12
Me Isileli Kini Lioboama taiadi i vetalaga
1 Lioboama i nago 'atamana Sekemu me Isileli matatabudi bei i lulukamaseni bega i na silakai i na vekini. 2 Tutuyanina Nebati natuna Deleboama vala i nogai, i vilai i mai Itifitayega. Basenadi i dega Kini Solomoni 'wainega i nago Itifita bei i mia. 3 Me Isileli to'edakumetavo vala i vetunei Deleboama i na mai, bega me Isileli matatabudi taiadi i nagoi Lioboama 'waineye i voneni i vo, 4 Tamamu Kini Solomoni vita bwaikina i velema bega a vevelu'ui 'waimuye nuanuama 'ama vitanidi 'u da 'ivesafailidi nika 'wainega yamu veimea nageneye 'a na mia-'atumai.”
5 Nika Lioboama i tutula i vo, Matatabumi 'wa na vilami 'wa na nagoi, 'aiata aitonu i na 'a'avana wata 'wa na maia bei yami tutula a na velemi.” Bega i viladi i nagoi.
6 Nagami Lioboama to'edakumetavo 'au'auveadi taiadi i veifufu, kumanidiavo Kini Solomoni i 'ivaiseni tutuyanina ma yawaineye. I velutoliedi i vo, Ava'ai tutulaga tomotoga a na veledi?”
7 Matatabudi i tutula i vo, 'Ai'edi nuanuamu tomotoga 'u na 'ivaisedi, 'u na vetofolova faifaidi wata ava'ai yadi nuanua i vonemuga 'u na 'idewadimo nika i na miamia yamu veimea nageneye.”
8 We'e Lioboama kebu tomotoga 'au'auveadi yadi vona i da nogai, we'e i nago 'ana to'aivaita tubuvauvaudi taiadi i veveifufu kumanidiavo 'ana lakata taiadi i vesala. 9 Bega i velutoliedi i vo, De'e tomotoganidi, nuanuadi vita tamaku i velediga a na 'ivesafailidi, ava'ai tutulaga a na veledi? Ava'ai yami awave'eda'eda?”
10 Nika tubuvauvau i tutula i vo, Tomotoganidi nuanuadi 'adi vita 'u na 'ivesafailidiga, side bani'odi 'u na voneyedi 'u na vo, Yau to'ivekokova, mulieta tamaku. 11 Tamaku vita bwaikina i velemi, we'e yau vita bwaikaotogina a na velemi. Tamaku fisili 'wainega i fitalimi we'e yau a na fitalimi bulava tamu ma yana 'ibadi 'ana wagava 'ou'ounigodi 'wainega.”
12 'Aiata 'ana vetonu i 'a'ava, Deleboama wata tomotoga fuedi i viladi i maia Kini Lioboama 'waineye, bani'odi i vonedi, bega yana tutula i na nogai. 13 Kininina kebu to'edakumetavo 'au'auveadi yadi vona-'aivaita i da nogai begaidi i vona-toketoke 'aila'a 'waidie. 14 We'e tubuvauvau yadi vona i nogai i vematayakeyakeni begaidi i vonedi i vo, Yau yaku veimea tulina, kebu tamaku taiadi 'a da vesalaga. Tamaku vita sai'afo bwaikina i velemi we'e yau vita bwaikaotogina a na velemi. Kumanina i fitalimi fisili 'wainega, we'e yau a na fitalimi bulava tamu ma yana 'ibadi 'ana wagava 'ou'ounigodi 'wainega.”
15 'Auvea nuanuana yana vona Nebati natuna Deleboama 'waineye 'ana mogitana i na souyeni begaidi Kini Lioboama tomotoga yadi vona kebu i da nogai. Basenadi 'Auvea i vona-samula kininina yana vetoveimea i na sieloi 'wainega faifaina, vonanina Aida tomogo Silo i lu'ivoneyeni.
16 2 Sam 20:1Me Isileli matatabudi kini yana vesauluva 'wainega i 'asetai yadi velu'ui kebu i da nogayeni, tomotoga i tutula i vo,
'Ima Devida 'ana wauma 'a baila,
Kebu tamu sai'afo nuanuama kumanina Iese natuna i na veveimeyema,
Begaidi 'ima me Isileli 'ama laubwaina 'a na vilama yama 'atamana 'waidie,
we'e Devida tubuna Lioboama taunina yana tomotogavo 'aisedi i na veveimeyedi.”
Me Isileli i vona'a'avana i viladi i nagoi taunidi yadi 'atamane. 17 We'e Kini Lioboama bola me Isileli i veveimeyedi, kumanidiavo i miamia Iuda yana 'eba veimea nageneye 'atamana siasiaidi 'waidie.
18 Tamu tomogo 'ana wagava Adonilamu i veto'isave'avina kini yana tofolova faifaidi. Bega Lioboama i vetunei i na nago me Isileli i na veviladi i na miedi yana veimea nageneye siwe kileuyega i nikei i luvewafai. Kini Lioboama valana i nogai i 'abiwalowaloga i dodoga yana salioti*Salioti tamu fwayafwaya 'ana waka, 'aisaya osi i luluyo'ei. 'waineye i vilai i nago Ielusalema yana 'atamane. 19 Tutuyanina 'wainega i velamu i maiga 'asiau, wauma Iuda 'aisedi nuanuadi Devida tubunavo i na veveimeyedi, we'e Isileli 'ana wauma 'ifwaidi kumanidiavo i miamiani yavalatayega, i baila.
20 Tutuyanina me Isileli vala i nogai Deleboama i vilai i mai Itifitayega, vala i vetunei tomotoga matatabudi i va'auta bega Deleboama i silakai i vekini me Isileli i na veimeyedi. We'e wauma Iuda 'aise'avadi Devida tubunavo i veveimeyedi.
Deleboama Yaubada i vedumwe'ai'aieni
25 Kini Deleboama 'atamana bwaikina Sekemu i yogoni 'oya siasiaidi 'waidie 'awalawa Ifeleimi nageneye, bei i miana. Bega i tauya i nago 'atamana Fenueli i yogoni.
26-27 Tamu tutuya Deleboama i nuani i vo, 'Ai'edi me Isileli matatabudi i na nunagoi Ielusalema, 'Auvea yana Vanuga 'Eba Velu'ui 'waineye i na vevelomu, nuadi i na vilai Lioboama me Iuda yadi kini 'waineye. I na luvewafaku we'e ma'itufa Devida tubunavo i na veveimeyedi.”
28 Sou 32:4Bega kini yana to'asetavo taiadi i veifufu i awave'ede'edeni mulieta kini kumaea 'adi 'ailuga i 'idewadi golida 'wainega, bulumakau natudi 'adi 'isa'isa bani'odi. Yana tomotogavo i vonedi i vo, Yami nago Ielusalema 'waineye vitana 'waimie, side kumaea me Isileli yami yaubadavo, kumanidiavo i vagavaimi 'wa souyemi Itifitayega.” 29 Tamu kumaea golida i yatoi Bedeli, we'e tamu i yatoi 'atamana Dani. 30 Tomotoga i 'odu'odu kumaenidi 'waidie bega i sakosakona, avinodi Dani 'ani'ie siwe 'ifwaidi i nunagoi bei i 'odu'odu.
31 Deleboama 'eba 'odu i yogonidi 'oya siaidi deba'aidie wata 'ifwaidi tomotoga i venua'ivinedi i na vetovelomu siwe 'aila'a tulina tulina 'waidiega, kebu Livai 'ana wauma 'aisena 'wainega.
Tutuyanina 'waineye Deleboama i vekini Isileli nageneye, we'e Lioboama Iuda 'ana kini. Lioboama i vevekini malamala 17 nagedie, we'e me Iuda i 'odu'odu yaubada vekavekali 'waidie, me Itifita i maia taiadi i vetalaga nika i vetoketoke-'iawedi, kukua 'ai'aiwabudi Vanuga 'Eba Velu'ui 'wainega wata kini yana vanugayega i 'ewadi. Tutuya matatabuna Kini Lioboama wata Kini Deleboama ma yadi tolugaviavo taiadi i vevetalaga.
Tutuyanina Lioboama yawaina i 'a'ava, natuna Ebaya i vekini, malamala aitonu nagedie i vevekini me Iuda faifaidi, we'e Deleboama taiadi i vevetalaga. Tutuyanina Ebaya yawaina i 'a'ava, natuna Esa i vekini Iuda 'waineye. Esa i vevekini malamala 41 nagedie, yana sauluva 'atumaina wata i 'odu'odu Yaubada 'waineye we'e i vevetalaga me Iuda yadi yaubada vekavekali 'waidie. Wata i vevetalaga me Isileli yadi Kini Basa taiadi. Tutuyanina Esa yawaina i 'a'ava natuna Iosefata i vekini Iuda nageneye.
We'e Isileli nageneye Deleboama natuna, 'ana wagava Kini Nadabi, yana sauluva sakoina wata bani'odi kumanidiavo mulineye i lakama i vekiniga yadi sauluva i vesala. Nadabi i vekini malamala 'ailuga'ava, nika Basa i luvewafai wata Deleboama yana 'aila'a matatabudi i leodi. Basa malamala 24 nagedie i vevekini mulieta yawaina i 'a'ava. Natuna Ilai i vekini me Isileli faifaidi malamala 'ailuga nagedie. Tamu yana tovemata'ai'ai 'ana wagava Simili kininina i luvewafai bega taunina i silakai i vekini. Siwe wiki 'aitamogana i 'a'avana me Isileli tamu yadi tovemata'ai'ai Omili i silakai i vekini, we'e Simili taunina i luvewafai. Omili i vekini malamala 12 nagedie nika natuna Eabi i vekini Isileli nageneye malamala 22 nagedie.