8 Wata 'Auvea i veifufu Mosese 'waineye i vo, Me Isileli 'u na vonedi Vadavada Tabutabuna faifaiku i na yogoni nika yau tomotoga 'awasasamie taiadi ta na miamia. 9 Vadavadanina 'u na 'idewadewai wata 'ifwaidi 'ana kukua taiadi, yaku nuanua 'ana laubwaina 'waineamo a na awave'ede'edemu 'u na 'idewadi.

10 Wata 'Auvea i veifufu Mosese 'waineye i vo, Tomotoga 'u na vonedi bega tamu didiwaka i na 'idewadewai welavi akasia 'wainega. 'Ana vemanawe bani'odi 110 senitimita, 'ana vebababa 66 senitimita wata 'ana velaka 66 senitimita.*Me Isileli yadi 'etowava 'ana vemanawe bani'odi 2.5 kiubiti, 'ana vebababa 1.5 kiubiti wata 'ana velaka 1.5 kiubiti 11 Golida 'ana loi 'wainega nagena wata lilivana 'u na fitai 'ayana taiadi. 'Ana vaigavu 'u na 'idewai didiwaka i na luvivili. 12 'Aifafula 'eba 'etouyagi 'adi 4 'u na 'idewadewadi golida 'wainega, bega 'u na kiafwasedi didiwaka 'agena 'waidie 'eba eva faifaina. 'Ailuga 'ailuga 'u na kiafwasedi vi'ai 'adi 'ailuga 'waidie. 13 Didiwaka 'ana 'aifafula 'u na 'idewadi welavi akasia 'wainega, i na 'a'avana golida 'wainega 'u na baniumadi. 14 We'e 'aifafulanidi 'u na 'etouyedi ovudiamo bega 'waidiega i na eva. 15 'Eba eva 'u na 'etouyediga kebu 'u na 'ewayavuledi, bei i na 'eno-vagata. 16 Tutuyanina didiwaka 'u na ve'a'avai, yaku veakutagona kilukilumina a na velemuga 'u na dodogidi didiwaka nageneye.

17 Ibu 9:5Veakutagona 'ana Didiwaka 'ana kudu golida 'wainega 'u na 'idewai, bei tomotoga yadi sakona a na 'u'u'umidi. Kudunina 'ana vemanawe 110 senitimita we'e 'ana vebababa 66 senitimita. 18 Kudunina tabwaneye anelose Selebimu†Selebimu anelose toketokedi i tovotovoi Yaubada mataneye wata i folofolova faifaina. 'adi 'ailuga 'u na tutudi bega i na laka, tamu fogena 'amu 'atagiega we'e tamu 'amu wamayega. 19 Golida mwadodouna 'aitamogana 'wainega didiwakanina 'ana kudu wata Selebimu 'adi 'ailuga 'u na 'idewadewadi, vi'ai 'adi 'ailuga 'waidie i na tovotovoi. 20 We'e Selebimunidi fafediega 'ana kudu i na ve'iwa'uyeni, 'adi 'ailuga i na veve'ai'isa bega i na 'isaobu kudu 'waineye. 21 I na 'a'avana, yaku veakutagona kilukilumina a na velemuga 'u na dodogidi didiwaka nageneye mulieta 'u na kuduya. 22 Veakutagona 'ana Didiwaka 'ana kudu 'waineye, wata Selebimu 'adi 'ailuga 'awasasadie, a na viwai bega ta na veveifufu yaku veimea me Isileli a na velediga faifaidi.”