2 Me Isileli Lefidimi i 'iaweni i nunagoi i le'wai Sainai sali'avu'avuye, 'Oya Sainai lamuneye bei me Isileli i vebae'wa. 3-4 Tutuya 'ifwaidi i 'a'avana, Mosese i laka 'oyeye Yaubada 'waineye, nika 'Auvea i vegole 'oyayega i vo, Side bani'odiga Iakobo 'ana wauma, kumanidiavo me Isileli 'u na vonedi 'u na vo, 'Akonadi taunimi matamiega 'wa 'iseni ava'ai a 'idewai me Itifita 'waidie. Yau bwaibwai bani'odi, fafediega natudiavo i 'ifo'ifodi, 'omi wata a vagavaimi 'wa maia 'waikuye a 'i'isave'avinimi. 5 1 Fit 2:9VeL 4:20; 7:6; 14:2; 26:18; Tai 2:14Begaidi 'ai'edi yaku nuanua mogitana 'wa na vematayakeyakedi wata yaku veakutagona 'wa na ve'ililibuyeni, 'omi 'asa'aiana yaku tomotoga mogitana. Fwayafwaya matatabuna yau yaku 'eba veimea, we'e tomia fwayafwaya matatabuna 'waidiega 'omi 'asa'aiana yaku kukuafou. 6 Ve 1:6; 5:10'Omi 'aila'animi yayato'idimi 'wa na vevetovelomu faifaiku.’ De'e vonanidi 'u na veifufuyedi me Isileli 'waidie.” 7 'Auvea i veifufu'a'ava, Mosese i vilai i obuma 'oyayega bega me Isileli yadi to'edakumetavo i goledi i maia 'waineye, veimeanidi 'Auvea i veleniga matatabuna i lu'ivoneyedi 'waidie. 8 Bega tomotoga matatabudi bonadi 'aitamogana 'wainega i tutula i vo, E'e, nani matatabudi 'Auvea i voneyeniga 'a na 'idewai.” Nika Mosese tomotoga yadi tutula i nogai bega i vilai 'Auvea 'waineye yadi nuanua i lu'ivoneyeni.

9 'Auvea Mosese i voneni i vo, Yau a na mai waowa badubaduna 'wainega, 'ada 'ailuga ta na veveifufu bega tomotoga i na nogai nika tutuya matatabuna i na awavemogitana 'waimuye.” 'Auvea i vona'a'avana, Mosese tomotoga yadi tutula i lu'ivoneyeni 'waineye.

10 Wata 'Auvea Mosese i voneni i vo, 'U na obu tomotoga 'waidie, 'asiau wata 'awa'awai 'u na 'i'ivaisedi i na 'i'idewadewa bega taunidi i na tauyedi 'waikuye, wata 'adi talauma i na lekoadi. 11 Taunidi i na 'ivevunavunagidi fai 'aiata 'ana vetonu 'waineye yau 'Auvea a na obuma 'Oya Sainai 'waineye bega tomotoga matatabudi i na 'iseku. 12 Ibu 12:18-20Tugusa 'u na yatodi 'oya i na luvivileni bega kebu i na 'idiliga wata 'u na velu'ase'asedi 'u na vo, Taunimi 'wa na 'isave'avinimi bega kebu 'wa na laka 'oya 'waineye wata kebu lilivaneye 'wa na nagoi. 'Ai'edi aitoi ikata 'ana tugusa i na damaniga 'wa na nikei i na wafa. 13 Tomogonina kebu 'wa na kiave'avini bega i na vilai, we'e 'wa na lukileuya 'alo 'ibadiega 'wa na loveni. 'Ai'edi tomotoga 'alo 'aisaya i na damanaga, kebu 'wa na ve'ise'iseniga, we'e mogitana i na wafa. We'e tutuyanina evulega butu'aina manamanawena i na yuveunaunaiga nika bei tomotoga matatabumi 'wa na nagoi 'wa na laka 'oyeye.”

14 Mosese i obuma 'oyayega, tomotoga i 'ivaisedi i 'idewadewa bega taunidi i tauyedi 'Auvea 'waineye, wata i vonedi 'adi talauma i na lekoadi. 15 Nika i vonedi i vo, Taunimi 'wa na 'idewadewami 'aiata 'ana vetonu faifaina, 'aiata 'aitonu nagedie kebu yami vevinevo taiadi 'wa na veluaga.”

16 Ve 4:5VeL 4:11,12'Aiata 'ana vetonu 'waineye 'awa'awaiogose, waowa bwaikina wata dududubalina 'oya i umai nika tumuyoana i namanamali wata i dududuya, evulega butu'aina i vevebwaika wata manamanawena i yuveunaunai. Tomotoga matatabudi bei i miamiani i kololo-'afo'afo i veve'alatatava.

17 Tutuya 'ifwaidi i 'a'avana Mosese tomotoga i kumesedi bega i souyedi yadi bae'wa 'wainega Yaubada taiadi i na veluaga, tomotoga matatabudi i veve'alatovoi 'oya lamuneye. 18 'Oya Sainai matatabuna lufwa bwaikina i umai fai 'Auvea 'akonadi 'ai 'ala'alata 'wainega i obuma. Lufwa bwaikaotogina i lakalaka abama 'waineye 'wa da vo libi ta da tunuya wata 'oya i toke i yueyue. 19 We'e evulega butu'aina i toke i vevebwaika, Mosese i veifufu nika Yaubada bonana i tutuli tumuyoana 'wainega. 20 'Auvea i obuma 'Oya Sainai tabwaotogineye bega Mosese i goleni i na laka 'oya deba'aineye, nika Mosese i tauya i laka.