siwe Solomoni kebu yana talaboda i da nogai. Fai i baila, kebu nuanuana me Isileli yadi Yaubada yana vona i na ve'ililibuyeniga, begaidi 'Auvea i nuasako Solomoni 'waineye. 11 I voneni i vo, Yaku veakutagona 'waimuye kebu 'u da ve'ililibuyeniga, wata yaku awave'eda'eda 'u bailedi, begaidi a vona mogitana 'waimuye yamu vetoveimea a na sielomu, kebu wata me Isileli 'u na veveimeyediga. We'e veimeanina ma'itufa a na 'aniveleneni tamu yamu tofolova 'waineye. 12 Siwe tamamu Devida a ve'ililibuyeni begaidi kebu yamu 'eba veimea 'waimuyega a na 'ewayavuleni bola ma yawaimuye. We'e 'awaie natumu i na veveimea tutulimu, 'eba veimeanina a na sieloi. 13 Siwe kebu me Isileli matatabudi a na 'ewayavuledi yana veimea 'wainega, we'e wauma 'aitamogana a na tauyeni i na miamia yana veimea nageneye. Naninina a na 'idewai fai basenadi Devida a venua'ivineni faifaiku i vetofolova, wata bani'odi Ielusalema a venua'ivineni yaku 'atamana, begaidi wauma 'aitamogana a na 'aniveleneni natumu i na veimeyeni.

26 Kini Solomoni yana tofolova bwaikina 'ana wagava Deleboama, yana kini i vedumwe'ai'aieni. Tomogonina tamana 'ana wagava Nebati, inana 'wabu'wabulidi 'adi wagava Selua, we'e yana 'atamana 'ana wagava Seleda, 'awalawa Ifeleimi nageneye. 27 Veifufunina Deleboama yana vegavianina faifaina side bani'odi.

Tamu tutuya Solomoni yana tofolovavo i vonedi tamana Devida yana 'atamana Ielusalema 'ana bibina kileuyega i na tubodai we'e fwayafwayayega i na veivuya i na tonova.

28 Deleboama tamu to'idumwebika wata to'aseta, Solomoni i 'iseni bega i silakai wauma Ifeleimi wata Manasa, kumanidiavo Iosefa tubunavo, yadi tofolovavo i na 'isave'avinidi.

29-30 Tamu tutuya Deleboama Ielusalema 'wainega i tauya i nunago 'edeye, tamu Yaubada yana tolu'ivona 'ana wagava Aida 'atamana Silo 'wainega i veluagai, 'aise'avadi i tovotovoi i veveifufu. Aida 'ana talauma 'ivauna 'ana 'isa 'atumaina i 'ewayavuleni nika i silabulabu'i 'adi lu'iawawa 12. 31 Nika Aida Deleboama i voneni i vo, 'Adi 10 a silabulabu'idiga, 'u na 'ewadi taunimu faifaimu fai 'Auvea me Isileli yada Yaubada i voneda i vo, Sai'afoga me Isileli 'adi veimea Solomoni nimanega a na sieloi, wauma 'adi 10 a na 'anivelenedi 'waimuye 'u na veimeyedi. 32-33 Solomoni i vedumwe'ai'aieku bega i nago yaubada vekavekali 'waidie i 'odu'odu, me Saidoni yadi yaubada vevinena Asitoleta 'waineye i 'odu'odu, me Moabe yadi yaubada Kemosi wata me Emumoni yadi yaubada 'ana wagava Moleki 'waidie i 'odu'odu. Yaku 'eda'eda kebu i da vematayakeyakedi wata yana sauluva kebu tonovidi matakuye. Yaku awave'eda'eda wata yaku veimea kebu i da ve'ililibuyediga bani'odi tamana Devida i 'idewai. We'e Devida taunina 'aku tofolova-vaita wata Ielusalema yaku 'atamana a venua'ivineni me Isileli wauma matatabudi 'waidiega yau faifaiku, begaidi wauma 'aitamogana a na baileni i na 'eno'eno Solomoni yana 'eba veimea. 35 Siwe me Isileli 'adi vetoveimea a na 'ewai Solomoni natuna 'wainega, we'e wauma Isileli 'adi 10 a na 'anivelenedi 'waimuye.”

40 Solomoni nuanuana Deleboama i na luvewafai, siwe tutuyanina vala i nogai, i dega i nago Kini Sisaki 'waineye 'awalawa Itifita nageneye. Bei taiadi i miamia i nagoga Solomoni yawaina i 'a'ava.

42 Ielusalema 'waineye Kini Solomoni malamala 40 nagedie me Isileli matatabudi i veveimeyedi. 43 Tutuyanina Solomoni yawaina i 'a'ava i ve'ufai Ielusalema, tamu 'ana wagava Devida yana 'Atamana, mulieta natuna Lioboama i vekini tutulina.