1 Tutuya 'ifwaidi i 'a'avana me Isileli matatabudi Ilimu 'wainega i tauya i nagoi Sali'avu'avu Sini, Ilimu wata 'Oya Sainai kamwadie. Itifita 'wainega i nunagoi weta'i 'aitamogana nageneye nika weta'i 'ana veluga we'e 'aiata 'ana ve-15 'waineye i le'wai Sini. 2-3 Bei sali'avu'avuye me Isileli 'aise'avadi i vebonavoluvolu Mosese wata Eloni faifaidi i vo, I lubwaineni basenadi Itifita 'waineye 'Auvea i da luvewafama. Bei 'a miamia ma 'ama 'aisaya wata ma 'ama'ama fuedi kamoma aiaidi siwe 'wa vagavaima ta mai sali'avu'avuye laseyega matatabuma 'a na wafa.”

4 Ion 6:31Bega 'Auvea Mosese i voneni i vo, 'U ve'wada a na vonemu, 'ami'ami abamega sai'afoga a na vemavugi 'wei bani'odi. 'Aiata 'aitamogana 'aitamogana tomotoga i na sousouyedi yadi 'eba mia 'wainega 'ani'aninina i na kwakwakwa 'aiata 'aitamogana faifaina. 'Ani'ani 'ana kwakwa 'wainega a na sitonovidi, 'ai'edi yaku veimea i na vematayakeyakeni 'alo kebu. 5 'Aiata 'ana ve-6 'waineye 'adi'adi i na kwakwa, tutuyanina 'ani'aninina i na 'idewa'a'avadi nika ma 'ana 'imoso'i, 'aiata 'ailuga 'ana 'etowava, kebu 'aiata 'ifwaidi bani'odiga.”

11-12 Wata 'Auvea Mosese 'waineye i vo, Me Isileli yadi vona-vaitugana 'akonadi a nogai. 'U na vonedi 'u na vo, Lavilavie bola wakalai kebu i na si'u'umiga, 'aisaya 'wa na 'ani we'e 'awa'awaie 'ani'ani'ava 'wa na 'ani nika ma kamoaimi. Yaku 'anivelenanina 'wainega 'wa na 'asetaku, yau 'Auvea yami Yaubada.”

13 Lavilavie mwalimwalitugana ma yavogidi i yaveobu yadi 'eba mia i umai, tomotoga i kwakwadi 'adi 'aisaya, we'e 'awa'awaie numula fwayafwaya matatabuna i 'ivebutai. 14 Tutuyanina numula i lala, sali'avu'avuye tamu nani bikana i souyeni 'ana 'isa 'wa da vo 'ula'ula. 15 1 Kol 10:3Me Isileli i 'iseni nuadi i vogani bega ma ediavo i velutolitoli i vo, De'e ava'ai?”

Nika Mosese i vonedi i vo, Side 'ani'aninina 'Auvea i velemi 'wa na 'ani. 16 Side bani'odi yana veimea i vo, Tomogo 'aitamogana 'aitamogana 'ani'ani i na kwakwa yana 'ani 'ana 'etowava 'wainega. Vadavada 'ana tomia faifaidi, niula wafofo ba'alidi 'ailuga 'ana 'etowava 'wainega.”

17 Yaubada yana veimeanina me Isileli i vematayakeyakeni. Tomotoga 'ifwaidi 'ani'ani bwaikina i kwakwa, 'ifwaidi sai'afo. 18 2 Kol 8:15Siwe tutuyanina i 'etowavadiga, tomotoga matatabudi 'adi fata. Tomotoganidi i toke i kwakwa kebu tamu i da luvegalaleniga, we'e egavo siaina i kwakwaga kebu i da ve'ale'usaga. 'Aitamogana 'aitamogana 'ani'ani i 'ewaga, 'asa'aiana 'adi fata. 19 Mosese me Isileli i vonedi i vo, Kebu tamu aitoi 'ani'ani i na yatoi i na 'eno'eno 'ana tugusa 'awa'awai. 20 Siwe tomotoga 'ifwaidi Mosese yana lu'ivona kebu i da ve'ililibuyeni bega 'ani'ani 'ifwaidi i yatodi 'adi 'ibua. Tutuyanina i 'atai 'ani'aninidi 'akonadi i bokana wata mwatamwata i tufakudadi begaidi Mosese i nuasako 'waidie. 21 Tomotoga 'aiata 'aitamogana 'aitamogana 'awa'awaie i sousouyedi 'ani'ani i kwakwakwa taunina yana 'ani 'ana 'etowava bani'odi. We'e tutuyanina inala i luluyauyauta 'ani'aninina i 'a'anibiabiai.

22 'Aiata 'ana ve-6 'waineye niula wafofo ba'alidi 'adi 4 i kwakwadi 'aiata 'ailuga 'ana 'etowava bani'odi. Mulieta yadi to'edakumetavo i nago Mosese 'waineye yadi 'etowava i lu'ivoneyedi. 23 Sou 20:8-11Mosese i vonedi i vo, 'Auvea yana veimea side bani'odi. 'Awa'awai 'Aiata Veawai*'Aiata Veawai tamu 'ana wagava Sabati. 'Auvea yana 'aiata i yato'idieni 'ana subia faifaina. Begaidi 'asiau 'ami'ami 'wa na 'anikabu-vagata wata 'wa na vetago-vagata 'awa'awai faifaina.” 24 Begaidi Mosese yana nuanua i 'idewai, 'ani'ani 'ifwaidi 'adi 'ibua i yatodi. I 'atai 'Aiata Veawai 'waineye 'ani'aninina kebu i da 'walaga wata mwatamwata kebu i da 'etokudadi. 25 Mosese me Isileli i vonedi i vo, 'Asiau 'Aiata Veawai 'Auvea faifaina bega 'ami 'ibuanidi 'waidiega 'wa na 'ani, fai 'ani'aninidi kebu wata 'wa na veluagadi 'atamane. 26 'Aiata 6 nagedie 'ani'ani 'wa na 'ewa'ewa we'e 'aiata 'ana ve-7 'waineye kebu 'wa na veluagadi.”

27 'Aiata 'ana ve-7 'waineye tomotoga 'ifwaidi igodi 'ani'aninidi i da kwakwa we'e tutuyanina i souyedi i 'isa'avadi. 28 Wata 'Auvea Mosese i voneni i vo, Awale! Tutuya manamanawena yaku nuanua wata yaku veimea 'wa vevedumwe'ai'aieni. 29 I lubwaineni 'Aiata Veawai yau 'Auvea a velemiga 'wa na 'asetai wata 'wa na nuanuani. Begaidi 'aiata 'ana ve-6 'waineye 'ani'ani ma 'ana 'imoso'i a velevelemi, nika 'ami fata 'wa na ve'ibuami 'aiata 'ailuga faifaidi. 'Aiata 'ana ve-7 'waineye matatabumi yami vadavada 'waidie 'wa na miamia, kebu 'wa na souyemi 'ani'ani 'ewa faifaina.” 30 Begaidi 'aiatanina 'ana ve-7 'waineye tomotoga matatabudi i veveawai. 31 Sal 11:7,8Me Isileli 'ani'aninina 'ana wagava i goleni Mana.†'Ana mogitana vona Ibeliu 'waineye, Mana, 'ana saivila, De'e ava'ai?

35 Ios 5:12Malamala 40 nagedie me Isileli Mana 'wainega i 'ani'ani 'ana tugusa i le'wa Kenani, fwayafwaya 'atumaina 'adi fata bei i na bakubakula.