17
Mosese kileu i nikei nika ufa i kausewa
1 Sal 20:2-13'Auvea yana veimea 'wainega me Isileli ma 'aila'adi Sini sali'avu'avu i 'iaweni, 'awalawa 'aitamogana 'aitamogana 'waidiamo i nunago nika i le'wa Lefidimi, bei i vebae'wa siwe kebu ufanaga. 2 Begaidi tomotoga Mosese taiadi i ve'ikwayekwayega i vo, Ufa 'u na velema 'a na yemu.”
Nika Mosese yadi vona i tutuli i vo, 'Wa ve'wada a na vonemi. Awale 'wa vona-vaitugana 'waikuye? Wata awale 'Auvea 'wa sisitonovi, we'e mogitana i lubwainemi 'wa da vetumaganamo.”
3 Tomotoga 'anigodi i lala nuanuadi ufa i da yemu begaidi Mosese 'waineye i vo, Awale Itifita 'wainega 'u miema? 'Ima, natumavo wata yama 'aisayavo taiadi 'anigolala 'wainega 'a na wafa.”
4 Bega Mosese i toke i velu'ui 'Auvea 'waineye i vo, Tomotoga 'waidie ava'ai a na 'idewai? Sai'afoga kileuyega i na nikeku.”
5 Nika 'Auvea Mosese i voneni i vo, Yamu wautogana 'u na 'ewai, bega bagase Ufa Naeli 'u nikeiga, wata me Isileli to'edakumetavo 'au'auveadi 'ifwaidi 'u na vonedi, taiadi 'wa na kumeta tomotoga debanagodiega. 6 Tutuyanina 'wa na le'wa 'Oya Sainai*Sainai tamu 'ana wagava Olebi. 'waineye, yau a na tovotovoi matamuye tamu kileu bwaikina tabwaneye. We'e 'omu kileunina 'u na nikei nika ufa i na kausewa, 'wainega tomotoga matatabumi 'wa na yemu.”
Bega Mosese me Isileli yadi to'edakumetavo 'au'auveadi matadie kileunina i nikei nika ufa i kausewa. 7 Mosese 'awalawanina i goleni Masa wata Meliba†'Ana mogitana vona Ibeliu 'waineye Masa, 'ana 'aseta Saitonova we'e Meliba 'ana 'aseta Ve'ikwayekwayega. fai 'awalawanina 'waineye me Isileli Mosese taiadi i ve'ikwayekwayega, nika bei 'Auvea i sitonovi bega i vo, 'Auvea 'awasasadeye i miamia 'alo kebu?”
Me Isileli me Amalekaiti i leo'a'avadi
8 Me Isileli i miamia 'awalawa Lefidimi 'waineye nika me Amalekaiti i le'wai vetalaga faifaina. 9 Bega Mosese Iosua i voneni i vo, Iaveta tovetalaga 'ifwaidi 'u na venua'ivinedi 'wa na nago me Amalekaiti taiadi 'wa na vetalaga. 'Awa'awai Yaubada wautogananina i velekuga a na 'ewai a na laka 'oya siaina deba'aineye a na silakai a na tovotovoi.” 10 Iosua Mosese yana nuanua i 'idewadi bega me Amalekaiti taiadi i vetalaga we'e Mosese, Eloni wata Ewa i laka 'oya siaina deba'aineye. 11 Tutuyanina Mosese nimana i sisilakaiga, me Isileli i vevetoketoke. We'e 'ai'edi Mosese nimana i na siobuyedi me Amalekaiti ma'itufa i vevetoketoke. 12 Tutuyanina Mosese i 'abiawa Eloni wata Ewa kileu i mieni i yatoi Mosese tabwaneye i miabui. 'Adi 'ailuga Mosese nimana i silakaidi, tamu 'ana 'atagiega, tamu 'ana wamayega. Nimana i silakaiga 'ana tugusa inala i niva. 13 Iosua yana tolugaviavo taiadi me Amalekaiti i vetoketoke-'iawedi, kefatayega i leo'a'avadi.