18
Talaboda 'odu'odu tuatuaidi faifaidi
9 Tutuyanina 'wa na luku 'awalawanina 'Auvea yami Yaubada i velevelemiga 'waineye, 'aila'anidi yadi sauluva sakoiotogidi wata 'eba bunumayaga kebu 'wa na vetutuyamediga.
10-11 Vei 19:26; Sou 22:18Vei 19:31Kebu tamu sai'afo aitoi 'waimiega natuna iavetana 'alo vevinena i na velomuyeni 'aie i na kabuni 'alo i na tunu'auya,
Kukua 'eba 'isa, tugusa 'aisaya bonadiega, kileu 'alo 'enolaka 'wainega i na lu'ivona ava'ai 'awaie i na souyeniga faifaina kebu 'wa na vefolovedi,
Kebu tamu aitoi tove'wasa'wasala wata yaiaina taiadi i na veveifufu bega tutuya i mimaiga faifaina 'wa na 'asetai,
Kebu 'wa na lu'afo'a wata kebu 'wa na bwalata
Kebu 'wa na 'awakweli,
Kebu towafa 'anu'anunudi wata yalua 'waidie 'wa na veveifufu,
Kebu taunimi 'wa na tauyemi 'anu'anunu sakoina 'alo yaiaina i na agemi.
12 Aitoi de'e bani'odi i na vevesauluvediga, 'Auvea ma yana kamogala i na vedumwe'ai'aiedi. 'Awalawanina 'waineye 'wa na lukuga 'ana tomia sauluvanidi i 'i'idewadi, begaidi 'Auvea yami Yaubada matamiega i na luveyavulidi. 13 Mad 5:48I lubwainemi yami sauluva matatabuna tonovidi 'Auvea yami Yaubada mataneye. 14 'Awalawanina sai'afotoga 'waineye 'wa na luku, 'ana tomotogavo yaiaina 'ana 'odu'odu matatabuna i 'wasaledi, we'e 'omi 'Auvea yami Yaubada i talabodemi, kebu sauluvanidi sakoidi 'wa na 'i'idewadi.”
'Auvea tamu yana tolu'ivona i na venua'ivineni Mosese bani'odi
15 Fol 3:22; 7:37Wata Mosese i veifufu tomotoga 'waidie i vo, 'Awaie 'Auvea tamu yana tolu'ivona yau bani'odi i na venua'ivineni 'ami 'aila'a 'wainega,*Wata 'u na 'iseni, Folova 3:22, 7:37, Ioni 1:25 bonana 'wa na nogai 'wa na vematayakeyakeni. 16 Basenadi 'Oya Sainai†'Ana mogitana vona Ibeliu 'waineye, 'Oya Olebi. 'waineye 'wa va'autaga, 'wa velu'ui 'Auvea yami Yaubada 'waineye 'wa vo, Kebu nuanuama Yaubada bonana 'a na nogai 'alo yana 'ai 'ala'alata bwaikina 'a na 'iseni i na nunago 'a na wafa.’
17 Bega 'AUVEA i vona 'waikuye i vo, Ava'ai i voneyeniga, vona mogitana. 18 'Awaie tamu tolu'ivona 'omu bani'odi a na venua'ivineni 'ami 'aila'a 'wainega a na silakai. Yaku nuanua a na veleni bega yaku veimea matatabuna i na lulu'ivoneyedi tomotoga 'waidie. 19 Fol 3:23Tolu'ivonanina 'aku wagavayega i na lulu'ivona, we'e aitoi bonana kebu i na nogaiga, yau a na vematavulogi. 20 We'e 'ai'edi tamu tolu'ivona igodi 'aku wagavayega i na lu'ivona-vekavekali 'wa na luvewafai, wata bani'odi aitoi mali yaubada 'adi wagavayega i na lulu'ivonaga i na wafa.’ 21 Voke taunimi 'wa na velutoliemi 'wa na vo, Bani'odi ta na munega ta na 'asetai, valanina 'Auvea 'wainega i mai 'alo kebu?’ 22 Side bani'odi 'wa na 'asetai, 'ai'edi tamu tolu'ivona i na veifufu igodi yau 'Auvea 'aku wagavayega siwe yana vonanina kebu 'ana mogitana i na souyeniga, 'wa na 'asetai kebu yaku vonaga, taunina yana nuanuayega i veveifufu, begaidi kebu 'wa na kololoyeni.”