2
Taunida ta na kiavesosoanida, siwe nani-'avo'avovo
1 Yaku venua'ivina 'wainega a vo, 'Eba sosoana fuedi a na sitonovidi bega sauluva 'atumaina a na veluagai.” Siwe nani 'a'a'avidi a veluagadi.
2 Bega a vo, Namaga nani-'avo'avovo.
Ava'ai 'ana 'atumaina 'wainega a na veluagai?”
3 Ma yaku nuamageta a vevenua'ivina bani'odi a na munega tauniku a na kiavesosoaniku.
A vo, Oine a da toke a da yemuyemu 'alo tove'wava'wava yadi sauluva a da vetutuyamedi.”
Nuanuaku sauluvanidi 'waidiega a da 'asetai ava'ai sauluvaga 'atumaidi tomotoga i na 'i'idewadi,
yadi mia tutuya 'ale'usana fwayefwayeye faifaina.
4 1 Kin 10:23-27; 2 Ifu 9:22-27Yau folova bwaikidi a 'idewadi, vanuga 'adi 'isa 'atumaidi a yogonidi tauniku faifaiku,
wata kalefa waifeidi a ulidi oine faifaina.
5 Talaga bwaikidi wata 'adi 'isa 'atumaiotogidi a bakulidi, 'ai vuavuaga tulina tulina bakulanidi nagedie.
6 Ufa a bewai i nago talaganidi nagedie, nika 'wainega 'ai vuavuaganidi i na 'i'ivebikadi.
7 1 Kin 4:23Yaku tofolova-maimaiga fuedi iavetadi wata vevinedi a kimwanedi, wata 'ifwaidi kumanidiavo i tubuga yaku vanuga nageneye. Yaku 'aisayavo bulumakau wata sifi fueotogidi, kebu tamu kini basenadi bani'odi taiadi 'a da vesalaga Ielusalema nageneye.
8 1 Kin 10:10,14-22Yau a ve'ai'aiwabu siliba wata golida 'waidiega, kini yadi 'ai'aiwabu a 'ewadi 'eba veimea tulina tulina 'waidiega.
Yaku toleivo iavetadi wata vevinedi fueotogidi,
we'e tofolovavo vevinedi fuedi, ma 'adi magisisi, vevinenidi yaku 'eba sosoana.
9 1 Ifu 29:25Yau bwaikaotogiku Ielusalema nageneye mulieta tomotoga 'ifwaidi i maia mulikuye,
we'e kebu tamu tutuya yaku nuamageta i da 'a'avaga.
10 Nani matatabuna 'waikuye yavuyavudi.
Naninidi i da kiavesosoanikuga,
'waidiega kebu a da talabodekuga.
Siwe yaku folova i kiavesosoaniku,
'asa'aiana yaku folova 'ana tutula.
11 Ava'ai a 'i'idewadiga, a toke faifaidi a nuanua,
yaku folova bwaikina a 'iseni siwe nani matatabuna nage'avadi,
'wa da vo bani'odi kaukau a da lulusogi-wayogeni.
Fwayafwaya matatabuna 'wainega, kebu tamu ava'ai 'atumaina a na veluagai.
12 Bega a velamu a vevenua'ivina ava'ai sauluvaga tomotoga 'ada laubwaina, bani'odi tonuamageta, tove'wava'wava 'alo tovona-'avo'avovo yadi sauluva.
Tomogonina i na vekini mulikuye, folovanidi i na 'idewadiga bani'odi yau a 'idewadi.
13 A 'iseniga nuamageta 'asa'aiana 'atumaina ta na 'ewai,
we'e 'wava'wavadi yadi venua'ivina sakoidi ta na bailedi.
Bani'odi mageta 'atumaina we'e dudubala sakoina.
14 Tonuamageta matana i vevefoloveni 'wainega ava'aiega i na nago,
we'e tove'wava'wava 'wa da vo dudubala 'waineamo i da nunago.
Siwe a nuani, 'eba ve'a'ava 'waineye nani 'aitamogana i na souyeni tomotoganidi 'adi 'ailuga 'waidie.
15 Bega yaku nuanua 'waineye a vo,
Yaku 'eba ve'a'ava wata tove'wava'wava yana 'eba ve'a'ava taiadi 'a na vesala. Yaku nuamageta, ava'ai 'ana 'atumaina? De'e wata tamu nani-'avo'avovo.”
16 'Awaie tomogo ma yana nuamageta wata tomogo kebu yana 'asetaga 'adi 'ailuga i na wafa,
'adi nuanua 'waidega i na 'a'ava.
Tonuamagetanina 'ana nuanua wata tove'wava'wavanina 'ana nuanua i na luvuyosedi.
17 Naninidi fwayefwayeye ta 'i'idewadiga, 'waidiega vita i sousouyedi.
Begaidi sauluvanidi a vevedumwe'ai'aiedi,
'wa da vo bani'odi kaukau a da lulusogi-wayogeni.
Folova nani-'avo'avovo
18 'Awaie a na wafaga yaku folova vuagidi a na 'iawe-lovedi, tamu tomogo tutuliku i na 'ewadi, bega yaku folova matatabuna fwayefwayeye 'adi ve'amubwadodo. 19 Kebu ta da 'asetaiga tomogonina ma yana nuamageta 'alo 'wava'wavana, siwe nani matatabuna ma yaku nuamageta wata ma yaku tokemaiga faifaidi a folofolova fwayefwayeye i na veimeyedi. Matatabuna nani-'avo'avovo. 20 Bega nuaku a 'uvani fai yaku toketokena matatabuna a ve'amubwadodoyeni fwayefwayeye. 21 'Ifwaidi tomotoga ma yadi nuamageta, ma yadi nuauya, wata ma yadi 'aseta i folofolova siwe vuagidi 'atumaidi i 'idewadiga, mali tomotoga kumanidiavo kebu i da folovaga, i na 'ewadi. De'e wata nani-'avo'avovo, 'ana ve'amubwadodo. 22 Bega ava'ai tomotoga i na veluagai yadi folova vitana wata yadi venuafouviga 'waidiega? 23 Iob 5:7; 14:1Yadi 'aiata matatabuna folova 'waidie veviga wata 'abiawa i vevebaedi, lovane yadi venua'ivina kebu i da 'a'ailovega. De'e matatabuna nani-'avo'avovo.
24 Toa 3:13; 5:18; 9:7; Ais 56:12; Luk 12:19; 1 Kol 15:32'Ai'edi ta na 'ani'ani, ta na yemuyemu wata sosoana ta na veveluagai yada folova 'waidiega, nani 'atumaina. Siwe wata a nuani, de'e naninidi yada 'eba sosoana matatabuna i mai Yaubada 'wainega. 25 'Ai'edi kumanina kebu'aga, kebu tamu sai'afo 'ada fata ta na 'ani wata ta na sosoana. 26 Iob 32:8; Voa 2:6Egavo Yaubada i 'ivesosoani, taunina nuamageta, nuauya wata sosoana i veleveledi. We'e 'ai'edi tovesauluva-sako i na ve'ai'aiwabuga, yana 'ai'aiwabunina Yaubada i na eloi tamu tomotoga i 'i'ivesosoaniga i na veleni. Tosakona yadi folova nani-'avo'avovo, 'wa da vo bani'odi tomotoga kaukau i da lulusogi-wayogeni.