1 Mosese lawana Ietolo, kumanina me Midiani yadi tovelomu, vala i nogai ava'ai Yaubada i 'idewai Mosese wata yana tomotogavo me Isileli 'waidie wata 'Auvea me Isileli i yavudi bega i souyedi Itifitayega. 5 Me Isileli i vebae'wa sali'avu'avuye, Yaubada yana 'Oya 'waineye, mulieta Ietolo, kumanina Mosese lawana i mai, Mosese yana vavine wata natunavo 'adi 'ailuga taiadi. 6 Bola 'edeye Ietolo vala i vetunei i vo, Yau lawamu 'a viwai yamu vavine wata natumwavo 'adi 'ailuga taiadi.” 7 Bega Mosese i nago lawana i yogo'ede'edeni, ma yana ve'ililibu i 'odu 'waineye wata i 'avalamaigi. Bega 'adi 'ailuga i veifufu yadi veluaga wata yadi mia faifaidi mulieta i luku yana vadevadeye. 8 Mosese nani matatabuna i veifufuyedi lawana 'waineye ava'ai 'Auvea i 'idewai Felo wata me Itifita 'waidie, me Isileli 'adi 'etoyavu faifaina. Wata Mosese i lu'ivona vitanidi i veluagadi yadi mainina 'waineye nika bei 'Auvea i 'ita'ita'iedi. 9 Naninidi faifaidi Ietolo i sosoana-'afo'afo, fai 'Auvea me Isileli i 'ita'ita'iedi me Itifita yadi toketokena 'wainega.

10 Ietolo i vo, 'Auvea ta na subiai, fai kumanina i 'ita'ita'iemu Felo wata me Itifita 'waidiega, mogitana me Isileli i 'ita'ita'iemi me Itifita yadi veimea toketokena 'wainega. 11 E'a, be'ama a 'asetai 'Auvea yana toketokena bwaikaotogina kebu 'ifwaidi yaubadavo bani'odi, fai me Itifita ma yadi nualaka me Isileli i lumagi'aiedi we'e 'Auvea i 'ita'ita'iedi.”

13 I 'atai, Mosese i miabui 'eba veimea 'ana didiga 'waineye bega tomotoga yadi ve'ikwayekwayega ediavo taiadi i na vinenegedi. Tomotoganidi Mosese i tovififineni i lulukamata 'awa'awaiega 'ana tugusa i lavia. 14 Tutuyanina lawana i 'iseni ava'ai Mosese i 'i'idewai tomotoga 'waidie bega i vo, Ava'ai 'u vivai. 'Omu 'aisemu folova bwaikina 'u 'i'idewai we'e tomotoga fuedi i tovififinemu i lulukamata 'awa'awaiega i nagoga 'ana tugusa i lavia nuanuadi 'u na vinenegedi.”

15 Mosese i tutula i vo, Tomotoganidi i mimaia 'waikuye nuanuadi Yaubada yana nuanua i na 'asetai yadi mia 'ana 'atumaina faifaina. 16 'Ai'edi tamu tomogo ma iana i na ve'ikwayekwayega i na mai 'waikuye, bega yau a na kiavetonovidi aitoi i veyogodewai. Wata 'ana fata Yaubada yana awave'eda'eda wata yana veimea a na vonedi.”

17 Mosese lawana i voneni i vo, De'e 'eda'edanina kebu 'atumaina. 18 Folova de'e vitana fai 'omu 'aisemu 'u 'i'idewai, i na nunago 'omu wata tomotoga 'wa na 'abiawa. 19 Tutuya de'e 'u na vainenega we'e yau a na awave'ede'edemu nika 'ana fata Yaubada i na 'ivaisemu. 'Omu 'u na veifufu Yaubada 'waineye tomotoga 'adi wagavayega, yadi nuanua 'adi kiavetonova faifaidi. 20 Wata i lubwainemu, Yaubada yana awave'eda'eda wata yana veimea 'u na veve tomotoga 'waidie, we'e mia 'atumaina 'ana sauluva 'u na awave'ede'ededi. 21 We'e 'ifwaidi tomotoga ma 'adi vetumagana wata ma yadi 'aseta 'u na venua'ivinedi, tomotoga matatabudi 'waidiega bega i na veto'edakumeta. Tomotoganidi Yaubada 'ana ve'ililibu bwaikina 'waidie, nika kebu 'ana fata tomotoga nuadi i na 'anidi kukua 'alo mani 'waidiega bega vekaliega i na veveimea. 'Ifwaidi tomotoga 'adi 'aila'a 1,000 i na kumekumesedi, 'ifwaidi 'adi 'aila'a 100, 'ifwaidi 50 wata 'ifwaidi 'adi 'aila'a 10. 22 Tomotoganidi i na vetovevonayavuga, tutuya matatabuna ediavo i na vivinenegedi bega i na vevenua'ivina aitoi i vona mogitana aitoi i vekali. Naninidi safailidi i na sivetonovidi, we'e naninidi vitadi i na lu'ivoneyedi 'waimuye bega 'omu 'u na kiavetonovidi. De'e 'wainega yamu folova 'ana vita i na 'ivesafaili wata 'wainega 'wa na ve'ivaivaita. 23 'Ai'edi yaku awave'eda'edanidi 'u na vevefolovedi wata 'ai'edi Yaubada i na veveimeyemu, nika kebu 'u na 'abiawa wata tomotoga ma yadi nuaniwalova i na vilaviladi yadi vanuge.”

24 Mosese lawana i vinenegeni i 'a'avana yana awave'eda'edanidi matatabuna i vefolovedi. 25 Tomotoganidi ma yadi 'aseta me Isileli matatabuna 'waidiega i venua'ivinedi i na veto'isave'avina tomotoga faifaidi. 'Ifwaidi 'adi 'aila'a 1,000, 'ifwaidi 'adi 'aila'a 100, 'ifwaidi 50 wata 'ifwaidi 'adi 'aila'a 10 i kumekumesedi. 26 Tutuya fuedi to'isave'avinanidi tomotoga yadi ve'ikwayekwayega i na kikiavetonovidi. Naninidi vitadi i na lulu'ivoneyedi Mosese 'waineye bega i na vinenegedi, we'e naninidi safailidi to'isave'avinanidi i na kikiavetonovidi.

27 Mulieta Mosese lawana i 'alanuaia i 'a'avana, nika Ietolo i tauya i nago yana 'awalaweye.