Toawave'eda'eda
'Eba kiavemageta
Buki de'e Toawave'eda'eda 'ana tokiluma 'ana wagava kebu ta da 'asetaiga. 'Ana 'isa 'wa da vo tamu tonuamageta i da kiluma, 'ana 'eba 'ainana taunina i goleni Toawave'eda'eda. 'Ifwaidi to'aseta i vo, Kini Solomoni i kiluma.”
Toawave'eda'edanina tomotoga yadi mia wata yadi folova i 'isedi wata i 'asetadi nani matatabuna nani-'avo'avovo. Tomotoga i 'isedi i toke i folofolova nani fuedi 'waidie siwe kebu i na 'eno-vagata, naninidi 'asiau tomotoga i 'i'idewadiga 'awa'awai i na savovola 'wa da vo bani'odi tomotoga kaukau i da lulusogi-wayogeni.
Siwe wata Toawave'eda'eda i veda, yada mia ma lamuna. 'Ai'edi nuanuada yada mia i na ve'atumai, i lubwaineda ma yada nuamageta sauluva tonovidi ta na 'i'idewadi wata 'ada To'idewadewa Yaubada ta na subisubiai. 'Ai'edi ta na miamia bani'odi, tutuya matatabuna ta na sososoana.
Toawave'eda'eda yana vona 'ana 'eba ve'a'ava side bani'odi i vo,
I lubwaineni tomotoga matatabuda ma yada ve'ililibu Yaubada ta na kololoyeni wata yana veimea ta na vevematayakeyakedi. De'e veimeanina kumekumetana wata bwaikaotogina, tomotoga matatabuda yada 'eba folova.
1
Nani matatabuna nani-'avo'avovo
1 De'e Toawave'eda'eda yana vona, Kini Devida natuna,*Kini Devida natuna 'ana wagava Solomoni. kumanina Ielusalema i veveimeyeni.
2 Toawave'eda'eda i vona i vo, Nani matatabuna nani-'avo'avovo wata nage'avadi,
'wa da vo wavuwavulo i da 'awa'u'umi.
3 Tomotoga i toke i folofolova fwayefwayeye, siwe 'adi ve'amubwadodo.
4 Lakata tuatuaidi i na 'a'a'ava wata lakata 'ivaudi i na sousouyedi,
siwe fwayafwaya 'ana 'isa kebu i na sivedamanaga.
5 Inala i na vuvulaoga wata i na iniiniva,
siwe i na 'a'abiwalowaloga i na nunago yana 'eba vulaoga 'wainega.
6 Kaukau bolimanayega i na nununuga,
we'e i na yayagivilai, ma'itufa i na nunago yavalatayega.
Tutuya matatabuna bani'odi i nununugedi.
7 Ufa matatabuna i ivoivo eyage i sousouyedi,
siwe malaveta kebu i da veveadagiga,
we'e ufanina i na vila-vaitugani 'ana 'ivie,
i na 'a'avana wata i na vilai eyage.
8 Nani matatabuna i 'i'ive'abiawada.
Ta veveifufu siwe kebu nani matatabuna ta na veifufu'a'avedi.
Ta 'isa'isa siwe kebu nani matatabuna ta na 'isa'a'avadi.
Ta noganogaya siwe kebu nani matatabuna ta na nogaya'a'avadi.
9 Naninidi basenadi i souyediga,
wata 'awaie i na souya-vaituganedi.
Naninidi basenadi tomotoga i 'idewadiga,
wata 'awaie i na 'idewa-vaituganidi.
Fwayafwaya de'e 'waineye,
kebu tamu nani 'ivaunaga.
10 Tomogo bani'odi i na voneyedi i na vo, 'Wa da 'iseni, nani de'e 'ivauna.”
Siwe kebu, naninidi matatabudi basenadi i souyedi i 'eno'enovi,
mulieta ta souyeda.
11 Naninidi basenadi tomotoga i 'idewadiga, 'akonadi ta venuafanidi.
Naninidi 'asiau ta 'i'idewadiga, 'awaie tomotoga kebu i na nuave'avinidi.
12 Ielusalema 'atamana bwaikina nageneye,
yau kumaniku Toawave'eda'eda, me Isileli yadi kini.
13 Tauniku a tauyeku, ma yaku nuamageta nani matatabuna tomotoga i 'i'idewadiga fwayefwayeye, a na 'isa-'atumaidi bega lamudi a na 'asetadi.
A vo, Yaubada folova 'eba nuavita i veleda,”
begaidi a toke faifaina a vevenua'ivina.
14 Naninidi tomotoga fwayefwayeye i 'i'idewadiga a 'isedi,
bega a 'isaveluagai nani matatabuna 'a'a'avidi,
'wa da vo bani'odi tomotoga kaukau i da lulusogi-wayogeni.
15 'Ai'edi tamu nani 'okana, kebu 'ana fata ta na kiavetonovi.
'Ai'edi tamu nani i na vegivaiga, kebu 'adi fata i na veluagai.
16 1 Kin 4:29-31Yaku venua'ivina 'waineye a vo, E'a,
yau nuaku magemagetaotogina Ielusalema nageneye,
mulieta 'ifwaidi kinivo i mai mulikuye.
Yau yaku nuamageta wata yaku 'aseta i vaganago-otoga mulieta 'ifwaidi.
17 Tonuamageta, tove'wava'wava wata tovona-'avo'avovo yadi vesauluva nuanuaku a na 'asetadi.
Siwe yaku 'isanina 'wainega a 'asetai yaku laualanina kebu yana 'eba ve'a'avaga,
'wa da vo bani'odi tomotoga kaukau i da lulusogi-wayogeni.
18 'Ai'edi yaku nuamageta i na vebwaika-'afo'afoga,
'ako a na toke a na nuavita.
We'e 'ai'edi nani fueotogidi a na 'asetadiga,
wata 'ako a na toke a na nuavita.